BAWIPA SIN AH THLA KAN CAM TI AHCUN

Bawi Khrih nih "Biatak kan chimh hna, hi vawlei cung ahhin 

nan halmi thil kong ah, pahnih nan lung aa khah ahcun nan halmi thil cu

vancung i a ummi ka Pa nih an pek hna lai" tiah a kan cawnpiak.

(Matthai 18:19)

Kan Chinram harnak kan tonmi caah kan miphun dihlak nih

lungthin khat tein thla kan cam tti ahcun Pathian nih A kan pek ko lai.

CBCUSA nih cun "Pathian nih miphun dang hawikom sin ah kan thlacamnak 

A theihter khawh ko hna" timi ruahchannak he internet online in bawmhnak

kawl kan thok.  Dawtu Lai hawi nang nih cun mah le khrihfabu sin in maw, 

CBCUSA sin ah maw, mah umnak biaknak buu hna sin ah maw

pek a tha thiam ko.  Nain, pehtlaihnak a thei lomi caah 

pek lo in um ko cu na ruah khawh lai kan zumh lo caah

awlzang tein pek khawhnak ding hi kan siamnak a si.  

Na pek ahcun bawmhmi le bawmtu na caah 

lunglawmhnak a tam chinchin lai.  

Hi internet in peknak cu a tang hi a si:

HELP FOR CHIN STATE

http://www.gofundme.com/helpforchinstate

CHINRAM HARNAK TUARMI CA THLACAMTTiNAK

AUGUST 23, 2015 [SUNDAY]

Upatmi leikhuaza miphun hawi dawt vialte hna:

Kan Chinram ah harnak tuarmi kan miphun hawi hna caah le kan Chinram le miphun dihlak caah thlacamnak ngei tti ding in CBCUSA upa hna nih a cunglei Zarhpini ah tuah ding in kan timhtuah.

Ram chung le ram leeng Chin zumtu nan dihlak, Pathian sin thlacamnak ngei tti ding in Bawi Khrih min in kan in sawm hna.

Hi tluk ttihnung mi harnak chung in kan nunnak hi Pathian nih a kan huhphenh.  Thihnak chung in a kan luat ter. Cu hlan vialte ah kan miphun nih Pathian thluachuah a donmi hi a tam tuk.  Lawmhnak chim ding kan si.

Kan Lairam le khuapi Hakha cu biatak tein sersiam tthan kan hau.  Pathian sin ah bawmhnak hal hna usih.

Bawi Khrih rian ah,

C Duh Kam

Executive Minister

Chin Baptist Churches USA

7105 Chimney Rock Ct,

Indianapolis, IN 46217

HAKHA KHUA HARNAK TUARMI HNA CAAH BAWMH HALNAK

Ruah sur a fah tuk ruang ah Hakha khua chung hmun tampi ah vawlei an min.

Tilu nih khualak hmun tha vialte zong hawrkuang ah a ser dih.  
Vawlei an kak.  Inn thatha hna an tlu dih.  Pehtlaihnak lam 
Hakha to Falam le Hakha to Gangaw hna zong hmun tampi ah  an rawk.  
Ti le rawl tiang in harsa ngai in kan miphun hawi hna khua an sa.  

Chungkhar tampi nih umnak hmun ngei lo in an um hna.

Ngaih a chia taktak.  Lung re a thei taktak.

Hi bantuk in kan miphun hawi hna nih bawmhnak an herh lio caan ah

ram kip ah khua a sa mi Chinmi kan dihlak nih thlacamnak he 

bawmh khawh zuam hna usih.

Bawmhnak tuahnak caah pehtlaihnak hna cu: 

1) North America [USA & Canada ummi nih:

CBCUSA

7105 Chimney Rock Ct, 

Indianapolis, IN 46217

Email: (1) C Duh Kam [duh_kam@yahoo.com]

(2) Kepling Khengmual [kepling58@gmail.com]

2) Australia le New Zealand ummi nih:

Chin Christian Council in Australia [CCCA] Office

Melbourne, Australia 

3) Europe ummi hna nih:

CCAE office/Ramdang Biaknak buu 

4) Malaysia, Thailand, Singapore le S. Korea ummi nih

mah le umnak CCF le buu khat khat sin ah

5) Mizoram, India ummi nih

Lairam Jesus Christ Baptist Church, Lawngtlai

6) Bawm, Bangladesh ummi nih

Evangelical Christian Church Office

7) Lairam ummi nih

CACC Office, Hakha

CACC riantuantu hna nih Hakha khua ah kan tonmi le Lairam hmun dangdang ah kan tonmi kong hi thawng an kan thanh khawh lai.  A ram kip in 

thlacamnak he i bawm hna usih.  
****************************************************

LAIRAM HARNAK CAAH BAWMHNAK HI

Kan tonmi harnak hi Lairam hmun kip ah a cang.  A fak deuh/fak deuh lo ti lang an si.  Kan thei dih kho rih hna lai lo, tam deuh kan theih chap te lai.

1) Hakha khua a rawh ning cu a fak taktak. Rung tlang nih a cimh hnawh caah inn lo tha le dawh vialte an rawk dih.  A tlu lo mi hmanh vawlei an kak, hngah tha nuam kho lo ding in an tam.

2) Kalay Valley ah ti lian nih chungkhar tampi inn lo a phum hna. A fenh le rawk a tam.

3) Paletwa ah ti lian nih inn 622 a rawk tiah thawng kan theih than. Riahnak le ei din awk ngei lo an tam.

4) Lai khua te cheu khat nih lei minh ruang ah an khua an chuah taak, thing tang ah an um ti a si fawn. Ti lian nih leikuang a hrawh mi a tam ngai rih.

HI TLUK IN KAN MIT HMUH AH HARNAK A TLUN LIO AH

Minung nunnak him tein a kan kilvengtu hi kan Pathian a si. Kan hawi dawt hna le dawtu hna nunnak nih theih hraw lo tein kan um khawhmi cu Pathian huhphenhnak a si. Harnak ton lio zong ah Bawipa Pathian cu thangthat ko hna usih. Inn le lo cu Bawipa nih a kan sakpiak than lai. Kan fing le tlang cu Amah nih a sak mi an si. Ramdang khuasa Chin zumtu hna hi Bawipa Pathian nih a kut le ke caah ser a kan duh. Thazaang chuah tti hna usih.

BAWMHNAK TUAH TIKAH:

Miphun hawi dawt vialte hna:

Lairam khuasa harnak tuarmi hna bawmhnak le Lairam serthannak caah bawmhnak na tuah tikah minung pakhat nih "a sawm" in ti si lo in, "a za in maw, a thong in dah" tiin ruah kan hau. Laimi cu ngeihchiah um ek in inn lo a dirhmi kan si. Inn lo a rawk ahcun ngeihmi zei hmanh a taang ti lo. Lungretheih le tuar a har ning hi hngalh piak thiam in bawmhnak hi kan umnak khrihfabu cio ah pe cio hna usih.

North America [USA & Canada] ahcun CBCUSA ah kuat ding a si lai:

CBCUSA
7105 Chimney Rock Ct
Indianapolis, IN 46217

[tang] Hakha 

[tang] Hakha - Gandaw Lam a minmi

Hakha Khua Dawrhlun