Bawipa Thangthat

Monday, November 28, 2016

November 28, 2016

Upatmi miphun hawi zumtu hna:

A thlum December thla ah kan lut cang lai.  December 25 Sunday cu Christmas Ni a si.  Pathian nih A Fapa ngeih chun cu kan sualnak in khamh awk caah a run thlahnak ni le can a si.  December cu Pathian nih misual kan sin ah A peknak thla a si.

Kan vawlei hi a tu bantuk in buaibainak in a khat lai ti hi kan ruat bal lo.  Ni fatin vawlei ah a cangmi thil nih kan thinlung hna hi Pathian ah i peh kho lo tiang in nun sivanghnak kan ton sual lo ding ah Bawipa Pathian sin ah daihnak le hnangamnak cu hal zungzal hna usih.  Hi bantuk chan le can ah dam le lawm in nunnak a kan hmantertu cu Pathian a si.  A sunglawi khun.  Tu kum 2016 cu Bethlehem ah a chuakmi Van Bawi Messiah hi bia le hla dawh in lunglawm le sunglawi tein don i tim cio hna usih.  

Pathian nih 2016 December chungah lam a kan hruainak ruangah kan i lawmhnak cu
(1)   Lawmhnak Thawngtha a kan phurhtu kan siangbawi te hna thlan remhnak caah si seh,
(2)  Kan Chin khualipi Hakha serthannak le kan miphun hawi hna nih lam tampi in an thancho khawhnak ding ah kan herhtuk mi minung 3000 a tlummi hall nganpi cu kan sak khawhnak ding ah sish, khrihfabu kip nih nan Bethlehem laksawng cu pe cio ding ah Bawi Khrih min in kan nawl hna.

Siangbawi te thlan sernak caah a pe cang mi khrihfabu nan cungah lunglawmhnak tampi kan ngei.  A pe lai ding mi zong nan ruah ciami nak tam deuh in van i hne hram ko u.  Siangbawi te cu Khrih Thawngtha a phurtu an si caah Tedim nih cun Hakha ah aa phummi an siangbawi Dr. Cope ruh ro tal nih kan hngak seh ti an duh.  Hakha nih an pe siang hna lo.  Tedim Baptist Convention nih a tu a rawkmi siangbawi thlan remhnak caah ks. 200,000 cu HBA ah an pek hna.  Falam nih thluachuah an i hamnak caah siangbawi thlan dawh tuk mi an sak.  Hakha khualipi hi kan siangbawi dihlak hna ruh ro a phurtu a si.  Ahohmanh nih an thlanro hna zohchia in kan chia siang bal hna lai lo.  Remhnak ding ah $ 50,000 a hau.  Pe cio hna usih. Thluachuah cu kan peknak zawn tein an rak kir than lengmang ko lai.

Minung 300o a tlummi hall saknak caah Vailamtah thlacamnak hmun pawng ah hmun hnih a um.  Hakha Christian Ministers Fellowship [HCMF] nih ICBM office inn le hall cu i saknak ko u an kan ti cang.  Kan cozah uktu hna nih hmun cu a rem an ti lai kan zumh ko.  Hakha Khua Thar in a hla lo.  Hakha University in a hla fawn lai lo.  Tiphul lampial lonh tiang a ummi Hakha Thar hna caah a hla tuk fawn lo.  Pyidawtha le Dawrthar in a hlan lo.  Hmun lai ah a cang.  Pathian nih A khanmi hmun a si hrimhrim ti khawh a si.  Khrihfabu lian deuh nih fak deuh in van i hne hram kho u.  Khrihfabu fa deuh nih kan si khawh chung in van i hne hram ve hna usih law, hi hall pi cu kan sak khawh ko lai.  Pathian thawng in kannih Laitlai Chin zumtu hna kan sifahnak cu Bawipa hmual ah a cang.  Kan zumhnak hi a thang chin lengmang.  Tho hna usihlaw sa ko hna usih.

Hakha khua ah lam remh an herh tikah theng an ngei cang.  Ke in kal ti lo in bus in an i chawk kho cang lai.  Sizung ah mithi an um tikah Hakha General Hospital Chapel [nan sakmi] ah thla an cam kho.  Hla an sa kho.  Pathian bia in an i hnem kho hna.  A rauh hlan ah kan siangbawi te thlan cu khua dang le ram dang in a rami tiang nih khupbil thlacamnak hmun ah an ser khawh lai.  CBCUSA zumtu hna kan authawng hi van ah a thang hmasa.  Cu hnu ah kan semnak Chinram ah awtleng bantuk in a va ring.

ICBM programs cu Kawlram ah tlamtling tein an tuah khawh.  CBCUSA AGS Rev. Dr. Thlaawr Bawihrin zong dam tein a rak kir cang.  Mission riantuan hi Pathian sin ah zumtu hna nih chaw kan lehnak a si.  Kan pekmi a tam i kan lopil a kauh paoh ah Thlarau thlai thar tampi kan dong lai.  Mission cu khrihfabu nunnak keng ruangruh a si. Khrih Jesuh nih Midang kha thil va then hna ulaw, nannih zong Pathian nih an thenh ve hna lai, liam thluahmah in, nan i chap khawh chung in, nan zawi khawh le khawh lo in, nan kut chung ah an thlet hna lai.  Midang ca i nan hmanmi tahnak rel kha nanmah ca zong ah a hman ve laitiah a ti [Luka 6:38].

CBCUSA Mino hna nih Texas Chin Baptist Church, Dallas, Texas, Thanksgving Holidays ah music camp cu tlamtling tein an tuah khawh.  Kan fale nih Pathian hi an Pathian ah an i ser ahcun kan miphun hi a him ko lai.  Pathian ram hmanh an kauh ter te lai.  Thlacamnak in bawm cio hna usih.

CBCUSA Nubu an dai lo.  An thu sawhsawh kho lo.  An tuah hnga ding rian cu khrihfabu kip ah an cawl cuahmah hna.  Jesuh Khrih nih A Pa rian a tuan khawhnak ding ah chawva a kawlpiaktu hna cu Jerusalem nu rual an si ti hi an hnglah, an i nunpi.  Khuachia 7 ngeimi Mary Magdalene cu Khrih nih A damter hnu ah aa din kho ti lo.  A zawt fah tuk lio ah Khrih nih damnak a pekmi cu a umpi sawh kho lo.  CBCUSA kan nule pawl hi an si ve.

CBCUSA ram chung khrihfabu kip ah mino hna nih hmai zarh in Christmas carol vah an thok lai.  Pathian nih Christmas Ni sunglawi cu Amah thangthat kho ding in kan hruai cio ko seh!  “Vawlei lawm tuah, Bawipa a tum.  Vawlei Bawi a si lai.”

A rian thiang ah,


C Duh Kam
General Secretary

CBCUSA

No comments:

Post a Comment