CHRISTMAS 2014

Tu kum 2014 Christmas hi cu a hlei khun in 

conglawmh tlaak Christmas a si.  

Vawlei Ralpi I cu July 28, 1914 ni ah Europe ram laifang in aa thok.  Khat lei ah United Kingdom (England), France le Russia cu an ttang.  A hnu ah Italy, Japan le US nih an bawmh ve hna.  Khat lei ah Germany, Austria le Hungary an ttang.  A hnu ah Ottoman Empire (Turkey) le Bulgaria nih an bawmh ve hna.
November 11, 1918 ni ah an hngawl.  Hi Vawlei Ralpi I chung ah ralkap million 9 le mi sawhsawh million 7 an rak thi.  

1903 kum ah Dayton, Ohio ah unau hna Orville Wright le Wilbur Wright nih vanlawmg ser an thok.  An thiamnak cu ram dangdang nih an lak cio i ralkahnak vanlawng cu an ser hna.  Kum 10 a rauh tikah Vawlei Ralpi I cu a tho i vanlawng in an i tu kho manh.   Million tampi thihnak tiang a chuak.

Hi tluk ralpi aa thok in thla nga chung an luh ah December 25, 1914 Christmas Ni cu an phan.  Christmas Ni hman lo cu an ruat kho lo.  Kap hnih in an meithal an chiah, Christmas hla an sa tti hna.  Laksawng an i thleng hna.  Bawlung chuih hna an i zuam hna.  Christmas Ni a dih cun an raltuknak khur chung ah an bawk than hna.  Meithal aw cu van khua phawk in a tur tthan.

Tutum Christmas 2014 hi Vawlei Ralpi I daihtertu Christmas kum 100 a tlinnak a si.  Vawlei tuanbia nih a kan chimhmi Christmas Ni a sunlawinak cu hngalh cio tlak taktak a si.  "A sang bik van ahkhin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh," tiin sakmi vancung ralkapbu hna hlaremh nih Vawlei Ralpi I lio Christmas Ni cu meithal puah a daih ter khawh ti ko hna usih.

Hi Christmas nih kan nunnak cio ah zeital a daih ter khawh mi a um maw?  A um cio ko lai.  Ruah setmat ahcun.  Kan ruah lio hrimhrim ah kan thinlung thlarau ah Khrih cu aa phuang kho ko. 

Vawlei pi hi kumhrabu pakhat chung ah tamtuk aa thleng kho.  Kannih Chin miphun hmanh hi kan i thleng tuk manh.  Pathian thawng in Khrihfa biaknak buu hrimhrim hi kan i thlen ning a rang tuk.  AD 2000 hnu i kan i thlenning hi cu kannih caah cun Pathian khuaruahhar thilser a si ko. Lairam le ramdang Chinmi kan umnak ah Pathian kutneh lawng te!

Hmailei AD 2025 le 205o ahhin kannih Chin miphun hi zeidek kan va lawh te hnga?  Bethlehem cawrawl kuang chung ah thlimmi Khrih hi fek tein kan i bochan i A rian kan ttuan ahcun vawlei pi cung ah theih khawh mi miphun le minung zong kan si kho ve te ko lai.  Bawipa hi bochan i a ttihzahmi si ko hna usih.  

Christmas lawmhnak nan chungkhar le pumpak cio ah tlung ko seh!


Bawi Khrih rian thiang ah,

C Duh Kam
Indianapolis, Indiana

Christmas 2014 le Kum Thar 2015

"Ka caan cu na kut chung ah a um dih, ka ral hna kut chung in ka khamh law a ka hremtu hna kut chung in ka khamh tuah.  Kei cu na sal ka si, ka cung ah zangfaahnak ngei ko, a fekmi na dawtnak ruang ah ka khamh ko" (Salm 31:15-16)..

Ni kum 2013 Christmas le Kum Thar ah kan nunnak cu Bawipa kut chung ah kan ap cio hna.  Kan nunnak kong cu a ho hmanh nih chim khawh si hlah kaw, Bawipa kut chung ah dah lo cu himnak dang a um lo tiah kan zumh caah Bawipa cu kan fuh cio hna.

