HAKHA KHUA AH INN KANGHNAK LE THIH NGAIHCHIAT TONNAK

Chin khualipi Hakha a dawhtertu inn pahnih le dawr khan pali hna a kang. 

Hi innkanghnak in Pi Van Bawi Zi le anu, le AHan nu hna nih mual an kan liamtak.  Hakha khuami lawng si lo in, vawlei cung ram kip ah a ummi miphun hawi dihlak kan ngaih a chia tuk, thinphang thlalau in kan um hna.   

Innkangh le thihnak kong ruah ah lung a fak tuk hringhran.  

Pathian sin thlacamnak in bawm cio hna usih. 

*******************************

June 6, 2018

Upatmi CBCUSA Upa vialte hna:

Hakha khua ah tonmi inn kangh le thih ngaihchiatnak kong ah aho paoh lungtha lo in um dih a si. Kan ngaih a chia tuk cio hna. Hi bantuk caan ah khrihfabu kip nih hramhnak te tuah cio khawh ahcun an ngaihchiatnak le thinphang thlalau in an umnak cu a nem deuh hnga.

Cu caah khrihfabu kip nih nan thiamning in bulhnak tuah cio ding ah Bawi Khrih min in kan in nawl than hna.  CBCUSA office ah bulnak cu kuat cio ding a si lai.

Kachin kan unau hna bawmhnak zong CBCUSA office ah kua tuan cio ding in kan in nawl fawn hna.  June 15 hlan ah tiin thawng kan in thanh cang hna bantuk in kuat khawh van i zuam cio u.  Pathian sin kan thlacampiaknak hi mi harsami hna bawmhnak a si hlei ah Myanmar ramuk bawi le mipi sin ah biachimtu zong a si kho ve.  

Pathian nih thluachuah in pe cio hna seh!

Bawi Khrih rian thiang ah,

C Duh Kam

General Secretary

************************

June 7, 2018

Upatmi ICLS ramchung pastors le upa le zumtu hna:

Bawi Khrih min in nan kut kan tlaih hna.

CBCUSA nih tlang kan au lio mi acung bia hi kan kuat hna.  Tanrualnak le funtomnak kan ngeih ahcun tlawm te cio in kan thawhmi thluachuah nih thil lianngan tuk a tuah khawh.  Pathian sin ah thlacamnak in tang ti hna usih.

Bawi Khrih rian ah,

C Duh Kam

President

International Chin Literature Socieity [ICLS]

********************************** 

Pi Ui Cer (Ni Ceu Nu) Zumhnak 

[Rev. Dr. Hrang Hlei]

FB hawikom vialte,

Zahan Halkha khua inn kangh le thihloh thawng nih lung ar in a kan tuah dih. A poi hringhran ko. Ngaihchiatnak a tong mi A Han te chung le Pastor Sui Ling te chungkhar nih Pathian sin tu in lung daih hnangamnak le i lungsaknak hmu ko hna seh.

Mei ah a kan pamtaak mi Pi Ui Cer (Ni Ceu Nu) hi Rev. Edward Mang Kio Thang nupi a si. Rev. Mang Kio Thang cu Halkha ramuk bawi arak si. Ni Ceu Nu thawng in khrihfa ah a hung cang i pastor zong Lung Biakinn ah caan saupi arak kan tuanpiak mi a si. Mang Kio Thang lungthlennak kong cu Dr. Johnson nih hmanungbik a tialmi cauk, "On the Back Road to Mandalay" (pages 255-258) ah a langhter. 

Ni Ceu Nu a zumhnak a fehning le nu raltha arak sinak kong Dr. Johnson nih a tialmi tawite in ka vun langhter. Kan nu Ni Ceu Nu philhlonak ca ah a si:

1. Dr. Johnson te Halkha an phanh hmasa, 1947 ah hin Mang Kio Thang cu khuauk bawi arak si. Hlan lio ramuk bawi dang bantuk in zu le sa he arak i ciah ve. Hi bantuk minung hi a hnu ah bochan ngai mi pastor ah a hun i chuah te lai tiah Dr. Johnson nih a ruat lo. 

