Global Chin Association for Christian Communication 
(GCACC)

(by C Duh Kam, November 7, 2011)

GCACC chunmang kong kan ttialmi a tang ah a um.  Fianternak tuah tthan ka duh.  GCACC hruainak in rianttuan tti herhnak kong kan chimmi cu kan/nan ttuan cia mi hna an si ko.  A min kan bunh lo mi lawng hi a si ko.  A min bunh ding kong chim tikah thil thar a lo ngai.  Kanmah CBCUSA lei rianttuannak in ka langhter lai.

CBCUSA (former CBFA) hi November 26, 2004 in Dallas Chin Baptist Church, Dallas, Texas nih  Chin Christian Centenary Civui an tuah lio ah Chin upa 33 hna hnatlaknak in thok a si. 

1)       Komiti thar thimmi hna nih Rev. Dr. Thlaawr Bawihrin cu Coordinator tiin hruaitu ah kan thim.   July 3, 2006 ah Board of Management (BM) nih Dr. Bawihrin cu Executive Minister ah kan thim tthan.

2)      Dr. Thlaawr Bawihrin hruainak in komiti upa meeting cu July 2, 2005 ah Denver, Colorado ah kan tuah.  CACC President Rev. M Thawng Kam nih a kan telpi khawh i kan rak i lawm ngai. 

3)      Hi meeting lio ah CACC, Hakha he rianttuan tti ding in biakhiahnak kan rak tuah.  CACC rianttuannak cu Laica, Laiholh le Lai nunphung tthanchonak caah a ttuan ruangah mi nih kan duh dih.  Abik in, CACC President Rev. M Thawng Kam nih a kan telpi caah kan tha a rak tho tuk a si lai, CACC nih chuahmi hla le cauk paohpaoh cu CACC tiin level benh ding in biakhiahnak tuah a si.  Cauk an chuahmi paoh zuarpiak ding ah ttuanvo lak ding in biakhiah a si.  CACC ah Chin khrihfabu hna kha membership 2% in lut cio ding ah sawm ding in hnatlaknak ngeih a si.

4)     Hi meeting tthiamtthiam ah CBCUSA (former CBFA) hruainak in Sunday School cawnnak ngeih ding in hnatlaknak tuah a si i komiti hotu ah Rev. Dr. Chum Awi kha thim a si.

5)      CBCUSA 2nk BM meeting nih Phunghram Dal IV, 2 ah CACC he pehtlai in rianttuan tti ding tiin phunghram a fehter.  Hi bik hi, CACC he rian kan ttuannak chan bik a si.

A cunglei bantuk saduhthahnak cu July 3, 2006 CBCUSA BM nih hnatlak pi lawng si lo in, January 2007 in Chin khrihfabu kip nih phaisa thawh cio i Komh Mission (Joint Mission) rianttuan thok ding in hnatlaknak kan tuah tthan.  2006 hlan ahhin USA ah Chinmi kan tlawm ngai.  Khrihfabu member kan tam hna lo.  CBCUSA zong thazang fate lawng a ngei.  2006 hnu lawng ah USA cozah nih Chin ralzaam hna kha an ram ah luhnak nawl a pek hna.  Cu hnu cun, khrihfabu cu kan karh.  Nihin ahcun khrihfabu pakhat ah member 1300/900/800/700/600 ti bantuk in Chin khrihfabu lianlian hi tampi a um hlei ah khrihfabu thar a fa nawn tete zong khua kip in an dir thluahmah.  CBCUSA chungtel khrihfabu hna cu 43 tiang kan phan.  Hi pin ah kan i chap lengmang lai.  Pathian nih a kan zangfah i rianttuannak thazang zong kan ngei kho deuh cang lai.

Lairam huap biaknak politics (Chinland Church Politics)

