Bawipa Thangthat

Saturday, June 28, 2014

CACC RIANTUANNAK KONG
(Rev. Dr. Lal Uk)
03/11/2014

1. CACC cu CBC USA he kutsih in kan miphun le ram caah riantuan ti kan si tiah kan ruah zungzal bantuk in 2013 CACC BM zong nih biachahnak a tuah cang mi a si.

2. A cunglei ruahnak le thinlungput in kan hnulei kum thum kum li lio in CBC USA bawmchanhnak le CACC tawlrelnak in Kanpalet ah harsami siangngakchia bawmhchanhnak le cawmkennak rian zong rak tuanti a si i mah rian kha 2013 in CACC Mission Program in pehzulh in tuan cuahmah a si. 2013-14 cacawn kum ah tang 5 in tang 10 tiang minung 30 kan zohkhenh hna i zohkhenh tu ah Saya Van Nawl Thang kan chiah. Naite February zarhkhatnak ah khan kan va tlawng hna i hmailei riantuannak kong tampi kan i ruah hna. A ralaimi June thla cacawn kum ahcun minung 40 in kan chiahpiak kho hna ulaw kan duh tiah Kanpalet upa pawl nih an kan chimh mi a si. Minung pakhat kumkhat caah a tlawmbik sing 2 a hau. Zohkhenhtu Saya thlahlawh ah sing 20 a hau. Coka remhpiak an hau. Ihkhun cabuai le thutdan pawl tuah piak an hau. Timei le herh dangdang he cun kumkhat ah sing 150 a hau ding a si. Hi riantuannak ah tukum i a kan bawmtu hna ICBC Indianapolis -  Mission Department, Cactus Chin Christian Church le a dang khrihfabu le pumpak hna cung ah lawmhnak tampi kan ngei. Hi riantuannak hi feldeuh le cakdeuh in pehtzulh khawh hi a biapi tuk. A tuhi Buddhist pawl nih Nahtahlah lawng silo in singngakchia cawmkennak leikap in biatak tein riantuan an i timh ve caah biatak chuah chin lengmang kan herh ko. CACC Mission Program in Paletwa zong ah Sidawr/ Clinic kan tuahpiak hna i kumkhat hnu kum khat in thawnter ding kan i tim.


3. CBC USA bawmhnak thawng in nikum ah CACC General Secretary le CCC Principal USA tlawnnak nan kan tuahpiak mi cung ah lunglawmhnak nganpi kan ngei. Mah program nih khan CACC/CCC le USA Laitlai khrihfabu lunghmuhnak le pehtlaihnak a tharchuah caah thathnemnak nganpi a si
tiah kan ruah.

4. CACC le CBC USA nih ai hmaithla mi cu vawlei pumpi Laitlai khrihfabu funtomnak le kan holh kan ca le nunphung dirkamhnak riantuantinak a si bantuk in Lairam Isuakrista Baptist Kohhran, Lawngtlai he zong naihniam ngai in pehtlaih le riantuanti kan i zuam i a ralaimi March 19 in 23 tiang Sangau khua ah tuah ding mi LIKBK Assembly zong ah CACC GS le Hlaremh Bu nih telpi ding kan i tim. Cubantuk in April 24 in 26 ah Hakha i tuah dingmi CACC Laiholh Laica Khawmpi (Seminar) zong ah Lawngtlai le Bawm kan unau pawl zong kan sawm ve hna.


5. CACC nih zohremhnak a tuah i Myanmar Bible Society nih Korea ram ah an namter mi  Lai Baibal Thiang (Revised Edition 2013) cu Zip ngeimi Uk 1000 le Zip ngeilo Uk 5000 CACC zung a phan cang. Medium size a si i a cauk ai dawh ngaingai, ken fawi le relnuam tawkte a si. Bible Society man khiah ningte in Zip ngei uk khat ah Ks. 10500/-, Zip ngeilo uk khat ah Ks. 4000/- in kan zuar. Khrihfa Hlabu cu a hme he a ngan he cawk ding kan ngei peng. CACC nih 2014 chung ah Sunday School cawn ding cauk tlamtlingte in chuah i kumvui caah a duh mi poh cawk khawh ding in kan timh i a tuhi cauk pathum kan nam lio a si. Cun, February thla in Chin Tlangau thlatinchuak Thawngzamhnak kan chuah i biatak chuah in pehzulh ding kan i tim.


6. CACC zunginn thar sak ding kan timh mi design le estimate an tuah liopi a si. Mah an dih cun a hmun vawlei cawh le sersiam i innsak rian thok colh ding kan si ko lai. Nan thlacamnak le nan chawva he tanpi le bawmhchanh kan herh ngaingai ko.


A cunglei i ka van langhtermi vialhi si rih sehlaw April 5-6 ah CACC BM meeting kan tuah lai i mahkhawh cun kan meeting thawngpang zong kan rak in thanh thante hna lai.

A rian thiang ah,

Lal Uk (Mercy pa)
CACC

No comments:

Post a Comment