Khrih Messiah Chuahnak Kong

Khrih chuah lainak kong hi Biakam Hlun chungah phuan chung a si.

## Satan nih Eve le Adam kha a tukforh hna i Pathian duhlonak an tuah tikah Pathian cu a thin a hung. Rul (Satan) cu Pathian nih chiat a serh. “Nangmah le minu cu nan i hua lai, minu cithlah le na cithlah hna cu an i ral lai. Minu cithlah nih na lu kha rial an zuam lai i nang nih a kedil kha cuk na zuam ve lai,” tiah a ti

Satan lu a rial kho tu cu Khrih lawnglawng a si. Rul lu a rial tu ding minu cithlah hi Khrih Messiah cu a si tiah an ti. Minung nih sual le palh in kan tluk lio caan ah khamhtu Khrih kan ngei ti nak a si.

##Pathian nih David sin ah biakamnak a ser.
“Na bawi tthutdan cu zungzal in a hmun lai,” tiah a rak ti (2 Samuel 7:16). A zungzal in a hmun ding mi David siangpahrang pennak cu Jerusalem khuah ah uktu siangpahrang hna uknak nih a tlinh lo. Messiah pennak lawng nih a tlinh khawh. Cu caah zungzal in a pennak a hmun kho ding mi Khrih Messiah chuah lai nak a si tiin an ruah.

Salm 2:2-3 chuangah aa ttialmi “Vawlei siangpahrang hna le uktu bawi hna nih Bawipa le Bawipa Chitithuh mi kha an doh. An i thawh i, ‘An kan ttemnak hri kha chat u sih law hlonh usih,’ an ti,” a ti mi ahhin Bawipa Chitithuhmi cu Messiah kong a chim an ti. Hi kong hi Paul nih Lamkaltu 4:25-26 ah “Thiang Thlarau in kan pu David sinah bia na rak chim i,
‘Zeicadah Jentail mi hna cu an thin a hun i miphun dang hna nih cun pakpalawng khua an khan? Bawipa le a Messiah cu doh awk ah vawlei cung siangpahrang hna cu an i tiim i uktu hna cu an i pum” na rak ti, tiin a chim tthan.

Salm 45 cu sunparnak le daihnak in a khatmi Messiah muisam a langhnak a si an ti. “Pathian nih an pek mi bawitthutdan cu zungzal in a hmun lai! Na ram cu dinnak in na uk” tiah a ti.

Salm 72 chung ah Messiah pennak hmanthlak cu fiangte in a lang. “A penmi ram cu rili pakhat in rili pakhat, van hram deng tiang asi lai” a ti. Vawlei siangpahrang hna nih penmi ram cu a si kho lo. Messiah pennak kong a chim mi a si.

##Messiah chuah lai nak cu Profet hna biaphuan in a lang.

Profet Isaiah nih “Bawipa nih hi ram chung thing hna le ram hna cu ngan ngaingai le dawh ngaingai in a tthan ter hna caan a phan lai” a ti (Isaiah 4:2). “David siangpahrang ciruang hi hau mi thingkung bantuk a si; chumhmui in nge thar an corh bantuk in David tefa chung in siangpahrang thar pakhat a chuak lai” a ti (Isaiah 11:1).

Profet Jeremiah nih cun “David ruang in a ding mi Nge pakhat ka corh ter lai can a ra lio, tiah Bawipa nih a ti. . . Amah a min cu, Bawipa cu kan Dinnak a si, ti a si lai,” tiah bia a phuan (Jeremiah 23:5-6; 33:15). Zechariah nih hi bantuk in a phuan ve. (Zechariah 3:8; 6:12).

Profet Isaiah nih hi ti hin a phuan tthan. Bawipa nih a mi cu a thawh hna i, “Nan sualnak a mertaak mi vialte hna, nan dihlak in ven awk ah le khamh awk Jerusalem ah ka ra lai” a ti (Isaiah 59:20). “Ka sal, nangmah caah rian ngan deuh chin ka ngei; Isarel mi chungin a taangmi hna kha lianhngannak ah phak ter tthan lawng si lo in, Nangmah cu miphun hna ca i ceunak ah kan ser lai, cu tic un vawlei dihlak nih khamhnak an hmuh lai,” a ti (Isaiah 49:6).

Isaiah nih harnak a tuar i hlawtmi Sal a si lai nak kha Isaiah 53 chungah tling tein a chim. Hremnak a tuar ding mi vialte a chim. “A in mi dantatnak in luatnak kan hmu i an tuknak vual in damnak kan hmu” tiah a ti (Isaiah 53:5).

Kan caah Messiah a chuak ve maw?

Christmas cu ahopaoh nih kan i ngaih tuk cio hna. Mirang ram ahcun chungkhar i tonnak (Family Reunion) ah an hman. A ttha ngai. Nain, chungkhar hi Messiah nak in a ngan deuh cang rua. Mi tampi nih Khrih kong an chim ti lo.

Kannih ve zong nih Christmas kan i ngaih tuk tawn mi hi Messiah hi keimah caah a chuak. Keimah misual khamh awk caah a chuak ti hi kan philh sual lai ti hi phan a um ngai. Kan thinlung nih Khrih a chuahnak kong hi a tem ve lo ahcun, tlun inn tong lo in, khualriahnak inn ngeitu bang Khrih hi kan tthawl sual ko lai.

2009 Christmas cu ka thinlung ah Khrih chuak in Daihnak Bawi le Remnak Bawi si hrimhrim seh tiin Khrih dawng hna usih.

Peace and love!