Nihin Chin khrihfabu hruaitu hna hi kum no deuh lawng te nan si caah nan thei phan lo kho men.  Zomi Baptist Convention (ZBC) ram ah rianttuantu kan pa le pawl Former GS Rev. Dr. Chum Awi, Former GS Rev. M Thawng Kam, Current GS Rev. Dennis Ngun Thawng Mang le Chairman hlun Rev. Ngun Awi le ZBC he naih niam tein rian a ttuan pengmi Rev. Dr. S. Hre Kio hna nih kan chim hna sehlaw a fiang ngai hnga.  Rev. Thawngling Mualhlun, Rev. Tial Lian, Rev. Khuatinthang Hlawnceu le upa dangdang hna hi ZBC Executive Committee ah kum tampi aa tel i biaceih khuakhangtu an si zungzal.  Kei zong USA ka kal hlan ah kum hnih cu ZBC EC ah kaa tel ve.  ZBC nih Chinmi caah aa tinhning tein dawtnak he rian a ttuan ko.  Thazang kan pek cio hna.  Thla kan campiak cio hna.  Hi bantuk in ZBC hruainak in rian kan ttuan pin ah Chin Baptist khrihfabu hna nih kan duhmi dang rian cu kan ttuan cio hna.  Kannih Laitlai lei nih CACC hruainak in Laica, Laiholh le Lai nunphung tthanchonak caah kan ttuan ve hna. 

Chin miphun lakah holh phun tampi a um nain, kan i hrawm khawhmi holh liandeuh kan ngeih caah miphun vanttha kan si ko rih.  Kan cozah nih Kawlholh cu tha a pek caah Laica cawng kho lo in kan um nak cu kum tampi a si cang.  Cu caah kan i hrawm khawh ngai mi kan Laiholh cu a zawr i Kawl holh nih Laiholh cu a van tei hnik cang.  A khuh dengmang cang.  Kawlholh cu kan rampi holh a si caah kan thiam ve hrimhrim awk cu a si.  Nain, Laiholh philh lak in Kawlholh kan hman ahcun ca le holh le nunphung a thlaumi miphun kan si lai.  Kan Lai miphun hi a tlau ko lai.  Kan dihlak nih kan i hrawm khawh mi holh a um lo ruangah kan thinlung zong a tthen phah dih.  Nain, kan ca le holh hrihhram hi aa khat dih hna. Laiholh le Mizoholh hna hi aa khatmi a tam ngai ko.  Hmailei ah cun pehtlaihnak a tthat chin lengmang lai caah kan holh zong hi kan i theihpiak dih te ko hna lai.  Miphun pakhat kan si caah hrawm khawh mi holh cu kan ngeih a hau. 

ZBC nih Baptist khrihfabu dihlak he rian a ttuan lio ah, Chin Association for Christian Communication (CACC) cu ser in, a bu in Laitlai zumtu hna cu rianttuanttinak kan ngei.  CACC cu Chin khrihfabu kip komh in tuahmi bu a si.  Kawlrawn Yangon, Mandalay, Kankaw, Kalaymyo le Thlang Lairam Laitlai vialte hi a huap dih. CACC ah an i tel hna.  A cheu nih ram dang in local church level in kan khrihfabu hmuhmi phaisa 2% in CACC ah pehtlaihnak kan tuah. 

CACC hruainak in Chin Christian College (CCC) hi thok a si.  Nihin tiang CACC hruainak in CCC cu a kal ko.  Laitlai tampi nih CACC le CCC hi Baptist khrihfabu ta lawng ah a ruatmi kan um ngai rih.  Laitlai (Chin) zumtu dihlak ta a si.  CACC aa thoknak kong cu kan pa le a tu GS Rev. Dr. Hla Aung le hlan GS Saya Ceu Mang le Rev. Tluang Ceu le upa dangdang hna nih kan ttialpiak sehlaw kan fiang bik hnga. Biapi bik in an dirpi mi Laica, Laiholh le Lai nunphung tthanchonak a si.  A phunphun in rian an ttuan.  Laica ttialning (Lai grammar), Laica cawnnak, Sunday School cawnnak cauk, Lai Bible le Hla cauk le cauk dangdang le Lai nunphung tthanchonak caah video te hna an kan tuahpiak.  CACC nih Laitlai pawl hi a kan nunh bak.  Kan ca le holh le nunphung cu an tthancho ter.  An ttuanmi tampi a um.  Kan thei kho thlu hna lo.  Upatnak kan pek hna.  Kan lawmh kan thangtthat hna.

Ramdang Chin (Laitlai) Khrihfabu hna nih CACC, Hakha ah bawmhnak tampi kan tuah ve hna.  Tahchunnak ah tlawmpal langhter ning law:

1) Chin Evangelical Baptist Church, Indianapolis, IN nih an zung inn khi an cawkpiak hna.  An income 2% in pehtlaihnak an tuah ahcun a tam tuk lai.

