CBCUSA EM Dr. C Duh Kam Myanmar 
Tlawnnak Report

January 31, 2015 Saturday in Washington, DC [IAD] in kaa thawh.  Beijing ah Sunday ka phan.  Yangon cu Sunday 11:00 pm ah ka va phan.  Chungkhat le hawikom nih an rak ka don.  Mah ram te phak cu kan cozah uar tuk lo zong ah a nuamhnak te a um. 

Pathian lamhruainak le nan thlacampiaknak thawng in February 25 (Wednesday) ah ka khualtlawnnak in dam tein kan rak phan than.  Nan dihlak cungah lunglawmhnak tampi ka ngei.

Kan khualtlawnnak chung ah Kachin ram le Napyidaw le Thlang Lairam cu kan va leng kho.  A tawinak in a tanglei bantuk in ka van langhter:

February 3, 2015 Tuesday ah ka hawi le Dr. Roy Medley, GS of ABCUSA, Dr. Jim Winkler, President and General Secretary of National Council of Churches, USA, Rev. Florence Li, Home Mission le Dr. Paul & Gail Aita, Foreign Mission of ABCUSA, Dr. Saw Ler Htoo, Karen Baptist Churches USA, Dr. Edmund Za Bik le Pu Zo Tum Hmung an rak phan cio hna.

[tang] Khualtlawngmi dihlak hmanthlak [Napyidaw kal lio]

Ka pawng ah a dirmi Rev. Mar Ke Kyi lawng hi Mitkyina ah a kal lo.

Napyidaw len lio ah Dr. Edmund Za Bik nih a kan telpi lo.

February 4 Wednesday: Myanmar Council of Churches, Yangon le Karen Baptist Convention ah kan leeng.  MCC kan len tikah Myanmar ram biaknak le a tu lio buaimi pawl hi an kan chimh.   Kawl mipi nih Rohingya pawl an rak cohlang hna lo tiin an chim.

February 5 Thursday: Myanmar Baptist Convention le Karen Baptist Theological College, Insein le Myanmar Institute of Theology [MIT] ah kan leeng.  Karen pawl hi an rak thangcho ngai.  Bible thiamsang zong an tam.  An bible sianginn le an office building an tha tuk.  Clinic tha ngai mi zong an tuah.  Mizaw tampi an zohkhenh khawh hna.

February 6 – 8, Friday - Sunday: Mitkyina, Kachin State ah kan zuang.  Zing ah kan phan. Kan pu le cu Kachin Baptist Convention zumtu 10,000 reng lo nih sunglawi ngai in an don hna.  Chun hnu ah cawnpiaknak le biacah chimnak a um.  Zarhteni ah ministers 600 hrawng cawnpiaknak a um.  Zarhpini ah biakinn dangdang ah kan i pum hna.  Kei cu Zion Baptist Church (member 4000) sin ah phung ka chim.  Chun hnu ah ramchung ralzaam hna umnak ah kan leeng.  Zan ah Kachin Nongnang Theological College ah kan leeng.  Kachin Baptist Convention zong an miphun caah an i pumpe bak.  KNO pawl an dirkamh bak hna.

[tang] Kachin Baptist Convention nih Mitkyina Airport in KBC office tiang

mipi a tlai in donnak an tuah.

[tang] Chin le Kachin unau kan si tiin Kachin pastor (80 yrs) nih biaruah lio

[tang] Zion Baptist Church, Mitkyina (member 4000) Sunday Worship Service

[tang] An pastor nu he

[tang] Dr. Samson, GS of KBC le Dr. Roy Medley he

February 9 Monday: Kachin State Chief Minister kan leeng.  Kachin mipi tuartemnak le raldohnak kong an siaherhnak kong an ruah dih.  Chun hnu ah Yangon lei ah kan rak zuang than.

