Bawipa Thangthat

Sunday, July 14, 2013


ICBM REVIVAL GROUPS AN THO CANG
July 14, 2013

(1) DC AREA in ICBM Revival Group
Zophei Christian Church, Indy ah

(2) Dallas Area in ICBM Revival Group
Chin Christian Church, Indy ah
USA ram chung ah CBCUSA Revival Groups hna nih an aupi cang.  Thal chung ah
khrihfabu len khawh an i zuam hna.  CBCUSA pastors te he an kal ti hna lai.

      
                   [cung] Lg. Monica UK


 [cung] Thawng Bawi nih hla fung hnih

 [cung] Tv. Sailo Thang tehtekhan

[cung] ZCC Choir (pa an lang kho deuh lo) 

 [cung] DC area ICBM Group Song
[cung] Phungchim: Dr. Henry Siang Kung, Principal of CCC, Hakha
 Dallas Area in ICBM Revival Group
Chin Christian Church, Indy ah
Phungchim
Rev. Khen Sang
Pastor of Bethel Baptist Church
Dallas, Texas

Misual kan caah Khrih tuarnak le mualphonak Kalvary Vailamtah
Thawngtha cu phuan le aupi a si cang. Bawipa min hlorh
chin in um ko seh!

Mission rianttuannak cu Khrihfabu nih aa nunpi taktak ahcun khrihfabu thanchonak a si.  Thlarau tlaumi hna tlaihnak caah kan ngeihmi chaw kan pek tikah hliam a tuarmi thlarau
khamhnak caah a si tiin kan zumh khawh lo ahcun sunghbaunak ah kan rel ko lai.
Nain, Pathian sin ah kan pekmi hi kan sung lo.  Pathian sin ah chaw kan lehnak tu a si deuh.  "Ka hneksak tuah ngat u" (Malikhi 3:10) tiah A kan titu Pathian bia cu a hman zungzal.
Kan thlarau lawmhnak caah kan tuah ding rian cu thlarau tlaumi tlaih hi a si. 



ICBM PATHIAN SIN PEKCHANHNAK








Khrih ah Hawikom Dawt hna,



Bawi Khrih min in nan kut kan tlaih hna.  ICBM rian kan tuan ning kong tlawmpal te thanh kan duh hna.



A min thlennak kong:
CCOC Second Round kan rak timi kha International Chin Baptist Mission (ICBM) tiah kan thlennak kong cu thawng kan thanh cang hna.  A cheu khat caah cun CCOC ti hi kan thinlung ah a cam tuk cangmi a si caah, a min thlen hi nan lung a fak ngai lai ti zong hi kan ruah ciami a si.  Sihmanhsehlaw, a min kan thlen ah hin Laitlang lei i ZBC kan rak timi Chin Baptist Convention (CBC) he rian kan tuannak ah a rem deuh ding a si caah ICBM Central Committee zong nih a min thlen hi kan lung a tling set lo na in, ICBM tiah kan thlen ko.  Rak kan ruat thiam hram u tiah Bawi Khrih min in kan in nawl hna.



Rian Domhnak Kong:
ICBM hi kan hnu 2013 March i Chin Baptist Convention (CBC) Triennial Meeting khawh in cun rian kan domh khawh rua lai tiah kan rak ruat na in, Triennial nih blessing pek tiang lawng an caih manh i a tuan ning cang an caih manh lo caah March thla in kan thok kho lo. CBC OC he June 8, 2013 i meeting kan thut hnu lawng ah Kanpalet, Mindat, Paletwa, le Gangaw peng ah zalong te i riantuan ding le a herh mi a um ah siseh, har nak kan ton ah siseh, CBC nih dirkamh ding in lungrual nak kan ngeih hnu ah, July 1, 2013 in riantuan kan thok cang.



Pathian sin ah ICBM pekchanhnak:
July 14 Zarhpizing pumh ah Kanpalet, Mindat, Paletwa, le Gangaw Town Churches ah ICBM cu Pathian sin ah pekchanhnak an tuah hna.  Kannih CBCUSA zong nih July 13 Zarhteni zannlei ah CEBC, Indy ah ICBM Pathian sin pekchanhnak cu kan tuah ve. Rev. Thawngling Mualhlun nih Chairman a tuan.  Rev. Dr. Stephen Hre Kio nh phung a chim.  Rev. Ngun Thawng Mang (CBC-GS), Rev. Thawng Kam (CBC-President), le Rev. C Duh Kam (EM - CBCUSA) hna nih biatawi chimnak an kan ngeihpiak.  Kawlram lei in hlasak thiam Thawng Bawi le, Moe Moe, Mizoram in Mimi Varte hna nih Pathian an thangthat.



Revival Group:
CBCUSA Mino Coordinator Saya Ronald Charles Nunuk hruainak in ICBM Revival Group le Pastor te hna cu an vak cuahmah cang.  ICBM kong le kan ram ah Pathian thawngtha kan chimnak kong an rak in thanh hna lai.  An phanh caan, aho dah a ra lai, Pastor nih an zul kho lai maw ti bantuk theih nan duhmi a um ah cun, Saya Ronald Charles sin ah hal khawh a si.



