CCOC 2nd Round Mission Thawngthanhnak

[by Dr. Cung Lian Hup]

Dear CBC-USA Pastor te le Khrihfa Upa dihlak,

Kumthar lunglawmhnak nan cungah um ko seh ti hi ka thlacamnak a si. Nikum 2012 September ah Dallas ah kan tuahmi CCOC 2RM Committee meeting ke December ah Kansas City ah kan tuahmi meeting minutes chung in zapi nih kan tuah ding le kan theih hnga dingmi vialte cu email in kan van thlah dih cang. A cheu khat kan caah cun, email rel hi a har ngai i, hard copy in kuat i rel ah a tha deuh tiah kan ruat ko na in, a tu tiang full time riantuan tu kan ngeih rih lo pin ah, phaisa lawng kan kawl rih i, budget kong kan caih rih lo caah email lawng in kan van tial i kan ngaithiam ko u law tiah kan sawm hna.

Atu hi Rev. Hre Kio le Rev. Ngun Awi cu ZBC Upa he i tong ding ah Rangoon ah an um lio a si. Jan. 16 le 17 ah an i tong lai i, anmah nih an kan phorhmi thawng he pehtlai in Feb. 15 ah Indianapolis ah meeting kan tuah than lai i, cu tik ah cun Budget zong kan suai cang lai, ZBC he kan i pehtlaih ning zong a fian cang lai caah, 2013 ah CCOC 2RM cu kan thok cang lai ti ka van langhter duh hmasa.

 

Cun tutan ah tam deuh in van tial ka duhmi cu, CBCUSA Board of Management nih nan kan fial bantuk in CCOC 2RM Committee meeting cu vawihnih kan tuah cang i, a voihnih ning te in kan upa te nih bia an chahmi cu, tukum 2013 cu CBCUSA chungtel Khrihfabu poahpoah nih member pakhat nih US $25 cio in thawh si ko seh ti kha bia an khiah ning a si. Hihi, kan Laitlang ah ZBC chungtel Khrihfabu innkhat nih arpi pakhat le minung pakhat cio nih arti pumkhat cio thawh siseh ti bantuk in CCOC caah thawh ding in bia an rak khiah mi he a sullam a khatmi a si. Nan rak theihthiam cio lai dah tiah ka zumh.

A kholh ning cu mah le Khrihfabu nih kan siarem ning le kan thiam ning cio in kholh a si ko hnga. A cheukhat caah cun Khrihfabu nih thawhvo pekmi kha kumkhat budget chung ah suai chih in, a ning in a tho kho mi zong nan um men ko lai. A cheukhat Khrifabu nih cun Evangelism and Mission Department tuanvo a pemi zong nan um men ko lai. A cheukhat cu a kholh bak i a kholhmi zong nan um men ko lai. Mah le thiamning cio in thawh si ko seh ti hi kan biakhiahnak cu a si.

 

Kan nih Battle Creek Chin Baptist Church tu cu, thlakhat voikhat in a kholh bak in i kholh ko seh tiah EC nih an khiah i, Khrihfa Upa kha blog an then piak hna i, Khrihfa Upa nih anmah le an blog cio kha thlakhat voikhat kholh ding in bia kan khiah. Kan Krifabu tuahning hi a tha bik tiah ka ti duhnak si lo in, kan tuah ning ka hei chim sawh bia tu a si. Keimah ruah ning ah cun kumkhat kan budget i suai chih hi zaang a dam bik rua tiah ka ruah i, nan siarem ning cio in minung palhat $25 cio thawh ding cu rak i tim ko u tiah Bawi Khrih min in kan sawm hna.

 

Feb. 15 i meeting kan tuahmi minutes zong kuat khawh kan zuam te hna lai.

 

Bawi Khrih ah nan riantuan hawi,

Cung Lian Hup (Nancy Pa)