[tang] Kachin State Chief Minister Lennak

February 10 Tuesday: Yangon in Napyidaw ah a lang in kan leeng.  Pu Aung Min le Pi Suh Kyi kan ton hna.  Kan ram uknak le biaknak kong i siaherhmi vial te cu kan ruah dih ko hna.  Tlang cung mi, a bik in, Chinmi hna kan sifah tuknak kong ah hunchonak tuahpiak a herhnak zong chimh a si.  Pi Suh Kyi nih cun Lairam a tlawn lio ah an dawtnak kong zong a kan chimh. 

February 11, 2015 Wednesday:  US Embassy, Yangon ah Ambassador Derek Mitchell le zung rianttuantu hna kan ton hna.  Kan lennak kong kan chimh hna.  Chinmi kan si a fah tuk caah USAID hna nih bawmh kan herhnak kong zong kan ruah hna.  US visa a tlaitu nu zong kha kan miphun thanchonak caah Lairam ah rianttuanmi Chin pastors hi kan sawm lengmang hna lai i visa pek khawh rak zuam tawn hna law kan i lawm tuk lai tiah ka chimh ve.  San a tlai sual ah tiin lung um cu ka chimh ve.

[tang] US Ambassador Derek Michell he an office hmai ah

February 12, 2015 Thursday: Kan hawi dang cheu khat cu USA lei ah tlung ding in duhherh an zal.  Kannih Thlang Lairam tlawn aa timmi cu a thar in kan i tim than.

[tang] Thlang Lairam tlawn aa timmi cu pali kan si.

A lai bik hi Rev. Yan Naung, AGS of Chin Baptist Convention a si.

An drivers Lian Lian le Hrete he Mandalay in an rak kan don.

February 13, 2015 Friday: Thlang Lairam tlawng ding in zing 6:00 am ah Mandalay ah kan zuang.  Upper Myanmar Baptist Association GS Rev. Simon Thawng Hmung le Lai Baptist Church upa hna nih Chin Baptist Convention AGS Rev. Yan Naung le drivers pahnih he an rak kan don.  LBC nih thaithawh, UMBA nih chawncaw an kan dangh.  Mandalay Nandaw le Siangbawi Judson thongtlaknak hmun, Ava khua an kan zohpi.  Judson lung catial cu Pu Saw Maung chan lio ah vawlei ah an phum i a um ti lo.  Cu hmun ah thingkung lian pipi an um.  Kawl tar pawl nih Khrihfa thingkung an ti.  An hau ngam lo.  Suanhtarhmi an ngeih caah an zuah ko hna.  Cu hnu ah Monywa ah ka riak.

[tang] Mandalay Nandaw ah LBC pastors le upa nih an kan lenpi

[tang] Lai Baptist Church biakinn sak lio mi a si.

Ngandam lo hna bawmhnak ministry an tuah chih.

Kanpalet, Mindat, Matupi le Rezua le Chak Lairam in damlo zualhma 

paoh cu Mandalay ah an phan.  Sibawi an panhpi hna.  Mithi tiang an

chiah thlah hna.  An biakinn le health ministry caah thlacampiak an herh taktak.

A kam inn te hi an innpa hna inn sak lio mi a si.

[tang] Siangbawi Adoniram Judson thongtlaknak thonginn hmun
Zal a beimi hi Chin Baptist Convention AGS Rev. Yan Naung a si.
Mi tha taktak le thinfual ngaimi a si.

[tang] Hi Lungphun hi President Saw Maung nih a phum ter mi hna cu a si.

A um ti lo.  Nikhat khat ah hmuh than a um te hnga maw?

February 14, 2015 Saturday: CBC AGS Rev. Yan Naung nih an mawtor pahnih in Kanpalet lei ah a kan kalpi.  Zanlei ni tlak lai ah Kanpalet khua kan phan. Chin National Day, Hakha ah a lam ding Kanpalet mino nih lamnak he an kan don. Hotel ah kan riak.  Zan ah pumhnak kan ngei. Dr. Roy Medley nih phung a chim.  Kei nih an biachim paoh cu Kawlholh in ka lehpiak.

