CHRISTMAS 2014

Tu kum 2014 Christmas hi cu a hlei khun in 

conglawmh tlaak Christmas a si.  

Vawlei Ralpi I cu July 28, 1914 ni ah Europe ram laifang in aa thok.  Khat lei ah United Kingdom (England), France le Russia cu an ttang.  A hnu ah Italy, Japan le US nih an bawmh ve hna.  Khat lei ah Germany, Austria le Hungary an ttang.  A hnu ah Ottoman Empire (Turkey) le Bulgaria nih an bawmh ve hna.
November 11, 1918 ni ah an hngawl.  Hi Vawlei Ralpi I chung ah ralkap million 9 le mi sawhsawh million 7 an rak thi.  

1903 kum ah Dayton, Ohio ah unau hna Orville Wright le Wilbur Wright nih vanlawmg ser an thok.  An thiamnak cu ram dangdang nih an lak cio i ralkahnak vanlawng cu an ser hna.  Kum 10 a rauh tikah Vawlei Ralpi I cu a tho i vanlawng in an i tu kho manh.   Million tampi thihnak tiang a chuak.

Hi tluk ralpi aa thok in thla nga chung an luh ah December 25, 1914 Christmas Ni cu an phan.  Christmas Ni hman lo cu an ruat kho lo.  Kap hnih in an meithal an chiah, Christmas hla an sa tti hna.  Laksawng an i thleng hna.  Bawlung chuih hna an i zuam hna.  Christmas Ni a dih cun an raltuknak khur chung ah an bawk than hna.  Meithal aw cu van khua phawk in a tur tthan.

Tutum Christmas 2014 hi Vawlei Ralpi I daihtertu Christmas kum 100 a tlinnak a si.  Vawlei tuanbia nih a kan chimhmi Christmas Ni a sunlawinak cu hngalh cio tlak taktak a si.  "A sang bik van ahkhin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh," tiin sakmi vancung ralkapbu hna hlaremh nih Vawlei Ralpi I lio Christmas Ni cu meithal puah a daih ter khawh ti ko hna usih.

Hi Christmas nih kan nunnak cio ah zeital a daih ter khawh mi a um maw?  A um cio ko lai.  Ruah setmat ahcun.  Kan ruah lio hrimhrim ah kan thinlung thlarau ah Khrih cu aa phuang kho ko. 

Vawlei pi hi kumhrabu pakhat chung ah tamtuk aa thleng kho.  Kannih Chin miphun hmanh hi kan i thleng tuk manh.  Pathian thawng in Khrihfa biaknak buu hrimhrim hi kan i thlen ning a rang tuk.  AD 2000 hnu i kan i thlenning hi cu kannih caah cun Pathian khuaruahhar thilser a si ko. Lairam le ramdang Chinmi kan umnak ah Pathian kutneh lawng te!

Hmailei AD 2025 le 205o ahhin kannih Chin miphun hi zeidek kan va lawh te hnga?  Bethlehem cawrawl kuang chung ah thlimmi Khrih hi fek tein kan i bochan i A rian kan ttuan ahcun vawlei pi cung ah theih khawh mi miphun le minung zong kan si kho ve te ko lai.  Bawipa hi bochan i a ttihzahmi si ko hna usih.  

Christmas lawmhnak nan chungkhar le pumpak cio ah tlung ko seh!


Bawi Khrih rian thiang ah,

C Duh Kam
Indianapolis, Indiana