Malaysia ah ka tlawng tthan:

July 4, 2011 (Monday): Dulles International Airport in kaa thawh.  Deitroit, Michigan in Japan Narita airport in Singapore tiang Delta airline in ka zuang.  Singapore in Kuala Lumpur, Malaysia ah Nithumni 7:10 am in Malaysia vanlawng Jestar in kan zuang tthan i 8:10 am ah Kuala Lumpur cu ka phan.  Rev. Lal Pek Lian (Peng Nawl pa) le Saya Yaw le CCF chairman Pu Chan Hniang nih an rak ka don.  Kuala Lumpur cu February 2009 ah ka rak tlawng cang.  Tu tan ah hawikom ka van hmuh hna i kan i nuam ngai tthan.

Baptist World Alliance conference: Wednesday chun hnu in ka kai thok colh ve. Nilini kan i din.  Ningani ah kan peh tthan.  Ninga zan cu a donghnak bik Pathian thangthatnak a si.  Kuala Lumpur Baptist Church ah kan i pum.  Hi khrihfabu hna cawlcanghning aa dawh ngai.  Tha tho tuk in Praise and Worship he a kan hruai. 

CCF ah Meeting:  ABCUSA Team Leader Dr. Roy Medley te he CCF hruainak in meeting kan ngei.  Chin Refugee Agents pawl le fellowship upa an ra hna.  Hi ni hi Kuala Lumpur, Malaysia ah rampumpi in duhlonak an langhter ni a si caah lam vialte an khar dih.  Luhchuahnak a har caah a ra kho lo an um pah.  UNHCR lutlai ton kan timh mi kong ah chimh duhmi caihhmainak kan ngei.  Cu hnu ah CCF nih zanriah a kan dangh.  UNHCR zungah July 11, 2011 ah kan leeng.  A tang hi ABCUSA GS Dr. Roy Medley le a hawi le cu kan si.

 July 10, 2011 Sunday: Biakinn tampi ah khual paoh phungchim ding in fial kan si.  A tu hi pumhnak caah zingtho in kan i timhlamh a si.  Cheras Khampat Fellowship ah Thawngttha ka chim.  Khampat khuami lawng te deuh an si.  Zing pumh hlan ah Chin Students Organization kan leeng hna.  Pumh dih in ACTS clinic le ARC clinic ah kan leeng hna.  Zarhpi zan ah Cheras CCF Mino pumhnak ah Thawngttha ka chim.  Chin Student Organization nih caan an hman zan a si caah mino an tam.