2) Kanmah Chin Baptist Mission Church (CBMC), Washington, DC nih kan income 2% in CACC ah kan pehtlaih tikah kum khat $6000 cu kan kuat peng.  Cu pin ah, CACC hruainak tangah a ummi CCC cu CBMC scholarship program tiin kum khat $4000/$5000 cu kan kuat khawh fawn. Kan khrihfabu lawng nih CACC caah kum khat ah $10,000 kan pek tinak a si.

3) Indiana Chin Baptist Church (ICBC), Indianapolis, Indiana nih an income 4% hi CACC le CCC ah 2% veve in an pek hna. ICBC hi member 1300 renglo an ngei.  USA ah a lianbik an si.  CACC ah an pekmi cu a tam taktak lai. Cu hlei ah CACC ah aa telmi hna Matu peng cu bawmhnak tuah kan duh cio bantuk in, ICBC nih cun a hlei in Matupi ah a ummi Union Theological College caah Rev. That Dun’s Memorial Library cu dawhtuk in an sakpiak hna.

4) Dallas Chin Baptist Church, Dallas, Texas nih Chin Christian College caah Library lianpi an sak fawn.  An income 2% in CACC ah bawmhnak an tuah ahcun a tam ngaingai.

5) Khrihfabu dangdang, (min ttial cawk lo) nih kan income 2% cio in CACC ah  pehtlaihnak bawmhnak kan tuahmi vialte le Lai Bible hrilhfiah ttialnak ah hmanmi vialte cu a tam tuk.  Lairam ah rianttuanmi CACC le khrihfabu hna cu Pathian nih ramdang in a bawm khomi dirhmun ah a kan chiah.  Pathian sin ah lawmh chim in thangtthat lo awk kan ttha lo.

CBCUSA le CACC, Hakha rianttuan ttinak:

            CBCUSA nih CACC he rianttuan tti ding in phunghram zong ah aa ttial bantuk in 2007 in nihin tiang rian kan ttuan tti hna.  CACC ram nih a huap chihmi Paletwa, Kanpalet, Mindat le Matupi peng hna ah rianttuannak cu thazang kan pek hna.  A bik in, Matupi Bible sianginn cu kanmah ta tluk in kan ruah.  Thla kan campiak ve hna.  CACC ah aa pehtlaimi hna he 2007 kum thok in rian kan ttuanmi cu:

1)       Chin Christian College, Hakha                                                                

2)      Chin Christian College caah Rev. Johnson zunngaih par caah fund raising tampi a tuah piak. 

3)      Union Theological College, Matupi                                                       

4)     Lai Bible Thiang Hrilhfiah ttialnak (by Lai Khrihfa Cattialtu Phu)  

5)      Kanpalet ngaktah bawmhnak                                                                

6)     Kanpalet Laica Cawnnak le Innsaknak (Melbourn Chin Church he)  

7)      Paletwa ngakttah inn saknak for years 2010 tiang                              

8)     Hakha-Hmandaw lamcawhnak                                                              

9)     Agape Clinic Hakha                                                                                    

10)   Bethel Clinic, Thantlang                                                                            

11)    Hakha siangbawi te thlan hmun khi kyats ting 22 in a remh.

12)   Lairam mangttaam lio ah Chin miphun dihlak caah fund raising a tuah.

13)   Hakha i Sang Awi Printing Ministry caah 2011 kum chung ah                   

14)   2012 kum chung ah Hakha General Hospital ah chapel sak ding     

15)   Bangladesh Bawmram Laimi sin ah 2o12 in rianttuan kan thok fawn lai.

16)   Biakinn kaang, innkaang le biaknak zung saknak tiin bawmh mi hna an um rih.

CACC ram chung ah CBCUSA nih rian kan ttuannak ah phaisa a hmanmi hi a tam ngai.  Kan mission field hi CACC ram chung a si kan ti lai. CACC, Hakha ah local churches pawl nih pehtlaihnak kan tuah cio.  CACC nih a hrihhawhmi rianttuannak ah kan i telnak tampi a um.  (Eg. Mandalay Lai Center saknak, cauk le Lai video) CACC he phaisa tampi dih in kum nga rian kan ttuan tti cang.  Lairam khualipi Hakha khua ah Laitlai zumtu hna nih khrihfabu min in phaisa kan kuatmi hi a tam ngai cang.  Hmailei ah ttha deuh in ttuan khawhnak thazang cu Pathian nih kan pe ko seh.

