CBCUSA CRRC MUSICAL CONCERT

Indianapolis, Indiana

July 24, 2016

CBCUSA nih CRRC Consert caah Hlasakthiam Van Siang Mang kan sawm.  Hmun tam ngai ah concert cu tuah a si.  July 24 Sunday @ 7:00 pm ah Indianapolis, IN ah an tuah than.  Indy hlasakthiam paruk nih an bawmh.  ICBC Band nih an tumpiak hna.  A satu le a tumtu an dihlak an thiam tuk.  Hlasak a ngaitu mipi zong kan thiam tuk ve.  Minung thong in kan si lai an ti.  Indiana chung CBCUSA churches tanrualnak ruang ah a tlamtlin tuknak a si.  An dihlak cung ah kan i lawm tuk.  Pathian nih thluachuah pe hna seh!

 Van Siang Mang nih a sak lio

 Mipi kan rak i lawm tuk.

Chin khualipi Hakha remh thannak caah le hartuar miphun hawi bawmhnak caah

dawtnak thinlung cu ong cio hna usih.

Bawi Khrih min in Sawmnak:

Dawtmi miphun hawi vialte hna,

CBCUSA aiawh in nan dihlak Bawi Khrih min in kan don hna.  CBCUSA kan riantuannak caah thlacamnak he thazaang nan kan pek caah nan dihlak cung ah lunglawmhnak tampi ka ngei.  Pathian nih thluachuah in pe cio hna seh!

Pathian nih nupi bantuk in a thitmi khua le ram a um.  Cu cu Jerusalem a si.  Beulah Land tiah a kawh.  Jerusalem cu “Kaltaakmi Nupi” ti na si lai lo.  “Thitmi” na si cang lai” a ti [Is. 62:4].

Kannih Chin miphun zong nih “Beulah Ram” kan ngei ve.  Cu cu, vawleipi cung tlanng par pakhat te cung ah Pathian nih kannih Chinmi hna umnak ram a kan pek.  Cu cu Chinram/Lairam kan ti. Hi tlang cung te ah kum 500 – 600 tluk kan um cang.  Hi Chinram te lawng hi mah ta ah kan i ngeih khawh mi ram a si. 

Hi Chinram chung ah rili in pe 7,543 a sangmi Rungtlang a um.  Cu tlang hram pe 6120 sannak hmun ah Chin khualipi Hakha cu a um.  Ni kum 2015 July 29, zarh chung ah Komen Cyclone ruahsur nih Hakha khua cung pe 1400 reng lo a sang mi Rungtlang pi cu a cimh ter.  Hmun tampi an cim hna.  Inn 732 an rawk.  Hakha khua lawng ah biakinn 10 an rawk. Chin siangbawi hna thlan cu kan kuai kak, an cim.  Chinram hmun tampi ah harnak cu kan tong.  Umnak le ei awk ngei lo in kan miphun hawi thong tampi harnak nan tuar. 

Cun, kan miphun hawi hna bawmhnak ca lawng ah si lo in, Hakha khua ah a tu bantuk in kan fale nih musical concert le conference dangdang hna tuah khawhnak caah minung 3000 a tlummi hall lianpi sa ding in CBCUSA nih saduhthahnak kan ngei.  Cu caah, a tu bantuk in Pathian thluachuah a dongmi miphun hawi hna nan dihlak bawmhnak hal ding ah Hlasakthiam Van Siang Mang hi sawm in a tu concert program hi kan tuahnak a si.  Indiana kan hlasakthiam hna nih nan bawmh caah nan dihlak cung ah kan i lawm tuk.

Nikhat cu Persia siangpahrang Artazaksis hrai putu Nehemiah cu mithmai chia ngai in a um.  Nehemiah cu Persia ram ah saltaang Judahmi a si.  Siangpahrang nih a mitthmai chiat kha a hmuh tikah “Zeicadah na hmai a chiat?” tiah a hal.  Nehemiah nih “Ka pupa hna thlan umnak khuapi cu a rawh ko i a kutka hna cu mei nih a kangh dih tikah hin zeitindah hmaichia lo in ka um hnga” a ti [Nehemiah 2:2-3].  Nehemiah cu Persia ram ah nuam tuk in um hmanh sehlaw Jerusalem a rawh i a miphun hawi hna rawl lo le ti lo in an um i Jerusalam a rawh cu a thei peng, a lung a fak, mithmai chia in a um peng.  Persia siangpahrang nih a dawtnak le zawnruahnak a langhter.

Cu ti cun, Persia siangpahrang nawlngeihnak le rumnak i phurh in a rawkmi Jerusalem vampang cu remh than ding ah aa thawh.

Nehemiah cu Jerusalam a phan.  Hmun kip ah aa chawk.  Israelmi hna cu Jerusalem vampang remh ding in a sawm hna.  Mipi nih an theih tikah “Tho usih law sa usih” an ti [Nehemiah 2:18].  Pathian nih a thitmi Jerusalem khua cu an remh dih.

Dawtmi miphun hawi ulenau le fale vialte hna,

Kan pipu hna an semnak kan Lairam te hi rawk nelnul in kan um ter siang lai maw?  Kan umnak ram cio in tho usih law kan tuanbia ah kan theih bal lo mi Chin miphun hartuarnak 2015 ruangah kan Chin miphun mitthli philh lo nak caah Chin khualipi Hakha ah “Hall Lianpi” hi sa ti hna usih!  Bawi Khrih min in kan sawm hna.

Rev. Dr. C Duh Kam

General Secretary

Chin Baptist Churches USA