Pathian Thimmi Miphun

        February 20, 2011 Chin National Day kan phan cang lai.  Chin miphun hi Pathian nih a thimmi miphun kan si ve hnga maw?

        Pathian nih a thimmi hna miphun cu Israel miphun an si. Biakham Hlun cauk chung ah Pathian nih A sinak cu hi hna sin ah khuaruahhar thil tampi he a phuan. Nain, nihin ah Jesuh Khrih cu Messiah ah an pom kho rih lo.
        AD 65 hrawng ah Judah mi nih Khrih cu an zumh ve.  Judah Khrihfa an si.  Harnak an rak tong.  Peter nih forhnak ca a rak kuat hna:
        "Nannih cu a thimmi miphun, Siangpahrang tlangbawi, miphun thiang, Pathian miphun hrimhrim nan si.  Muihnak chung in amah ceunak chungah an kotu hna Pathian khuaruahhar mi thil a tuahmi thanh awk ah nannih cu an thimmi hna nan si" (I Peter 2:9) tiah a ti hna.
         Kannih Chin miphun zong Pathian nih muihnak chung in ceunak ah a kan hruai.  Kan miphun dihlak ti ding in Khrih zultu kan si khawh hi khuaruahhar ngai a si. Pathian thimmi miphun (His own special people) kan si hrimhrim ko.  Thimmi miphun cu Bawipa rian ttuan ding ah fial kan si.  
        "Miphun a lianhngantertu cu dinnak a si, sualnak cu zei miphun paoh caah ningzahnak a si" (Phungthluk Bia 14:34).