CCOC2RM Board 2nk Meeting

 

Hmun: Kansas City, Kansas

Ni: December 7, 2012 Friday

Caan: 9:00 am - 5:00 pm

 

Khual phak Ni: December 06, 2012 Thursday

Khua lei kir Ni: December 08, 2012 Saturday

 

Thlang Chinram ah Khrih Thawngttha chim ding in timhmi tlam a tlin khawh nak ding caah biaceih khuakhannak ngeih tthan a si lai.  Hi program hi biapi tuk a si. Minung ruahnak men in si lo in, Pathian duhning in khua kan khaan khawh nak hnga, nan thlacamnak kan herh hringhran.  Thlarau le thinlung in Thawngttha chimnak mission rianttuan kan hau.  Pathian nih A kan pekmi thluachuahnak kha hman kan  herh caah, hi rianttuannak ah kan thawhmi phaisa hna hi Pathian sin ah A ram kauhnak caah kan pek tiin kan ruah khawh lawng ah thlarau in kan tthang lai.  Khrihfabu le chungkhar le pumpak cio nih kan hlawkpi khawh lai.  Ngunkhuai (tax) pek bantuk men in kan ruah sual ahcun khrihfabu le hruaitu upa hna cungah thinlung kuai in thinhunnak zong a chuak kho.  Kan pekmi chaw hna kha thlarau tlaumi hna tlaihnak caah a si ti kha hngal kho lo ding in Satan nih kan sin ah rian a ttuan khawh caah Pathian sin ah thlacamnak le pumpeknak he chaw pek khawh zuam hna usih. Kan ttuanmi hna hi Pathian sunparnak caah si hram seh!

 

 

Kansas City Chin Khrihfabu hna Pathian Thangtthat ttinak

 

Kansas City ah CCOC2RM Board meeting tuah ding in bia kan khiahnak cu Kansas City ah a ummi CBCUSA chungtel khrihfabu pathum le Chin khrihfabu dang hna nih lunglawm tein an kan cohlan pin ah Chin khrihfabu hna i komh in Pathian thangtthatnak zong CCOC2RM meeting dih hnu ah Zarhteni le Zarhpini ah tuah ding in duhnak an ngeih caah Pathian thangtthat ttinak program cu tuah peh a si lai.  Hi program caah thla kan campiak cio u.

 

Thawngttha Chimtu Ding:

 

(1) Rev. Dr. S Hre Kio, Chairman of CCOC2RM & Senior Pastor of ICBC

(2) Rev. Dr. C Duh Kam, Executive Minister of CBCUSA & Senior Pastor

of Chin Baptist Mission Church, DC

 

 

Chin zumtu dihlak nih kan herhmi

 

Rian ttha le hlawh ttha pi cu kan hmu kho hna lo nain, Pathian nih kanmah tawk rian a kan pek cio hna.  Suimilam pariat hi caantling rian an ti nain, ni khat ah suimilam 12 hna kan ttuan.  Chungkhar he um tti caan kan ngei kho lo.  Nu le va zong rian dangdang kan ttuan tikah le kan fale hna cu nu le pa nih kilven an hauh caah rianttuan caan aa khat lo in tuah kan hau.  Nupi le rian in an ttin i pasal le nih innka hram an phak bak in rianttuan kal ding in timhchia in a rak um.  Innka hram ah nu le va kut i tlai in pakhat rianttuan kal tthan a si.  Hi ti hin rian nih a kan sal.  Kan re a thei ve.  Chawva sui ngun kan hmuhmi cu kan chungkhar nunnak caah a za in Pathian nih a kan pek hna.  Nain, thlarau lei in kan tthan ding kha a biapi tuk.  Cu caah ramdang Chin zumtu hna sin ah Thawngttha in thazaang i pek hi kan herh chin lengmang.  Kan fa le nih an herh tuk fawn.  Sianginn ah an cawnmi aa dang.  An hawikom an i dang.  An ruahmi aa dang chin lengmang.  Khrih Thawngttha he an i hlaat sual ahcun zumlotu ah an cang dih ko lai.  Cu caah, biaknak lei in kan tthan hi a herh tuk. 

 

A Thlum December ah kan lut lai

 

Nihin Ningani zan ttim in cun a thlum December Khrih chuah camtuak thla chung ah kan lut cang lai.  Khrih chuahnak caah kan thinlung cu timhtuah a cu cang.  "Nan lung vialte remh cio tuah u, Vanrang toi hla phuah u" tiin Van Bawi Messiah kan dong cang hna lai.

 

To God be the glory!