Ramdang Chin Churches nih CACC he rian nan ttuanmi:

CACC ah khrihfabu income 2% in aa telmi nan um lai.  Nan tam lo hmanh ah CACC nih rianttuan a duhmi Laica, Laiholh le Lai nunphung rianttuannak ah nan i telnak hi tampi a um lai.  Mandalay Lai Center saknak le Thlang Lairam ah rianttuannak, Lai Hla cauk le Lai Bible Thiang namnak ah rian nan ttuanmi tampi a um cang.  CACC Hakha he rian kan ttuan tti dih ko hna.  Kan i theih hna lo caah a si.  CACC he rian kan ttuan lai maw tiin ruah awk a um ti lo.  Kan ttuan cio dih cang.  Tuahnak in rianttuanttinak kan ngei cang.  Kan ttuanmi hna hi kan i theih khawh lo lawng a si.

Lairam Jesus Christ Baptist Church (LJCBC), Lawngtlai, Mizoram he rianttuan ttinak

LJCBC cu Lawngtlai, Mizoram ah a ummi Laitlai zumtu an si.  Laica le Laiholh a thiammi an tam ve nain, Mizoholh a hmangmi an tam ngai.  Laimi an si caah Laica, Laiholh le Lai nunphung cu kanmah nak in an dirpi deuh.  An hruaitu upa le CACC GS Dr. Hla Aung zong hi an i pehtlai kho.  Annih cu ram ttha le a tthangcho deuhmi India ram ah an um caah Nichuah lei Lairam chung zumtu hna nak in an dirhmun a ttha deuh ngai.  An rianttuannak zong a kau deuh.  An konglam hi tamdeuh in theih kan hau cio.  Kan hngal kho thlu hna lo.  An konglam theih khawh kan i zuam lio a si. 

LJCBC, Lawngtlai, Mizoram nih CBCUSA he rianttuan tti duhnak an ngeih bantuk in CBCUSA zong nih rianttuan tti ding in hnatlaknak kan tuah ve cang.  Rianttuan tti khawh ding mi cu kan i ceih hna lai. A fiangmi cu CACC, Hakha le LJCBC nih an dirpimi Laica, Laiholh le Lai nunphung tthanchonak cu a si hrimhrim lai.  Hngalh cia ah ruah ding a si ko.  CBCUSA nih hin mah ca le holh le nunphung kilven cu mi ramdang ah kan herh tuk in kan ruah hlei ah Khrih Thawngttha chim (Evangelism) hi biapibik in kan dirpi.  LJCBC le CACC, Hakha nih an duh zungzalmi a si fawn.  Pathian Thawngttha bia kan chimh mi hna nih ca an rel khawh lo ahcun Bible an rel kho lai lo.  Hla an sa kho lai lo.  Cu caah, Laitlai dihlak nih Laica le Laiholh an thiam khawh ding hi rian kan ngei.  Laiholh hi a chim kho lo kan tam nain, a theih cu kan theih dih hngot. Abik in, Hakha, Thantlang, Falam, Matu peng le Mizoram ah Lawngtlai le Saiha area  minung nih cun kan holh khawh dih lo hmanh ah, a theih cu kan theih ngai hna.  Cun, Thlang Laimi kan hawi le nih Laica rel khawh ding cu duhnak an ngei cio.  Cu caah CBCUSA nih CACC, Hakha he Kanpalet ah inn pakhat sa in Laica cawnnak program cu 2010 in kan thok.  Laica cawn a duhmi paoh kha chimh khawh ding in rian cu ttuan kan hau hna.

LJCBC cu Laica, Laiholh le Lai nunphung dirkamhnak ah cun hmaisuang ah an kal.  Baptist World Alliance (BWA) civui an kal khawh nak paoh ah Lai pipu puansen, tawnlo puan nak, angki le hni sen he “Mangbik Sang Cem cu” timi hla sa in an lam.  Lai holh in hla phel le DVD zong a kan chuahpiak hmasatu an si.  Rianttuan tti kho ding in Bawipa Pathian nih lam a kan hruai caah kan tha a nuam taktak.  Anmah he rian kan ttuan tti khawh ahcun Bangladesh ram chung Bawi Laimi hna he Laica le Laiholh le Lai nunphung tthanchonak tuah khawh a si fawn lai. 