February 15, 2015 Sunday: Zing ah Kanpalet Baptist Church ah pumhnak kan ngei hna.  Dr. Paul Aita nih phung a chim.  Chun hnu ah Victoria tlang ah kan kai.  Tlangbo ah Buddhist pura pakhat a um.  Khrihfami nih vailamtah phun ding in an hal hna nain, an sianh hna lo.  Inn (yayat) cu sak khawh a ti an ti.  Victoria tlangbo nak a niam deuhmi tlangbo pakhat a um rih.  Cu ka ah thing in vailamtah pathum an phun.  Victoria tlang cung ah Vailamtah cu bunh kho sehlaw a tha ngai ding a si.  Lairam caah Victoria tlangbo cungah kut sih in thla kan cam ti hna.  Zan ah pumhnak kan ngei than.  Dr. Roy Medley nih phung a chim.

ICBM nih Kanpalet Township Baptist Association zunginn a remh piak hna.  Ekinn thar te a sak piak hna.  Hlan ah Dr. Hla Aung, CACC GS tawlrelnak in CBCUSA le Melbourne Chin Church i bawm in Boarding School rak sak mi ah siangngakchia 40 an um.  CBCUSA nih a tuan cia tete hmuh ah tha a tho tuk.

 [tang] Victoria Tlang chip ah Dr. Roy Medley he

Tlang cung chawkhlei an par a en lio can a si.

On Mount Victoria

[tang] A niam deuh mi Victoria bo a si.  

[tang] Kan riahnak hotel a si. Kanpalet hi khua fa te a si ko nain,

Victoria tlang ah a kaimi tourist an um pah lengmang cang.  

Hotel hi an ngei ve cang.  

[tang] Siangbawi Rev. Ceih Kio thlan

Kanpalet Towship Baptist Association Office inn chak ah an phum.

[tang] ICBM nih sak lio mi Ohphaw biakinn

[tang] Biakinn ngeitu pastor.  ICBM missionary a si fawn.

[tang] ICBM missionary nu le field director he

February 16 Monday: Zing ah ICBM nih a sak lio mi Ohphaw biakinn kan va zoh.  Thaithawh kan ei hna.  Kanpalet Township Baptist Association Office ah kan ra than i cu ka cun Mindat lei ah kal kan i thawh.  An siangbawi Rev. Ceih Kio thlan cu dawh tein an office chak ah an tuah.  Thlang Lairam ah siangbawi a tuanmi hna thawng in kan i dawtnak cu a hlei deuh ngai in a lang.

Mindat cu tuan ah kan phan.  Mindat Baptist Church in upa le mino nih an kan don.  Zan ah biatawi chimnak cu kan dihlak nih kan ngei hna.  Dr. Roy Medley nih phung a chim.  Zan ah upa mi tlawm he ICBM riantuannak kong cu kan i ruah hna.  Kan riantuan duhnak cu ka chimh hna.  Mindat Township Baptist Association le local churches nih an peng chung ah Cho for Christ Mission [CCM] program in local missionaries 45 an thlah hna.  Zumtu thar zong an hmuh len hna.  Mindat hi Buddhist an tamnak a si.  Buddhist mission Nah Tah Lah nih a tei ngai hna.  Nah Tah Lah sianginn chuak cu cozah rian an pek hna.  BA/BSc a dihmi cu rian upa an pek hna.  Khrihfami rian hmuh a har tuk an ti.  Biaknak i thleidannak cu a um ngai.  Buddhist Mission nih khua kip ah rian an tuan caah khrihfami nih biatak chuah in riantuan kan herhnak a si.  Nah Tah Lah sianginn cu dawh ngai in an sak hna. 

[tang] Kanpalet in Saw, Magwe Division in Mindat ah kan kal.

Kawlrawn in Lairam luhnak ah "Warmly welcome to Chin State (Kawlca)" in

tialmi cu an sak cuahmah lio.

