Cheuhra Cheukhat

Cheuhra cheukhat peknak kong chim hi pastor dirhmun in chim ka rak ngamh lo. Mi phaisa hal phun in ka rak ruah. Pathian nih a biatak Bible bia chim ding ka si kaa fian hnu cun, cheuhra cheukhat kong chim a herhnak ka fiang ve. Cheuhra cheukhat cu Bible chung ah hmun tampi ah a um. Pathian bia a si. Cu caah kan khalhmi turun hna zawnruahnak ruangah ka chim ngam cang.

Cheuhra cheukhat cu Pathian ta a si. Bawipa nih “Ram chung thil cheuhra cheukhat vialte. . . cu Bawipa ta a si. Bawipa ta i a thiangmi a si” a ti (Levitikas 27:30). Pathian ta a simi cheuhra cheukhat cu pe lo in, kan hman tikah, Pathian nih an ka fir, ka phaisa bawm an ka bauhpiak tiin aa ruah. “Pathian cu minung nih ramh in fir ding a si maw? Nan ka fir cuahmah ko hih!. . . Nan cheuhra cheukhat le thawhlawm in nan ka fir hi!” a ti (Malakhi 3:8).

Rethei tein kan ttuan i kan hmuh mi hlawh chung in cheuhra cheukhat pek ding aa harhmi kan tampi. Kan harsa lai ti kan phang. Nain, Ralkapbu Bawipa nih “Ka hneksak tuah ngat u, herhnak a um paoh ah van innka cu kan hunh hna le hunh hna lo, thluachuah vanluhnak cu kan thlet hnawh hna le hnawh hna lo, zoh tuah ngat u” a ti (Malakhi 3:10).

Pathian sinah chawpek ruangah sifah lai phan ding a um lo. Pathian nih ka hneksak tuah ngat u, thluachuah vanluhnak cu kan thlet hnawh hnaw le hna lo a ti ko. Pathian nih pek ding ah a kan tiam. Pathian cu Jehovah Jireh a si. Abraham nih a fapa Isak pe in khangh thawinak a tuah timh tikah Pathian nih tukawng te kha a pek (Genesis 22:13). A fapa a sung lo. Pathian nih a khan ko. Abraham nih raldohnak in a hmuhmi hranchaw cheuhra cheukhat cu tlangbawi Melchizedek sinah a pek. Cheuhra cheukhat pek aa thoknak a si.
Kan pek ruangah kan si a fak hlei lo. Bawipa nih a kan khanpiak ko lai. Laimi lak zong ah Pathian sinah chawpek a hngalmi cu mirum le mi teitu an si.

Biakam Hlun chung Cheuhra Cheukhat Peknak

#Rian dang ttuan lo in, Pathian rian a ttuanmi Levi mi hna cu thawhlawm in hlawh an pek hna. Levi mi cu ram an ngei lo. Rocomi an ngei lo. Pathian nih a rian an ttuan khawh nak ding ah thawhlawm kha einak nawl a pek hna (Lev. 27:30, 32; Number 18:24, II Chanrelnak 31:4-6; Number 18:28).

#Pathian thangtthat raithawinak caah thawhlawm cu pek a si fawn (Deuteronomi 12:11-12).

#Pathian nih sifak santlai lo nupa ngeilo ngakttah hna bawmhnak caah cheuhra cheukhat pek a fial hna (Deuteronomi 14:28-29; 26:12).

#Biakam Hlun chungah loh theihlo in pek ding in fial a si (Malakhi 3:8-12). Pathian cu minung nih a fir lai maw tiin a ti. Amah sin pek lo kha fir ah aa ruah.

Biakam Thar chung Cheuhra Cheukhat Peknak

#Jesuh Khrih cu ngunkhuai peknak kong an hal tikah, “Siangpahrang cu siangpahrang ta a simi thil kha va pe ulaw Pathian cu Pathian ta a si mi thil kha va pe ko u,” tiah a ti hna (Matthai 22:21). Pathian ram kauhnak caah khrihfabu ah kan pekmi chaw hna cu Pathian sinah kan pekmi chaw an si.

Khrih nih “Puttinan, hamhhuai le aithing te hna hmanh kha cheuhra cheukhat nan pek , sihmanhsehlaw, Nawlbia nih biapi taktak a si a timi dinnak le mi zanfahnak le zumhtlak sinak hna cu zeihmanh nan rel ttung lo, hi hna hi pei nan tuah awk a si cu, a dang zong kha daithlanh hlei lo in” a ti (Matthai 23:23; Luka 11:42). Farasi mi hna nih a lenghlam in tthatnak langhternak caah thawhlawm an pek. Thiam a cohmi Farasi pa thlacamnak nak in misual ah a chiami ngunkhuai khawltu kha a ngaihthiam (Luka 18:13). Thawhlawm pek kha daithlan lo ding in Khrih nih a kan cawnpiak.

Thinlung in peknak

#Khrih nih kan thinlung a hlam. Thawhlawm cu lenglei tthatnak caah si lo in chunglei in Pathian sinah lawmhnak kan chimnak a si. Paul nih “Thlaici tlawmte a tuh mi nih tlawmte a zun tawn, tampi a tuhmi nih tampi a zun tawn. Cu caah nanmah le nan lungthin nan i thlehning cio in rak tho u, nan thawh tikah ngaihchih bu le hnek chom in si hlah seh, lunglawm tein a tho mi kha Pathian nih a dawt hna. Pathian nih cun nan herh leng tiang in kan pek khawh ko hna. . .” tiah a ti (II Korin 9:6-8).

#Jesuh nih cun “Thil ttha nan tuah mi hi zapi nih ka hmu hna seh ti duhnak lungthin in mi zapi hmai ah nan tuah nak hnga lo i ralring u. Cu ti nan tuah ahcun vancung khua i a ummi nan Pa sin in zeihmanh nan hmu lai lo” tiah a ti (Matthai 6:1). Uanthlarnak caah tuah lo ding in a kan cawnpiak.

Thawhlawm pekning

#Paul nih cun hman tein thawhlawm pek ding ah a kan fial. “Zarhpi Ni fa te in, nan hmuh mi a tlawm a tam ning cio khan phaisa nan rak thawh lai” a ti (I Korin 16:2).
#Mah lungthin thleh ning tein Pathian sinah chawpek a kan fial (II Korin 9:5-15).
#Lunglawm te le lung si tein thawhlawm pek a kan fial (II Korin 8:11-12).
#Mah lungthin duhnak tein thawhlawm pek a kan fial (Deuteronomi 16:10; Leviticus 19:5).