Tu chan kan fa nau le nih theih a herhmi cu “Laica, Laiholh le Lai nunphung nih ram kau tuk a ngei” ti hi a si.  Laitlai kan umnak Burma (Lairam le Kawlrawn), India, Bangladesh le lei khuaza ram kip hna hi a ram a si cang. 

Laica le Laiholh thiam a herhnak

            Khrih Thawngttha chimnak (Evangelism) caah Laica thiam a herh bik.  Khrihfami nih Khrih Thawngttha chim cu kan rian a si.  Kan chimh mi hna nih Bible rel kho ding in ca le holh an thiam lo ahcun Bible ttial hlan chan he khan an i lo lai.  Bible hi bia lawng in kan chimh hna ahcun bia lawng in tuanbia chim (oral tradition) he aa lo lai.  Ca in an rel khawh lawng ah a hmanmi Pathian Bia hi an thiam fel kho lai. 

            Burma ram dirhmun in zoh ahcun Kawlmi cu Khrihfa tlawmte lawng an si.  Bible hrilhfiah ttial hi an i harh men ko lai.  Kawl Bible zong hi kum 150 chungah an tharchuah kho rih lo.  Laimi dirhmun in kan chim ahcun Bible kan ngeihnak cu a sau lo.  Khrihfa kan sinak in kum 110 hnu lawng ah Lai Bible hrilhfiah ttial kan thok kho.  Ka theih khawh mi ah 1) Falam Bible Hrilhfiah cu Rev. Dr. S. Hre Kio hruainak in an ttial cuahmah lio, 2) Lai Bible Thiang Hrilhfiah cu tleicia Rev. Dr. Sang Awr hruainak in a nun chungah Lai Khrihfa Cattialtu Phu (LKCP) hna nih 2007 kum in ttial an thok.  Dr. Sang Awr a thih hnu ah Dr. Cung Lian Hup nih a hruai hna.  CBCUSA nih $5000/yr in kan bawmh peng hna.  2012 kum in $6000/yr in kan bawmh hna lai.  Hi rian hi cu CBCUSA nih thazang chuah hmasa hmanh sehlaw leikhuazakip Laitlai zumtu dihlak hna kan rian a si. Hi LKCP hi CACC he pehtlaihnak a ngeimi an si.  Nitlak Lairam ah LJCBC, Lawngtlai nih Lai Bible Thiang hrilhfiah cu an ttial pah ve.  Hi hrilhfiah ttialtu hna zong hi i bawm kho hna sehlaw a awl deuh ngai hnga.

            Mission rian kan ttuannak hmun khuasami hna nih Bible an rel khawh nak ding ah Laica le Laiholh an thiam ve kha a herh ngai.  Laimi khrihfa hna nih kum 110 hnu lawng in Bible le hrilhfiah ttial hna kan thok khawh si kaw, Thlang Laimi caah anmah holh in Bible ngeih cu a awl hmanh ah Bible Hrilhfiah hi cu ngeih an i harh ngai lai.  Laica le Laiholh chimh hi a awl deuh ngai men lai.  Khrihfa biaknak lawng si lo in, vawlei cung biaknak paoh hi an tthancho khawh nak ding caah ca le holh thiam hi biapi bik a si.  Kannih Laitlai khrihfabu hna kan caah Caholh le Thawngtthachim (Literature & Evangelism) cu tthen awk ttha lo mi nuva bantuk an si ve. 

Laica le Laiholh kan thiam ahcun holh pakhat in hla phel le DVD phel vialte kan i hrawm kho lai.  Nitin/Zarhtin/Thlatin Thawngthanh (Daily/Weekly/Monthly News) vialte kan i hrawm kho lai.  Lai Media/Radio/TV prokrem hna zong Laica le holh tein kan tuah khawh lai.  Hlasatu le cattialtu hna caah an ram a kau lai.  Pawcawmnak tiang in an hmanh khawh te lai.  Hi bantuk rianttuannak cu thaizing/kumvui/hmai kumhrabu tiin ruah le tuaktan ding a um bantuk in, Laimi chan in a kal ve ding mi rianttuannak kha ruah le ttuan kan hau ve.  Vawlei chan hi rianrang tuk in a tlik caah Laimi chan zong a tli thluahmah ve.  Nihin nu le pa hna nih hmuh le tem manh lo ding in ruahmi hna zong kan tem manh khawh ve ko lai.  Laica le Laiholh nih a ram vialte a cul khawh ding ah nihin Laitlai khrihfabu le zumtu vialte nih rian kan ngei.