[tang] Mindat Baptist Church in Mindat Township Baptist Association hruainak in

donnak cu an tuah.  An thil thuam dawh te in mino tete kan hmuh hna.

Laimi cu thil thuam phung tam ngai kan ngei.  Kan rum. Kan i dawhnak a si.

[tang] Mindat Khua

[tang] Rev. Yaw Kee, GS of Mindat Township Baptist Association he

[tang] Mindat Mino midongtu hna

[tang] Zanriah dumtinak

Mindat nunphung ah upatmi khual lian ngeih ahcun ar pakhat cio pek a si.

Pakhat cio an kan pek.  Chungtuantu nih sa le buh kha kan kaa ah a kan tuh fawn.

Lai nunphung in tuahmi khokheng cu Khrih khokheng ah an cang cang hna.

Bawipa a tha tuk.

[tang] Mindat Baptist Church Donnak biachim khawh ah.

[tang] Kan kal zing ah rianttuan hawi tampi nih an kan thlah.

Lakphak ti kan ding ti hna.

[tang] Mindat i ICBM mission field Director le nupi he

[tang] Buddhist nih sakmi Nah Tah Lah sianginn, Mindat

Inn tha an sak.  Khrihfa ngakchia cu a lak tein an cawm hna, ca an cawnter hna.  

An lu an kola hna. An cawnpiak hna.  Buddhists ah an canter hna.  

Ca an on tikah rian tha an pek hna.

[tang] MTBA nih sak lio mi ngaktah inn

Buddhists pawl nih khrihfa ngakchia an lak dih sual hna lai tiah

hi bantuk in ngakchia cawmkennak cu tuah a hauh caah a vam hi mau in

an chawn mi hi an sak lio.  

Mindat Township Baptist Association nih ngakchia zohkhenhnak inn an sak lio ve.  Siangngakchia 60-70 an um kho te lai.  Bawmh tlak ngai ding a si.

Chin Baptist Association in North America (CBANA Falam) 

CBANA nih MKP [Mindat – Kanpalet – Paletwa] mission cu an tuah i field director pakhat cu Mindat ah an chiah ve.  Missionary 8 an thlah.  Chak Lairam in local churches pawl nih local missionaries cu tam ngai an thlah fawn hna.  Khrihfabu dangdang zong nih missionaries thlah in an tuan ve hna.  Kanmah ICBM field director he zong kan i tong ko.

February 17 Tuesday: Mindat in Matupi ah kan kal.  Matupi khua ahcun Association pathum komh in hlunghlai ngai in Dr. Roy Medley donnak an tuah.  Zan ah cultural evening tiin Lai lam he program an tuah.  Biatawi chim cio a si.

[tang] Matupi khua ah donnak cu sunglawi ngai in an tuah.

UTC siangngakchia nih Lecturer Saya Buan Thawng Lian [Ruakhua] 

phuahmi donnak hla an sak lio. Laksawng pek le thi awih nak hna an tuah.

[tang] Siangbawi Rev. & Mrs. That Dun hna nih Khrih Thawngtha an chimh hna 

ruang ah Matu ram cu a ceu.  Hi dirhmun ah an phan kho.  Khrihfa an si dih.

Siangbawi nupa hna cu an sunhsak tuk hna.  Hi ruang ah an kan dawt, kan dawt

ve hna.  Khrih le a dawtnak le velngeihnak thawngtha ruang ah.

An thlan ro cung ah pangpar kan va chiah hna.

Cultural Evening [Matupi Baptist Church]

Mindat in Matupi ram chung ah kan luh ah khuate pahnih ah Lai holh in kan i chawn kho i ka lau pah.  Zeitindah Lai holh nan thiam ka ti hna.  Kan cawn ve ko an ka ti.  Matupi ahcun Mirang kan hawi le biachim cu Lai holh tein kan leh khawh cang. 

