CBCUSA SUNDAY SCHOOL CAUK A CHUAK CANG

       Kannih Chin churches kan caah kan fa le cawn ding Sunday School cauk hmanh tlamtling in kan ngeih khawh lo caah CBCUSA nih cun Christian Education and Literature Department cu a van ser i cantling Director caah Pathian nih A bia le Lai ca/holh duhnak le sinak a pek mi Saya Thlasui Tluangneh cu March 2014 in cantling rianttuantu ah kan thim cang ka tein a ttang ve ciamman i chun le zan thlu lo bak in a tthut hnawh i Sunday School cawn ding cauk cu level panga caah uk nga bak a kan tial piak khawh.  Bawipa min kan thangthat.  Saya Thlasui Tluangneh le a chungkhar cung ah kan i lawm tuk hringhran.

A cauk hna cu:

1) Basic Level (Kum 5-6)

2) Intermediate Level (Kum 7-8)

3) Advance Level (Kum 9-10)

4) Junior Level (Kum 11-13)

5) Senior Level (Kum 14-15)

       Hi cauk hna hi English (Mirang) in ttial cia mi leh si lo in, cauk tampi rel hnu ah kan Chin ngakchia pawl he aa tlak ning in ttial a si caah a har taktak.  Saya Thlasui Tluangneh hi kan ram in Master degree ngei cia a si hlei ah Cincinnati Christian University ah kum thum a kai i M.Div degree a hmu mi a si.  Bawipa Pathian nih khuaruahhar in A bawmh caah kan mit hmuh taktak in hi cauk phun nga uk 6000 cu August 1, 2014 Friday ah CBCUSA Office, Indianapolis, Indiana ah Pathian sin ah pekchanhnak kan tuah colh.  Hi cauk cu kan fa le Sunday School ngakchia vialte nih uk khat cio i tlaih kho ding uk tampi kan nam.  A hmanthlak he aa dawh tuk i nu le pa zong nih rel nan duh tuk lai.  Cawn ve hrim zong kan hau ve.  Bible hngalhnak ah kan fa le nih van tei cu kan duh bal lai lo.  Nu le pa zong nih ngeih ve nan duh lai caah tampi in kan chuah nak a si.

      Kan chan i zoh hmanh usih. Kan innchungkhar cio zoh usih.  Kan fa le hna thluak le kaar hlan ning hi ngia usih.  Khrih lam in a pial chawm ding in an um cang.  Kan fa le caah phaisa hna kan ui sual i cawk lo hna in kan um sual ahcun thlarau lawng in si lo in, pumsa fa sinak hrimhrim in kan thlau colh hna lai.  Kan fa le mino le ngakchia nih Pathian biakinn ah an phak lo caan hna kan ton sual ahcun mitthli he kan miphun hmanh hi kawl tthan a hau te lai.  Kan hmuh lai nain, kan ngeih khawh lo caan a phan kho.  Cu caah, CBCUSA le ram kip Chin churches hna nih kan ngeihmi kan home mission cu kan mino (Youths) le ngakchia (Sunday School) hna sin rianttuannak mission hi a si ko cang.  Hi hna rual an him ahcun Pathian ram kauh ter tu lawng si lo in, miphun humzualtu zong an si te lai.

     Kannih Laitlai Chinmi hna nih kan thiam khawh/hrawm khawh bik mi Chinholh hna hi thazaang pek kan hngalh lo sual ahcun kan nuhrin holh nih cun kan fa le hi a tungmer kho taktak hna lai lo.  Mi tam u Laitlai Chin nih kan hman khawh cemmi hi an thiam lo ahcun an hawikom sin in an zaam kho.  Hi Sunday School cauk nih hin Pathian bia lawng si lo in, kan miphun holh zong a tthan ter hrimhrim lai.  Kan fa le mui dawh le aw ttha hlasakthiam an tam chin lengmang.  Zapi nih kan theih khawh mi Laiholh tein hla an sak khawh dih cio ahcun an Lai DC/DVD man cu kyats in million zei maw zat an hmuh lai, US dolloars in a thong in an hmuh caan a um te lai.  Thlarau lei in mi tha an si lawng si lo in, Laimi hawikom sin ah a tlawngleng kho mi an si khawh ding tiang in kan fa le hi dawt an hau.  Pathian bia cawn le Lai ca/holh cawn cu an herh cem mi a si.

    Khrihfabu kip sin ah Bawi Khrih min in nawl kan duh mi hna cu:

1) Sunday School a kaimi nan ngakchia dihlak caah Director Saya Thlasui Tluangneh (hehchet@yahoo.com) sin ah van cah cio u.

2) Nu le pa a duhmi caah cah chih khawh a si fawn lai.

3) Indiana ah a ummi khrihfabu nih cun an i lak len cang.  Khua dangdang ah kuat colh a si fawn.  Van cah tuan cio u.  A kuat nak address zong van chim kho ulaw a tlamtling khun lai.

4) Ram dangdang in cah a duhmi nan um ahcun van chim cio ulaw a thatnak nak in ruah a si kho ko lai.

[tang] Sunday School Cauk Phun Nga

[tang] Intermediate Level (Kum 7-8) nih cawn ding mi lessons

hna hi cauk dihlak fianternak caah kan langhter.

 [tang] Lesson 1 hi hmanthlak he a fiang kho tuk.

Upa nu le pa nih cawn ve tlak tak a si.

 [tang] Biahalnak le Cafang Kawlnak te hna tuah a si.

Ngakchia lung a la kho tuk ding in.

[tang] Lesson 2nk, Ngakchiat lio thinlung ah Pathian nih

Amah muisam keng in a kan ser hi theih fiannak an ngeih ahcun

Sertu Pathian cu an duh peng cang lai.  An philh lai lo.

 [tang] Lesson 3nk: Rule (Satan) tukforhnak tih a nung tuk.

Kan fa le thinlung ah sualnak tuah a that lo nak a langhter lai.

 [tang] SS Cauk cu nan fa te kut cung lawng ah si lo in,

an thinlung ah Pathian bia hi phan kho ding in kuat ding ah

timhtuah cia an si cang.

 Cauk chung cu box chung ah khumh an si nain, a chung Pathian Bia hi

ngakchia thin lung box chung ah khumh din ding in

timhtuah cia an si cang.

 [tang] CBCUSA OFFICE CE & L Director Cabuai in 

Pathian bia cu hmun kip khuasa kan fa le sin ah an zuang.

Saya Thlasui Tluangneh nih hi a cabuai i Bible ka rel i ka tial lio ah 

"Pathian bia cu ka thinlung thlarau nih a temtuk.  Ka vanram a si ko"

tiah Pathian sin pekchanhnak kan tuah lio ah a chim.

 [tang] CBCUSA Office, Indianapolis, Indiana

7105 Chimney Rock Ct, Indianapolis, IN 46217

CBCUSA CE & L Director pehtlaihnak

Email: hehchet@yahoo.com

Office: 317-489-0383

Pathian nih thluachuah in pe cio hna seh!

Bawi Khrih rian ah,

C Duh Kam

Executive Minister

Chin Baptist Churches USA

Indianapolis, Indiana