Leikhuaza Laitlai Chin Khrihfabu hna rianttuan ttinak (GCACC)

            A fiang lo mi nan um ko lai.  GCACC in rianttuan ttinak kan ti mi cu a cunglei ah kan ttuan ciami vialte hna hi nithawng pakhat tang ah min thar bunh in rianttuan tti hna awk kan si lo maw tinak a si ko.  A har hlei ding a um lo.  CBCUSA nih kum nga chung ah $ 200,000 dengmang in CACC, Hakha ram chungah rian kan ttuan cang.  Ram kip in Laitlai Chin khrihfabu hna nih tamtuk nan ttuan cang.  Mizoram Aizawl khua in Laitlai hna nih Bible tampi an kan nampiak caah ram kip ah chungkhar tampi nih Bible kan ngei kho.  CCF, Malaysia nih Lai Hla Cauk an nam i mi dang an kan cheuh vuanh khawhmi a tlawm.  Kan Lai Hla Cauk vialte an tlek dih cang.  Pulput cung kaimi upa ca hmanh ah hla cauk tlaih ding kan ngei ti hna lo.  Mipi cu power point in an ttialmi kha an zoh i hla an sak khawh.  Pulpit cung kaimi upa pawl cu hlasa lo in um kan hau cang.  Khrihfa inchungkhar ah pumhnak kan tuah tikah Lai Bible Thiang le Lai Hla Cauk te an ngei ti hna lo.  Pastor le khrihfaupa nih kan ngeih chun Lai Hla Cauk phaw tlek chia nawn te cu minung pakhat kan au ter hna i hla kan sa.  Khrihfaupa tampi nih Hla cauk cu kan ngei lo.  Pastors nih kan i ken tawnmi Hla cauk a tleh dih tikah chungkhar pumhnak ah hlasa lo in, Bible lawng rel in tuah hau ding phun in kan um cang ko lo maw?  Keimah nih voikhat cu ka ton ve.  Ka lennak ah hla cauk ka ken tawnnak ka zal kha kaa thlen ruangah inn ah ka kal taak.  Nau chuah caam thlacamnak ah a ra mi ahohmanh nih hla cauk kan ngei lo.  Innngeitu nih an ngei ve lo.  Hlasa lo in pumhnak tuah awk a tthat lo caah Hla No. 45 “Kan himnak lung Jesuh a si” kha cang khat le a nolhnak sa hna usih tiah ka sawm hna.  Kan thiam cio i van tthat ngai a si.  A tu kan dirhmun in Laitlai khrihfabu hna hi um peh awk kan ttha ti lo.  Biakinn lawng ah hlasak i inchungkhar ah Pathian hla hi sa ti lo ding in kan um cang.  Khrihfa inchungkhar ah Lai Bible Thiang le Lai Hla Cauk dawh te hna an cabuai ah a um ahcun aa dawh tuk.  A rem tuk.  Hi vialte hi a um ti lo. 

Ramkip Chin khrihfabu kip ah Sunday School ngakchia hi sawm le za in kan ngei hna.  Sunday School cawn ding mi cauk kan ngeih hna lo.  Cawnpiaktu saya/sayama te nih an duhmi paoh an chimh hna.  Saya/Sayama cu Bible cawngmi zong an si lo.  Kum no tete nih mah duhmi paoh cawnpiak cu a tthat ding tluk in a ttha lem lai lo.  Kan fa le nih Sunday School cawn ding cauk pakhat cio an herh.  Kum thum ah voikhat tal in thar chuah a hau.  Aa khatmi cauk cu ngei kho hna usih law cu, Lairam le ramdang Laitlai khrihfabu Sunday School ngakchia hna nih Bible cang khat hi suimilam pakhat chungah an chim le rel tti caan a um kho lai.  Cauk kan ngeih lo ruangah zeitluk in dah kan sungh?  Ruah kan hau cang.  Kan tlai tuk cang.  Kan fa le nih a kan tthan kanh cang lai.  Ramdang Lai fa vialte hi miphun dang ah an cang dih lai hi phan a um ngaingai.

