CHIN BAPTIST CHURCHES USA [CBCUSA]

                                                                     

CBCUSA SCHEDULE

November 2014 - June 2015

1.   November 13-16, 2014: International Lai/Chin Christian Leaders  Meeting, Lawngtlai, Mizoram

2.   December 03-04, 2014: CBCUSA Officers Council Meeting, Dallas, TX

3.  March 06, 2015 Friday: ICBM Consultation, Marshalltown Chin Baptist Church, Marshalltown, Iowa

4.   March 06, 2015 Friday 6:00 pm – March 07, 2o15 Saturday 11:00 pm: CBCUSA Board of Trustees Meeting, Marshalltown Chin Baptist Church, Marshalltown, IA

           (a)  BT Palai cu March 06, 2015 Friday 04:00 pm hlan ah phanh ding.

           (b)  BT Palai cu 05:00 – 06:00 pm ah zanriah ei ding
           (c)   March 08, 2015 Sunday: Marshalltown CBC ah hman pi hna usih.

5.   June 05, 2015 Friday: CBCUSA BM meeting, Zophei Christian Church, Indianapolis, IN

(a)  CBCUSA BM palai cu June 04, 2015 Thursday ah phanh dih ding.  Zan ah Pathian thangthatnak a um lai.

(b)  CBCUSA Officers le Department Lutlai (2013-2018) hna thimnak (Election) tuah ding. 

6.   June 05 – 07, 2015 Friday – Sunday: CBCUSA TRIENNIAL CIVUI (CONFERENCE)

(a)  June 05, 2015 Friday @ 06:00 pm in Civui Pathian thangthatnak thok a si lai.  Hi ni cu Laitlai Chins le ramdang khual upa hna le hlaremhbu hna cu Indianapolis, IN ah kan khat lai. 

(b)  Hi Civui zawh ve ding in Lairam Jesus Christ Baptist Church General Secretary le Choir bu kan sawm hna. 

(c)   Laitlai Chin hlasakthiam an tling lai. 

(d)  Civui zawhmi hi 5000 tal kan si men te lai.  Indianpolis, IN hotel dihlak hi booking tuah cio ding a si lai.  Israelmi hna nih sunglawi tuk in Jerusalem ah Lanhtaak Puai an urhsaih bantuk in, mah le mawtor cio in Laitlai Chin khuapi, Indianapolis, IN ah Pathian cu thangthat sunparnak kan pek ti hna lai.  A nuam tuk hrimhrim ko lai.

To God be the glory!

SIANGBAWINU ELIZABETH JOHNSON UPAT PEKNAK ROCA PEKNAK

CBCUSA Nubu nih upat peknak roca le laksawng an pek.  Siangbawi Johnson te chungkhar hna hmanthlak van hmuh ahhin thinlung nih phun dang ngai in a tem.  An nonal lio le duh an nun lio caan ttha hna cu Lairam khuapi Hakha khua ah an rak hman hna.  Lairam cu ram nuam a si lo, ram harsa te a si.  An rak i nuamhnak cu Pathian Fapa Khrih an dawtnak le Laimi an kan dawtnak hi a rak si ko.  

Lairam ah siangbawi nupa karkhuah 7 kan ngei.  An rianttuannak kong ruah ah minung nunnak hi ruah awk a tam tuk.  Khrih ruang ah harnak tuar hna hi an nunnak ah an i lawmhnak le an lungsi bik mi a rak si ko.

Kei nih cun siangbawi te kong ka rel can le mi nih an chim can ah kan mitthlam ah a cuang bik mi cu Lengno Zing Biak Tha a si.  Amah cu tleirawl kum no a si.  Siangbawi Rev. Arthur Carson le Laura Carson te thil a phur ve.  An kalnak lam pi ah siangbawinu he an i zuldawi.  An i kom.  Hakha an phak zan cu Siangbawinu Laura Carson cu a ttap thluahmah ko, hnemh khawh lo in.  Siangbawipa Arthur cu a khuaruah a rak har tuk.  "Hi ka hmun lawng hi Pathian rianttuannak a si lo, na duhnak hmun ah kan kal ko lai" a rak ti.  Hakha khua in an kir deng ko lo maw?  Thin a phang thluahmah.

A thaizing cu khua a dei.  An kuli phurtu hna cu an hlawh hlam ah an ra hna.  Zing Biak Tha cu panh hirhiar tein siangbawinu cu a rak chawnh.  Holh cu i theih lo zong ah muihmai in i chawnh khawh a si.  Hmai panh tein "bye . . bye. ." rak ti dawh khi a si.

Zing Biak Tha hmai panh te cu a hmuh tikah mitthli le hnap duk he zan khua a dei mi siangbawinu nih cun Henry Drummond nih a rak chimmi "Dawtnak hi vawlei cung ah a sungbik mi thil a si" timi bia cu a van thei.  Cu ti cun, Hakha ah siangbawipa he rian ttuan ding cu aa thim tthan.  