Matupi i Union Theological College (UTC) ah kan leeng.  An sianginn cu CBCUSA nih 2007 in a bawmhnak kong zong a thar in mipi theih in an chim.  Matu Baptist Association nih kal lai zing ah donnak an tuah rih.  An siangbawi Rev. That Dun le a nupi thlan zong kan zoh hna.  An rak sunhsak tuk hna.

[tang] UTC le an Library

February 18 Wednesday: Matupi in Rezua ah kan kal.  Zotung Baptist Assocation nih hlunghlai ngai in donnak an rak tuah.  Zan ah pumhnak tuah a si.  Dr. Roy Medley nih phung a chim.  Kei nih Lai holh in ka leh.  Zotung area ah Lai holh thiam an rak um ngai ko.  An ngaktah cawmmi sin ah kan kal lai zing ah kan leeng hna.  Kan rak i thei lo ngai hna i a tu tan in cun CBCUSA kong cu theih hram an thok ve cang.

[tang] ZBA ngaktah inn

Ramdang khuasa Zotung unau hna nih an sakmi a si.

[tang] Ngaktah siangngakchia 20

[tang] Kal lai zing ah mi tampi an rak chuak.  Ngaktah sin ah kan leeng pah

Monywa ah riah thlak in kal kan herh caah 7:00 am in kan tho.

Zapi aiawh biachimtu nih kan fa le an rak kir than khawh nak ding ah kan bawm u a ti.

Lairam khuasa nu le pa nih an fa le an ngaihnak hna a fah khawh ning!

Kei nih USA in Rezua cu ni hnih ah phak khawh a si cang. Nan fa le hi lam hla pi ah

an um ti lo, nan kam te ah an um ko.  An rak in tlawng lengmang hna lai ka ti hna.

Upa pakhat nih kan hna a ngam tuk, nan kan chimhmi cu! a ti.

February 19 Thursday: Rezua in Gangaw in Monywa ah kan lut.  Lam pi ah Siatlai khua nih donnak an tuah.  Ramcci khua (Gangaw phak lai) ah Zotung Association of Baptist Churches nih donnak an rak tuah.  ZABC hi a thar deuh a si.  An office nih ti an ngei lo.  Thlacam piak an herh ngaimi an si.  Zotung he pehtlaihnak tha deuh in ngeih a herh ngai.  Puan sen le hni sen aa hruk bak mi an si.

[tang] 2010 kum ah Lairam dihlak ah inn 136 a rak kaang.  

CBCUSA nih bawmhnakkan rak tuah ve hna. Khua inn dihlak in 

a kaangmi khua kha a tang Lungkhin khua hia si.  Ramdang Laimi 

dihlak nih bawmhnak kan rak tuah hna. Kan pal lo nain

a lang in hman kan hei thlak.

[tang] Ruah lo in Siatlai khua nih donnak an rak tuah i kan i din.

Saitlai khua hi Lai khua te ahcun a tha cem ah ka chiah.  Inn 190 an um.

An inn lo a tha tuk.  Lai khuate hi chuah taak lo ahcun remh tal a hau hrim.

Khua dang pakhat ah an rak tuah ve nain, kan hngal lo in kan lanh taak hna.

A poi tuk ka ti.  Phone cu a tuan ti lo i thawng kan i thanh kho hna lo caah a si.

[tang] Lai khua kip le lam kam dawr ah din ding a phunphun an zuar ve cang.

A ho van hai lo kan si ve cang, Khrih thawng in.

Zotung Association of Baptist Churches [ZABC], Ramcci, Matupi Township

ZABC office hi Gangaw phak lai hmun rawn Matupi myone chung ah a um.  Khuate 17 ah khrihfabu 17 a ummi Baptist Association fate a si.  An office ah ti an ngei lo.  Ramcci khua ah ti a har ngai.  Tikhur cawhpiak an herh tuk.  Thlacampiak cio hna usih. Thawng theih cia lo in an rak kan don.  Zotung mino nih puansen le hnisen he donnak ZABC office inn hmai ah an lam.