1) Kum 2014 chung kan nunnak lamtluan cio ah kan lung a tling maw?

2) Lungretheihnak phurh rit kan ngei sual maw?

3) Kan rianttuannak le pawcawmnak caah lungrethei in kan um caan a um sual maw?

4) Kan lungput that lo ruang ah mi dang lung kan fah ter sual maw?

5) Kan biachim le holh rel in mi lung kan fah ter sual hna maw?

USA ah khuasak hi a harnak tampi a um ko.  A bik in, holh thiam ve lo in chungkhar kan dam lo can i sibawi sin kal a herh can le social office te hna ah kal kan herh can le rian hna kawl kan hauh tik i bawmtu nan herh can ahcun nan lung re a thei ko lai.  Mi dang bawmh hal hau in um cu a har ngaingai in ka ruah ve mi a si.  Mah nunnak ah a harnak vialte cu mah nih theih cio a si.  Thih loh nak tiang phan lo tein Pathian nih a tu bantuk Christmas can le Kum Thar 2015 hna phan kho ding in lam a hruai mi ahcun lawmh lo awk kan tha lo.  

Siangpahrang David zong kha min thang tuk a si nain, huatu ral tampi a ngei.  Amah nih a tuah sualmi ruang ah seseh, Siangpahrang Saul le a tlawngbawi le amah fa le lila nih an ral ruang ah lungretheihnak fak pi in a ngei ve. Hi bantuk in a lungretheih lio ah David nih Pathian sin ah "Ka caan cu na kut chung ah a um dih" tiin a rak i hnem.  A ral hna kut chung in khamhnak kha a hal ve.

Vawlei cung nunnak minung kan chan hi can tawi te lawng a si.  Minung kan rawl mi vawlei rumnak nih hnangamnak a kan pe taktak lo.  Can tawi nuamhnak lawng an si.  Bawipa thluachuah an si ti hngalh lo ahcun A thluachuah kan co mi hmanh nih lungretheihnak hmanh a chuahpi khawh leh lam.  Jerusalem biakinn pi chung ah Vanbawi Messiah ton lai a hngak i a taktak in semmawng Jesuh a pomtu mithiang pa Semeon bantuk in "hmuh mi ah aa lawm kho mi" hi vawlei cung ah mi van ttha bik an si.

Christmas Caan cu Pathian nih misual mi kan sin ah Fapa sinak in pumsa in Aa peknak a si.   A chuahnak caah Bethlehem cawinn aa thim.  A thihnak caah Kalvary Vailamtah cu aa thim.  Pathian khuakhan ning ngai hi!  Ruah phak khawh awk in a um lo.  

Kum khat chung ah damnak in he lam a kan hruai i thluachuah a kan petu Pathian sin ah lawmhnak chim ve lo in 2014 kum le Christmas hi liam ter sawh hlah usih.  Chehhra cheukhat hna pe lo in um sual hlah usih.  Kan pek lo ahcun Pathian sin ah 2015 caah thluachuah hal a har tuk lai.  Bawipa hmai kan khaap lai lo.

CHEUHRA CHEUKHAT [TITHE]

Bawipa nih "Cheuhra cheukhat . . . cu Bawipa ta a si; Bawipa ca i a thiangmi a si" a ti (Levitikas 27:30).  "Cheuhra cheukhat cu thawlawm inn ah rak pu dih u" a kan ti (Malakhi 3:10).

Thawhlawm a pe lo mi kha "Pathian nih minung cu hlen awk a si hnga maw? . . . nan cheuhra cheukhat le thawhlawm in nan ka deh a si lo maw?" a kan ti (Malakhi 3:8).  Mirang Bible nih cun "Minung nih Pathian cu ramh (fir) awk a si maw?" a ti.  Cheuhra cheukhat kan pek lo ahhin Pathian nih a inn le lo ramh le fir in Aa ruah.  