2. A nupi (Ni Ceu Nu) thawng in Mang Kio Thang cu a lung aa thleng i khrihfa ah a lut. Cu kong cu Dr. Johnson nih chim lengmang ding le philh awk a tha lo mi tuanbia a si tiah a ti. Voi khat cu Inn Ral Nubu Nithum zaan thlacamnak ah Mang Kio Thang papa a damlo tiah thawng an theih. An inn ah an va kal i Ni Ceu Nu nih tha tein arak don hna. Cu ti nu rual nih an cung i zawnruahnak an ngeih mi cu Ni Ceu Nu nih a hmuh tikah, an inn ah cun len a sawm lengmang hna i thla an campiak tawn. A hnu ah Ni Ceu Nu a lung aa thleng i khrihfa ah luh aa tim. Hi hi hlan chan i nu diarhmun ah, a hlei in khuauk bawi nupi caah a har ngai mi a si. Asi nain, Ni Ceu Nu cu Khrih a zumhnak ah nu raltha ngai ngai arak si. 

3. Ni Ceu Nu cu tipilnak ka ing lai tiah biakhiahnak arak ngei. Hlan ah cun an zumhnak a feh le feh lo, Khrihfa nun ah an i biatak maw biatak lo ti hngalhnak ah thlaruk chung anrak hngahter hna. Cu ti tipilnak in ding ah thlaruk chung a hngah lio a ahcun, zaan an ih kar ah an inn arak kaang. An minung an him fangfang lawng a si, an thilri vialte mei ah arak cam dih. Cu tan ah cun inn 7 arak kaang. Hlan khuahrum bia mi hna ruahnak ah, Ni Ceu Nu nih Khrihfa Pathian a biak caah a cungah an khuahrum a thinhun langhternak a si an ti. Cu tikah an innpa chakthlang mi tampi nih Ni Ceu Nu cu heh tiah an mawhchiat. Nangmah ruangah kan inn a kaang; cu caah ram dang biaknak cu na kaltak i lawki (lai phung) aha kiar than a hau. cu lo ah cun hi nak thil tihnung deuh nih a kan tlunhnawh sual lai tiah an ti. Hi lio hi Ni Ceu Nu caah a har ngai ngai. Cu lio ah cun zumtu a nu hawi hna nih thlacamnak in an bawmh, zumhfek in a um nakhnga thazang an pek. Cu lio thengte ah cun Mang Kio Thang nih: "Kan ngiatnak a sau nawn cang. A tu bantuk innpa chakthlang nih an in mawhhchiatnak le sual an in puhnak hi na tei khawh i fek tein na diar ahcun, na zumhnak hi a hmaan tiah ka hngalh lai" arak a ti. 

4. Ni Ceu Nu cu a zumhnak ah fek tein arak diar taktak i Mang Kio Thang (Ni Ceu Pa) zong cu a nupi (Ni Ceu Nu) thawng in a lung aa thleng i Khrihfa ah a lut ve. Mang Kio Thang cu Paul bantuk in a nun khel aa let mi pa, zumhtlak Khrih hnuzultu pakhat ah aa chuah. A hnu ah Bible Sianginn a kai i 1961 thawk in pastor rian a tuan. Lung Biakinn saknak ah biatak tein thazang arak chuah tu le bochan ngai ngai mi Pathian rian tuantu ah aa chuah. Dr. Johnson te 1966 i Kawlram in anrak dawi hna lio ah Kawlram Khrihfa hi harnak an tong lai i an zumhnak an kaltak sual lai ti anrak phan bik mi a si. Cu lio ah cun Mang Kio Thang nih Dr. Johnson sinah arak chim mi bia cu: "Bawipa, tap hlah, na ngaihchia in na lung zong dong hlah. Zei kan ton zong ah zumhtlak in kan um ko lai. Khrih sinah thih tiang in zumhtlak kan si ko lai." 

5. Hi ti Mang Kio Thang nih zumhawktlak taktak in Pathian aa bochannak cu a nupi, Ni Ceu Nu zumhnak thawng in a si. Ni Ceu Nu cu zumhnak ah nu raltha arak si. 

Ngaihchiat hrawmpi le upat peknak he,

Hrang Hlei

**************************************