            Laitlai khrihfabu hna nih kan umnak ram cio ah tthal sianginn khar chungah Laica cawnnak cu kan tuah.  Cawn ding cauk kan ngei hawi lo.  Kan fa le nih an rel ding mi cauk a um fawn lo.  Hi vialte tuahnak ding ah phaisa a herh. Rianttuantu tampi kan herh.  A cung i kan chimmi vialte hi CACC, Hakha nih tuah cawk ding a si lo. Tthihruaitu nih tthut riangmang in cattial khawh a si lo.  Rianttuantu tam deuh le volunteer in aa pumpemi tampi kan hau.  Phaisa thazang tampi an hau.  Lai Bible Thiang Hrilhfiah ttialtu hna hi anmah pumpeknak in ca an ttial.  Lakphak dinnak pek zong an hau.  Chan thar chungah kan lut cang.  A lak rumro in rianttuan khawh a si lo.  A phung zong a si ti lo.  Rianttuan phung (professionalism) ah kan i tthial pah lengmang a herh cang.  Cu caah, Laimi nih kan herhmi vialte hna hi ram kip in thazang chuah tti in, kan ttuan lio lengmang mi hna hi rianttuannak nithong pakhat tang ah um in rianttuan ahcun kan miphun ning in kan tthancho lai.  Tlangholh hmanh kan ngei phum te ko lai.  Laimi kan caah ahcun biachahnak in kan ngeih khawh lo mi kha tuahnak in kan ngeih khawh ding mi an si.  Cu caah, Global CACC maw, min pakhat khat in maw rianttuannak bu pakhat ngeih kan herh ko kan tinak a si.

GCACC ah Laitlai khrihfabu vialte i hlum kan herh.

            GCACC cu Laitlai khrihfabu hna rianttuan ttinak a si lai.  Ram kip in kan ttuan lio mi hi min pakhat bunh in ttuan i thazang hlum ah a ttha hnga lo maw tinak a si.  CBCUSA, CACC, Hakha le LJCBC hna cu kan ttuan tti cang.  A ttuan tti ding kan si cang.  Cu caah ram kip Laitlai khrihfabu hna zong nih min ngei lawlaw in nan rianttuan cia mi hna hi thazang van hlum tti in rianttuan tti hna usih tiah i sawmnak a si.  GCACC nih a rianttuan duhmi cu Laica, Laiholh le Lai nunphung tthanchonak le Khrih Thawngttha chimnak hi a si lai.  Kan tuah cuahmah mi an si ko hna.  Min pakhat bunh in rianttuan tti ahhin hma a kal lai, kan ttuan kho deuh lai tinak a si.  GCACC cu Laitlai vialte thazaang i hlumnak le rianttuan ttinak ding a si. 

            USA ahhin Laitlai khrihfabu vialte kan i hlumnak cu CBCUSA hi a si.  A dang in Falam kan miphun hawi Baptist khrihfabu hna nih Chin Baptist Association (CBA) cu an thok ve. Khrihfabu 12 an si cang.  Aa komhawimi kan si ko hna.  Laiholh a thiammi an si ko.  A tu ah kan herhmi cu Laitlai vialte kan i hlum i Laica, Laiholh, le Lai nunphung tthanchonak caah kan ttuan hlei ah, Khrih Thawngttha hi biatak tein aupi kan duhmi cu a si.  Laitlai pawl kan i tthen ding hi cu ahohmanh nih kan ruat kho lo.  Kan i hlum lo i a dangdang in rianttuan ahcun kan Lai miphun pi hi a mitthli a tla te lai.  Kan tuanbia nih a kan mawhchiat lai.  Kan Chin khrihfabu tuanbia nih a kan mawhchiat lai. 

            Cu caah, CBCUSA zong nih Laitlai vialte thazang hlum in Bawi Khrih Thawngttha chim ding in kan in sawm duh mi hna cu a si.  Thazang a chuahmi hi a tam ngai cang.  Kan ngeih hlei tiang in kan chuah ti tluk a si.  Ram kip in thazang nan chuah cio ahcun Laitlai vialte nih Pathian ramkauhnak caah tampi rian kan ttuan kho lai.  Kan Lairam hi Khrih lennak ram ah a cang kho lai.  Thlang Lairam ah a ummi kan miphun hawi hna nih Chin miphun si duhnak an ngei kho lai.  Pathian bia in kan miphun hi kan ser khawh lai.

Pathian nih thluachuahnak kan pe cio ko seh!

Rev. C Duh Kam

Executive Minister

Chin Baptist Churches USA