Missionaries kan thlahmi hna kong:
Paletwa peng ah missionary 16, Kanpalet ah 10, Mindat ah 5 le Gangaw peng ah 2, missionary dihlak 33 hna cu July 01, 2013 thok in ICBM min in kan ram ah Pathian thawng tha an chim cuahmah cang.  Kanpalet peng i kan Field Director a min cu Saya Paing Bo ti a si i, ZTC tiah kan rak timi Chin Christian Institute of Theology (CCIT) in M.Div. degree a hmu mi a si.  Gangaw peng ah Field Director a tuanmi cu Rev. Tial Kem a si i, Sungsi khuami a si.  CCC in Diploma in Theology degree a hmumi a si.  Missionary pakhat an lahkhah hi kawlram phaisa in Kyats 120,000/- a si i, Field Director pakhat i a lahkhah cu Kyats 150,000/- a si.



Paletwa le Mindat peng ah Field Director kan ngei kho rih hna lo.  October thla ah Association Executive Committee meeting an tuah lai i, cu ah cun ICBM Committee he Field Director he an thim te hna lai. Paletwa Baptist Association, Kanpalet Township Baptist Association, Mindat Township Baptist Association, Simitlang Baptist Association, le Gangaw Baptist Association i an General Secretary lahkhah zong Field Director lahkhah zat in karh dih an si i, Association zung ah rian a tuanmi minister (pastor) te dihlak zong GS lahkhah pekning he i zohchih in an lahkhah kan karh piak cio dih hna.



Hi missionary 33 le Field Director hna i an tuanbia tawi (Short Biography) le an passport size hmanthlak vialte cu kan Ngunkeng sin ah kan chiah cang i, Khrihfabu le pumpak in missionary cawm a duhmi hna sin ah kan in kuat te hna lai.  Thla thlum vawikhat in report an tial lai i, September thla dih an report tialmi cu October thla ah, Rangoon i contact-person kan ngeihmi nih a rak khomh lai i, November thla ah nanmah le nan Khrihfabu cio ah kuat khawh kan in zuam hna lai.



ICBM Central Committee (July 12, 2013) biakhiahnak bantuk in Paletwa khua ah ICBM Headquarter cawkding in kan hna a tla i, a man cu Kyats sing 500 hrawng a si te lai tiah kan zumh. ICBM Myanmar Director ca ah Rev. M Thawng Kam kan thim i, atu hi US a um lio a si caah, Kawlram a tlun hnu ah a Khrihfabu he hnatlak nak an tuah dih in rian a ot cang lai.  Atu lio Rangoon i kan contact person cu Saya Za Uk Sang (Assistant Pastor, Lai Baptist Church, Yangon) a si i, amah hi tleicia Rev. Sang Awr i a fapa hniang a si.



Training Kong:
Missionary 33 le Field Director 4 hna caah November 18 in 30 tiang Rangoon ah training kan ngei lai i, Chin Baptist Convention GS, Saya Stanley Cung (Lecturer, MIT), Saya Nyan Lyin (Phungki in Khrihfa ah a thlengmi) hna nih an cawnpiak hna lai.  US in Rev. Zammang Mualcin le Rev. Cung Lian Hup zong hi training i cawnpiak tu ding ah an tlung ve lai.



Thawhvo Kong:
CBCUSA Board of Trustees nih March thla ah Amarillo, Texas ah hnatlaknak kan ngeih cang bantuk in, 2013 chung ah hin member pakhat cio nih $25 thawh ding tiah kan timi chung in a tu tiang a thawh cangmi Khrihfabu cu a tanglei bantuk in an si.



1. Amarillo Chin Christian Church, Amarillo, TX                    
2. Bethel Baptist Church of Texas, TX                                
3. Chin Baptist Church, Des Mones, IA                                
4. Chin Christian Church of Houston, TX                             
5. Chin Evangelical Baptist Church, Omaha, NE                  
6. First Chin Baptist Church, New Bern, NC                          
7. Kansas Chin Baptist Church, Kansas City, KS                 
8. Lai Baptist Church, Buffalo, NY                                        
9. Monmouth Chin Christian Church, Monmouth, IL               
10. Oklahoma Chin Baptist Church, OK                                
11. Philadelphia Chin Baptist Church, PA                             



Pumpak in a thawhmi cazin tu cu kan tial ti lai lo.  Treasurer nih cazin a chuah cangmi a si i, a hnu tu ah kan van langhter than te lai.  Tukum 2013 chung ah thawhvo thawhding kan i thiah mi zong thawh khawh ding in i zuam cio hna u sih.



Biadonghnak:
Mission rian hi kan i hmaithlak taktak ah cun caan tawi te ca a si hrimhrim lo.  Bianabia pakhat in van chim ah cun, Thantlang Baptist Church nih Rakhine ram Aan khua ah mission rian kum 20 chung an tuan hnu lawng ah Khrihfabu fek te in an dir i, Rakhine Association zong tampi an bawmh khawh hna.  Cu bantuk thiamthiam in kan nih zong biatak te in kum saupi kan tuan a hau ko lai.  Kan holh ah "Pasal ka biar ka phoih vekvek ah cun," ti a um i, Pathian thawngtha kan chimnak ah kan biar kan i phoih vekvek ah cun thlan chuak tiang in kan tuan a hua ko lai.  Mithiang Paul nih, "Zeitintiah Thawngtha cu ka Zahpi Lo," tiah a rak ti bantuk in, kan nih zong Thawngtha hi zahpi lo in kan tuan khawhnak hnga i zuam cio hna u sih.



Bawi Khrih ah nan riantuan hawi,




Cung Lian Hup
Director (ICBM)

No comments:

Post a Comment