Dr. Roy Medley le Zotun nungak he thingparsang lam cu kan van thok ve.

Gangaw Baptist Association nih chuncaw a kan chuan donh.  ICBM min in rian kan tuannak hmun a si.  Bawmhchanh haumi association fe te an si rih.  Ka camera an thi dih, video lawng in kan thlak. Tar ding a um kho lo.  GBA riantuantu upa le ministers le missinaries hna he tonnak cu kan ngei hna.  Dr. Roy Medley ni biatawi a chim.  Laiholh kan hmang ko.

Rezua in 7:00 am in kan i thawh i Monywa cu 10:30 pm ah kan phan. Mirang pawl hi Kanpalet lei kalnak le Kawlrawn then khat ah kan hmuh pah len hna. Kanpalet kan kal lio ah Yangon ah NGO riantuanmi American panga an rak ra ve.

[tang] Cohthuh ah Chin Baptist Convention mission field director (Matu) office ah

kan leeng duak.  Hi Kawlrawn ah missionary tam an thlah hna nain, ngatlaih a har tuk a ti.

Kawl phungchim thiam zong kan sawm hna i Kawl pawl cu an cawnpiak ko hna.  

A duh deng bantuk an lo nain, an kir than lengmang ko a ti.  Cun, Buddhists nih 

an kan rem lo.  Mi nih velh sual lai zong ralrin a hau a ti.

[tang] Tu run lawng hlah, tha tein khalh ahcun meheh run zong khalh khawh a si ve ko.

Caan lak deuh bel a hau ko lai.

February 20 Friday: Monywa ah Chindwin Mission Field upa hna he kan i tong hna.  Hi Chindwin Field ah CBANA nih rian an tuan.  Missoinary 32 an thlah.  Hall thar $50,000 an sak piak hna i USA lei in an upa pawl kha onnak tuah ding in an phan chom lai an ti.  Biatawi chimnak ka ngei ve.  Phaknak hmun paoh ah CBCUSA le ICBM kong cu ka chim.  Khrih bia bang kan miphun sin ah kan kal hmasa, hmailei ah Kawlram pumpi ceu ter ding in Bawipa rian kan tuan khawh can a um ve te lai tiah anmah rianttuannak lawmh pah in ka chim. 

[tang] Chindwin Mission Field (CBC nih tuanmi)

[tang] Pu Chin Hla Aung he.

Laimi cu hmun kip ah i manh lo ngai in Khrih rian kan tuan hna.

Bawipa sin ah kan pek tam paoh ah, Bawipa sin in a ra mi cu a tam ko lai.

Pathian nih a lak in mi thil aa lak bal lo.  A ngeihchun Fapa hmanh pei a kan pek cu!

Mandalay ah Lai Baptist Church nih chuncaw an kan pek.  Cu hnu ah Yangon ah kan rak zuang.  Kan khualtlawnnak cu Yangon Airport in kan donghter.

Bia donghnak:

Kan khualtlawn re a thei ngai ko nain, Pathian nih damnak a kan pek.  A min thiang ka thangthat. Thla a kan campiaktu CBCUSA zumtu nan dihlak cungah lunglawmhnak tampi ka ngei.  Mission rian kan tuanmi tete hmuh tikah keimah lawng hlah, ABCUSA upa pawl zong an tha a nuam tuk. Khrihfabu 92 tiang a kan petu cu Pathian a si.  Dr. Roy Medley le Dr. Paul Aita nih cun kan phaknak paoh ah Chin zumtu dihlak hi hi vawlei pi cung ah missionaries ah thlah nan si tiah an chim peng.  CBCUSA cu Khrih nih a hmanrua ah ser chin ko seh!  Thluachuah pe ko seh

Bawi Khrih rian ah,

C Duh Kam, EM

CBCUSA