Bawipa Thangthat

Monday, February 13, 2012



CBCUSA Authawng [February 13, 2013]



             Pathian lam hruainak thawng in USA ah a ummi zumtu hna zong hmai ah kan i thawn ciahmah ko. CBCUSA ah khrihfabu 52 kan si cang. Pathian bochan in kan ttan khawh ahcun Khrih caah thangzaang nganpi kan si kho ve lai.  
                                                                                                
              CBCUSA Civui cu July 6-8, 2012 ni ah Chin Evangelical Baptist Church, Indianapolis, IN ah tuah a si lai. Ni le caan kal hi rang tuk kaw, kan naih ngai ngai ko cang. Mino caah hla le zei dangdang in timh a cu cang. Mino 500 nih hlaremh an sak khawh te lai tiin thinlung in saduh kan that. Kan i ngaih bik mi ni sunglawi asi.                                                                                                           
 
             CBCUSA BT meeting cu April 28-29, 2012 ni ah Battle Creek Chin Baptist Church ah tuah a si lai. Khrihfabu cio ah hruaitu upa hna a thar in nan i thim ahcun meeting report caah keimah sin ah kuat cio ding ah kan chimh chung hna. March 13-April 17 chung hi khualtlawng ding ka si caah tuan ah ngeih ka duh ngai. Ka khualtlawn hlan ah report i ser cia ka duh caah a si. CBCUSA komiti hruaitu cio nih kan in fialmi hna tlamtlinh piak kho ding in nan komiti hawi le kha theih ter cio ding ah kan in nawl duh fawn hna.                                
                                                                                   
             Kansas, KS ah American Baptist Churches USA GB meeting cu February 10-11, 2012 ni ah ka kai. ABCUSA nih Burma ram ah Khrih Thawngttha he Judson siangbawi te nupa an phaknak kum 200 puai cu Kansas City, KS ah June 28-30, 2013 ni ah tuah ding in an i tiim. Hi civui kong hi kan ceih, a hmunhma kan zoh pah. Hi civui ah Karen Baptist Churches USA nih minung 200 Choir kan sak lai an ti. Cu caah stage cu minung 200 nih hlaremh kho ding in sak a hau te lai an ti. Stage sak man hi a tam ngai ding a si. Ka thinlung in Lai mino 300 tal nih cun kan sak ve te lai si kaw, stage cung le tang he kan dir lai i phun dang ngai a lo te lai tiah ka ruat cia. Ka tha a nuam ngai.
                   
              Meeting kai pah in Kansas City ah CBCUSA chungtel khrihfabu pathum, Lautu Chin Christian Church, Chin Evangelical Church, le Kansa Chin Baptist Church kha ka van leen khawh dih hna. An dihlak in thanuam tuk an si. Bochan tlak taktak dirhmun an si dih. Hi vialte Laimi zumtu lak ah biaknak serhsang a tuah kho tu ordained minister cu Rev. Moses CC Mang lawng a si. Amah zong nih a si khawh chung in an herhning in ka bawmh hna lai, a thar bak in Bawipa rian ah kaa pumpe ve lai a ti i lunglawmhnak a sang chin. Hmun dang in pastor dang nih i tlawn a har caah Bawipa Zanriah a hmang kho lo mi an tam. An thlarau ti le rawl fah hi Khrih rian sunglawi a si. Pathian tthatnak cu kan caah a lang cuahmah ko.

              2013 kum i ABCUSA Civui ah Kansas um Chin churches vialte cu Lai mino tampi nih kan in tlun hna lai caah ralring cia tein i tiimtuah cia u ka ti hna. Kansas City ahhin Laimi 700 hrawng an um. Khrihfabu hi kanmah CBCUSA khrihfabu pathum hlei ah Zotung church pakhat, Falam church pahnih, Myanmarese holh hmangmi Lai church pakhat, le Tedim church pakhat an um rih. Kanmah church pathum hi milu a tambik an si. Lautu CCC hi a thawng le a tambik an si. Cun, Kansas Chin Baptist Church nih hlawh pek in pastor pahnih Saya Phun Lian Mang, church pastor le Saya Siang Ling, Asst. Pastor an lak hna. An pastor te pahnih caah thlacamnak zong kan ngei. Kansas City ummi church pathum cu CBCUSA kengruang ruh an si colh. Hi vialte hi Pathian nih Laimi sin ah thluachuah a kan vorhmi an si.   
                                                                                                               
Bawi Khrih rian ah,

C Duh Kam
Executive Minister
Chin Baptist Churches USA 

No comments:

Post a Comment