International Chin Baptist Mission (ICBM)

by Dr. Cung Lian Hup, Director

Dear CBC USA a dawtu Khrihfabu vialte,

July 6, 2012 i Indianapolis i kan rak tuahmi CBCUSA Board of Management nih kan Laitlang ah Bawipa thawngtha kha a thar in chimthan ding in minung 16 kha rian khinh a rak si.  Cu Committee cu Dallas ah meeting kan tuah i, Rev. Dr. Hre Kio nih kan rian tuannak a min hi, International Chin Baptist Mission (ICBM) tiah auh siseh a ti ko na in, Committeee member hna nih, kan ram riantuannak a si ko caah CCOC Second Round Mission (CCOC-2RM) tiah auh siseh tiah hnatlaknak kan rak ngei.

Cu hnuah Kansas City ah meetig kan tuah than i Kawlram i a ummi Chin Baptist Convention (CBC) he hmunkhat riantuan khawhnak ding ah CBC Upa va tong ding in Rev. Dr. Stephen Hre Kio le Rev. Ngun Awi kan fial hna i, cu upa pahnih cu kawlram ah an va tlung i CBC Upa he an va tong.  A zeidang cu a poi tuk ah an chia lo na in, a min hi CCOC Follow-up Mission tiah let ding in an rak caih i cu ti cun kan let than.

Cu hnuah kan Committee cu Indianapolis ah meeting kan tuah than.  CBC nih riantuan ti ding hi an duh lo sual ah cun CACC he kan tuan ti lai tiah kan caih i, cu kong cu Marh 09, 2013 i Amarillo ah kan tuahmi CBCUSA Board of Trustees nih fak ngai in an hnatlak lonak an langhter.  Cu pin ah Khrihfabu cheukhat nih cun CBC he tuan ti lo ding ah cun CCOC Follow-up Mission hi ngol ding a si ti in ruahnak a chuah mi zong an um len.

Keimah cu March 23, 2013 ah CBC General Meeting (Carson Memorial Church, Kalemyo) ah CBC he rian tuan ti kan duhnak kong ka va chim i, CBC General Meeting pi nih tuanti ding in lunglawm te in an kan co hlan.  A min belte hi thleng kho u law a tha tiah ruahnak an kan pek caah, CCOC Follow-up Mission Committee cu Dallas ah meeting kan thu than i, kan riantuannak a min cu a hramthok Rev. Dr. Stephen Hre Kio tining te in International Chin Baptist Mission (ICBM) tiah kan thlen than.

June 08, 2013 ah CBC Officer Council Upa dihlak, Falam Baptist Association GS, Thantlang Association of Baptist Churches GS, Lairawn Baptist Association GS, Rangoon in Rev. Robert Thawng Hlei, Rev. Thang Tin Sum, Rev. Mike Zung Ceu, Rev. Sawi Kung, Rev. Thla Uk, Simitlang GS, Mindat, Kanpalet, Paletwa, le Gangaw in delegates hna he meeting kan tuah i, "ICBM nih kan Laitlang ah rian a tuan dingmi cu lunglawm te in kan cohlan i, an herhnak poah ah bawmh siseh," tiah CBC le Mission Fields upa vialte nih biakhiahnak an tuah hnu ah, July 2013 in rian thok ding in hna tlak nak kan ngei.

Cucaah, nai June 05 in 23 tiang kawlram ah ka va cam i, mission rian thok khawhnak ding ah timhlamhnak ka va tuah.  Paletwa khua tiang zong ka va tlawng i, Paletwa peng a ummi Khrihfabu Upa hna he nikhat chung meeting kan va tuah.  A tu tiang ah cun, Paletwa peng ah missionary 15, Kanpalet peng ah 10, Mindat peng ah 5 le, Gangaw peng ah 2 hna cu July thla i riantuan ot kho ding in hnatlak nak kan ngei i, July thla dih ah an thla hlawh zong chuah piak khawh ding in kan tawlrel dih cang.

Paletwa le Mindat hi Field Director an i thim kho rih lo.  EC an thut tik ah an i thim te lai.  Kanpalet peng Field Director cu Saya Paing Bo a si i, Chin Christian Institute of Theology (ZTC) in M.Div.degree a hmumi a si.  Gangaw Field Director cu Sungsi khuami Rev. Tial Kem a si.  Mindat le Paletwa Field Director an thim khawh hlan chung cu GS pawl nih Field Director rian kha tuanvo an lak chung lai.

A ralaimi July 13 ah hin, kanmah Central Committee zong nih ICBM Pathian sin pekchnahnak program cu Indianapolis CEBC biakinn ah kan tuah lai i, cu ka ah cun CBC, CACC, CCC in khual lian kan ngeihmi hna le, kawlram lei a rami khual pawl zong kan sawm hna lai.  ICBM cu Pathian sin ah pek chanhnak kan ngeih hnu ah CBCUSA Mino hruainak in Revival Group nih kan Khrihfabu chung in kan phak khawh tawk Khrihfabu hna sinah forhfial nak hong tuah ding in timhlamhnak kan ngei.  Kan program cu Saya Ronald Charles Nunuk nih an thanh te hna lai.

ICBM Pathian sin pek chanhnak hi July 14 Zarhpini ah Paletwa, Mindat, Kanpalet le Gangaw Town Churches ah an rak tuah ve lai.  Kan nih CBCUSA cu July 13 Zarhteni ah tuah a si lai i, Rev. Dr. Stephen Hre Kio nih phung a chim lai.  Rev. Thawngling Mualhlun nih Chairman a tuan lai i, CBC lei upa zong nih biachimnak an ngei te lai.

ICBM cu July in kan thok cang ko lai caah, kan rian tuannak thawng pang hi a herh ning in thanh khawh kan in zuam hna lai.  Nan thlacamnak kan herh hringhran ko.  Kan riantuannak ah Pathian a tel lo ah cun pakpalawng a si lai caah, ICBM hi Pathian nih thlua a chuahmi a si khawhnak hnga thlacamnak in rak kan bawm cio u tiah kan nawl hna.

Nan riantuan hawi,

Cung Lian Hup

Director