"Ka hneksak tuah ngat u (Test me in this), van innka cu kan hun piak hna le hun piak hna lo; thluachuah vanluhnak cu kan thlet hnawh hna le hnawh hna lo zoh tuah ngat u," tiah ralkapbu Bawipa nih a kan ti (Malakhi 3:10b).

"Cheuhra cheukhat cu thawhlawm inn ah rak pu dih u" a kan ti (Malakhi 3:10a). 

Hi cheuhra cheukhat cu 1) missionary cawmnak,  2) mission rianttuannak,  3) Bible sianginn kaimi bawmhnak le 4) zumhnak thlaici tuhnak ding ah hman a kan sianh lo.  Keimah ta, thawhlawm inn ah rak pu dih u a kan ti.  

Christmas cu Bawipa nih kan sin ah A pek can, kannih nih Bawipa sin ah kan i pek caan a si.

Christmas thluachuah cu nan chungkhar cio ah tlung ko seh!

Silent Night, Holy Night!

Kelly Clarkson - Silent Night ft. Trisha Yearwood, Reba McEntire

Bawi Khrih rian ah,

C Duh Kam, EM

CBCUSA

********************************************

Kum Thar 2015 kan lut cang lai, CBCUSA Civui, June 5-7, 2015 cu Zophei Christian Church, Indianapolis, IN nih an kan donpiak lai.  

[tang] CBCUSA 4nak Civui, 

Chin Evangelical Baptist Church, Indianpolis, IN

BM meeting tuah lio.

 CBCUSA Mino 500 Halleluijah Chorus

Kan putar Rev. Sang Cem, Lawngtlai hi a upa ngai cang.

Laimi nih an i bochanmi a si.

ICBM MISSIONARY TRAINING, MAYMYO 

Khrih Khamhnak Thawngtha a thei rih lo mi Thlang Lairam kan unau hna sin ah thlahmi missionaries hna training cu Maymyo ah an tuah lio a si.  Thla cam piak hna usih.

[cung] Rev. Timothy Pa Hrang nih mission rianttuan kong ah tehte a khan lio.

A THLUM DECEMBER CHUNG AH KAN LUT THAN CANG

Kum khat chung ah kan hngahhlang bik mi Christmas ni le thla chung ah kan lut cang.  Ni le can cu can dang he a khat ko.  Nain, a thlum bik dawtnak a ngeitu Pathian Fapa Van Bawi Messiah nih nangmah le keimah khamhnak ser awk caah nauta bik Bethlemhem cawinn hmun hi i thim in a chuah caah cu dawtnak nih kan thinlung le thlarau a thlum ter hlei ah a ni le caan zong hi a thlum khunnak a si.

Christmas kan ti can ahhin Lairam theu kha kan thinlung ah a cuang.  Bethlehem cawinn hi Lairam dirhmun nih a tlinh bik ko.  Sifak santlai lo nangmang le keimah le a kan hringsortu nu le pa hna dirhmun nih a tlinh bik  ko rua lai.  

Lairam Hakha khua ah Khrih Thawngtha he a rak phan i mitthli le hnap duk he aa ciahmi Siangbawinu Laura Carson kha Lairam Christmas a tah kan ti ko lai.  Kan Lairam cawinn kha a tah kan ti ko lai.  Hi cawinn hi Khrih nih a chuahnak hmun ah aa thim ve ko.  Santlai lo nang le kei kan cawinn te ah lunglawm tein a chuak ko.  A sunglawi tuk.  Bawipa cu thangtha ko seh!

Khrih cu a nu le pa nih Siangpahrang Herod tih ruang ah Izip ram ah ralzaam dirhmun in an zampi.  Bethlehem cawinn le ralzaam dirhmun cu aa tthen kho lo.  Nauta bik dirhmun cu Pathian nih a cawisan.  Kum 100 cuang Khrih he kan kal hnu ah "Laimi le vailam then kho lo" ti dirhmun ah kan phan.

Bawipa Pathian hi lawmh lo awk kan tha lo.  A kan dawt tuk hme hi!  A dawtnak cu a thlum tuk hme hi!  Na caah "a thlum December!"