CBCUSA Thawngthanhnak (May 07, 2013)

 

Pathian lamhruainak thawng in CBCUSA ram chung ah lunglawmhnak thawng ttha kan ngei pah lengmang i Bawipa Pathian min kan thangtthat.

 

1) Monmouth Chin Christian Church, Monmouth, IL nih nizan May 6, 2013 ni ah tthutdan 200 a ummi biakinn a kan cawkpiak.  Lunglawmhnak in kut bengh piak hna usih.  An biakinn cu basement ah fellowship hall a um.  Biakinn luh thlacamnak cu June 30, 2013 Sunday ah tuah a si lai. MCCC zumtu dihlak 140-150 an si.  An pastor cu Pastor Ni Ceu a si.  Pathian sin ah lawmhnak chim piak hna usih. 

 

2) American Baptist Churches USA Judson 200 kum tlinnak Jubilee cu Kansas City, Kansas ah June 21 - 23, 2013 ah tuah a si lai.  Burma ram ah a hmasabik American Baptist siangbawi Rev. Judson te nu le pa hna cu July 13, 1813 ni ah Khrih Thawngttha he Rangoon khua an phan.  Khrih Thawngttha an chim.  Harnak tampi an tuar.  A fakbikmi nuva ttang tthennak tiang an tong.  Siangbawinu Ann Judson cu Pathian rian an ttuannak kum 13nak October 24, 1827 ni ah siangbawipa khual a tlawn kar ah a thi.  Kum 37 lawng a si rih.  A fanu te Maria a rohtaak.  Siangbawi pa le a fanu Maria lawng lileng ngai in Ann nih a sakmi nan mau inn fate ahcun an um.  Maria zong April 24, 1927 ni ah a thi ve. Siangbawipa ngaihchiatnak nih chum bang in a zelh.  Khrih thawngttha caah an nunnak an pek bantuk in Burma ram cu Khrih thawngttha nih a ceuter. 

 

Adoniram le Ann hna an rianttuannak cu July 13, 2013 ni hi kum 200 a tlinnak a si.  December 13-15, 2013 ni ah Yangon ah sunglawi ngai in Pathian thangtthat an i tiim.  ABCUSA nih Kansas City, Kansas ah tuah an timh ve.  Hi ni sunglawi June 22, 2013 Saturday ni ah Burma ram in a rami zumtu hna chung in Chin Baptist Churches USA mino 200 le Karen Baptist Churches USA zumtu 200 nih hla dawh in Pathian an thangtthat lai.  Kawlram mi zumtu dihlak komh in minung 30 nih hlaremh an sak ve lai. Hi 30 chung ah kanmah Chinmi panga an i tel ve lai.  Hi ni sunglawi ah tel khawh zuam cio hna usih.  A tel ding paoh nih registration kan in kuat mi hna kha tlamtling tein tuah zuam hna usih. 

 

3) Hi ABCUSA civui hlan deuh June 18 -20, 2013 ah ABCUSA Board of General Ministries (BGM) zong meeting kan tthu ve lai.  Hi meeting ah kanmah response group ah cattial le bia in ABCUSA ah pehtlaihnak tuah ding in BT biakhiahnak kha ka chimh hna lai.  Pathian nih a ttha a tining in lam kan hruai ko seh.  Thlacam cio hna usih.

 

4) CCOC Follow-up Mission Council Meeting

Texas Chin Baptist Church, Dallas, Texas; May 17, 2013 Friday ah tuah a si lai.  Thla kan campiak cio u.

 

CBCUSA nih CCOC Follow-up Mission ttuan ding in aa timhmi cu Pathian nih thluachuah a pek ti a lang chin lengmang.  USA ah khuasa Chin zumtu hna lawng si lo in, Lairam le ramdang Chin khrihfabu le zumtu hna zong nih tel an duhnak a lang ko cang.  USA le ramdang ah CBCUSA chungtel khrihfabu hna le chungtel a si rih lo mi Chin khrihfabu dang hna zong nih tel an duh cio. CBCUSA nubu tam ngai nih missionary cawm cio ding in timhlamhnak an ngei cang.  Hakha khua ah CCOC Follow-up Mission zunginn caah a lak in hmunhma a sianhtu an um cang.  CCOC Follow-up Mission caah phaisa thawh khawh a si ko.  CBCUSA Ngunkeng Pu Kepling Khengmual sin ah kua cio hna usih.

 

5) CBCUSA Rianttuannak

 

Chak Lairam ah rian kan ttuannak vialte cu a theipar an lang cuahmah ve cang hna.  Chin Christian College le CACC le Lairam khrihfabu dangdang tampi hna nih an hnangamnak cu CBCUSA rianttuannak hi a si ve cang.  Matupi khua ah Union Theological College nih 2007 kum in bawmhnak kan tuah ruangah kan dawtnak hna cu an tem cang.  Hi nak tam deuh in dawt kan hau hna.  Lairam Jesus Christ Baptist Church, Lawngtlai zong nih leikhuaza Laimi tonnak kan ngeih tikah "Laimi cu Pathian dawtmi fa kan si. Laimi si hi kan i uang tuk" tiin hmurka an puah lengmang cang.  Cansau pi chung Tipi le Tio va nih a danmi hna Laimi cu hawikomhnak kan ngei kho cang.  Civui kan i hrawm kho cang. 

 

Lairam khuasa Lai hawi caah rianttuan ding a tam chin lengmang.  Kawl lak ah a tlaumi Laimi zong nih Pathian Thawngttha an theih i an miphun hawi hna sin ah tthutdir ve an hau.  Laimi dihlak caah Jesus Khrih cu Bawi a si khawh nak hnga caah rian lian tuk kan ngei.  Missionary a thlahtu kanmah lak ah Pathian hmual a langh khawh nak ding ah Khrih Thawngttha aupi hi a herh tuk.

 

6) CBCUSA chungtel khrihfabu hna nih program nan ngeihmi le nan herhmi cu kan chim ulaw tlamtlinh kan i zuam hna lai.  Kei zong May le June thla cu khrihfabu len le tlawn ding in ka program a khat ve cang.  July in a pin lei ah a herhmi khrihfabu sin paoh ah tlawng kho ding in duhnak ka ngei.  Bawipa rianttuan hawi tampi kan um hna.  Kan sawm ulaw tlawn khawh kan in zuam ko hna lai.

 

Pathian nih thluachuah in pe cio hna seh!

 

 

Bawi Khrih rian ah,

 

C Duh Kam, EM