Chinram ah American Baptist siangbawi hna rianttuannak tuanbia an ttial tikah a hmaipanhnak le a duhnunnak te nih siangbawinu kha a hrinthan tertu Lai nungak tleirawl te hi aho nih a min kan hngalh lo caah 2008 CBFA Civui, Dallas, Texas ah Zing Biak Tha tiah min ka sak.  

Khrih Thawngtha a phurtu siangbawinu Laura Carson thil ner lengmang in a phur mi Zing Biak Tha hi Khrih nih a caah nunnak pek in a khamhnak Thawngtha le vel hna kha a rak thei manh ve hnga dek maw?  Vanram nuam ah a leeng kho ve hnga dek maw?  Hngalh lo in a phurhmi Khrih bia tal nih zungzal nunnak laksawng cu a co ter kho hnga dek maw?

Kannih cu kan van a ttha tuk.  Khrih dawtnak le vel a sunlawinak a temtu kan si!  


Muicuang le hla hna hi:

1) Siangbawinu fanu Ruthi nih a nu caah laksawng a lak lio a si.  Hakha ah kum 17 tiang a um.  Laiholh a thiam ngai rih.

2) CCOC hla an si.  CCOC cu Lai ngaknu le tlangval hna nih nunnak tiang pe in Khrih Thawngtha an aupi nak hla an si.  Hi mission rianttuan lio Lairam a hngakmi upa deuh kan caah cun lung a leeng kho ngai.  

     "Nunnak hi ka caah zeidah a si?  Kei ka caah cun nunnak cu Khrih a si ko. 
     Cu caah thihnak nih hin a ttha deuh chinchin mi thil hmanh a chuahpi lai."
                                        [Filipi 1:21] 

KAN THINLUNG AH CCOC

Miphun hawi zumtu hna:

A tu bantuk in chan a tha rih lo. Pethlaihnak a um lo.  1983 kum ah Chin Baptist Convention (Former ZBC) nih CCOC Thawngtha Chimnak cu zumhnak in a thok. Kum 31 a si cang. A tu lio ah kum 40 cung khrihfa upa a tuan lio mi hmanh nih i cinken manh ding a si lo. Kei tu cu Thantlang ah ZBC civui pi ah hi program an thok ahhin kaa tel ve. MIT, Insein, Yangon ah Bible sianginn kum thumnak ka kai kum a si caah fiang tein ka hngalh.

CCOC palai hna cu ZBC civui a donghnak pumhnak ah Bawipa fialmi rian ttuan ding in an ruksai thil phurh le an chuncaw dur le nithawng phurh bu in thlahnak an tuah hna. A tu ah kan pa le Rev. Za Khar, Khampat le Rev. Sang Heih, Hmunlipi pahnih hi pastors tuan lio in a kal hmasa mi an si i fiang khun in ka theih hna. Kan pa Rev. Za Khar nih tampi a kan chimh khawh lai. Hi lio ah Chin zumtu mipi hna mit in Khrih mitthli a rak luang. Kan rak celh lo. Kan hrawk a fak. A tu lio mino si ulaw cu nan ttang nan i cum hnga, nan kut nan thlir in nan au len ko lai. Hi lio ahcun Chin zumtu mipi thinlung ah a chung in lawmhnak le ngaichiatnak aa cawhmi mitthli a rak luang. Hi CCOC rianttuannak ah aa pumpe mi Pathian riantuantu tampi an um hna. Kan chim hna sehlaw hngilh lo in an bia kan rel kho hnga!

Thawngtha chim ah thlah an si. Thawng a thang. "Zumtu thar cu zat kan hmuh hna" tiin thawng cu a rak thang lengmang. A thong in zumtu thar cu tlaih an si. Khrih khamhnak lawmhnak thawng nih kan Chinram cu lihninh bang a hninh ko. Bible sianginn kan dih in Lai khua te ah pastor rian cu kan ttuan cio hna. Thlang Chinram cu cuan in Khrih Thawngtha cu pulpit cung in kan au cio hna. Ram thar ah kan kal ve lo nain, pastors kip nih kan aupi. CCOC Revival Teams hna cu Chak Chinram ah an vak. Thawngtha an chim. An rianttuannak kong an kan chimh. Nuhmai le pahmai an tho. Vok le ar te an hlut hna. Chin lothlo nu le pa nih an rawlruk in rawl an leh. CCOC caah an ti. Khrih ramkauhnak caah an hlut. Chin zumtu hna lawng si lo in, an zuat sattil arva le thlai ti hna zong nih CCOC kong cu an aupi hna. Thlarau Thiang cu Chin zumtu mipi sin ah thli bang a hrang. A nuam taktak ko.

CCOC Thawngtha lawmhnak lawng si lo in, Thawngtha phurtu palai hna thih thawng cu an thang than. Nungak Ngai Za Siam (19) le Bual Cung, Dawn khua le palai dangdang hna nih Khrih vailamtah put in mual an liam thawng nih Lairam dihlak a cul than. Lawmhnak si lo in, ngaihchiatnak mitthli cu a luang than. A bik in, an ttuanpi hawi CCOC palai hna nih an tuar kho lo. Mitthli nih Khrih Thawngtha a chim hnu ahcun Vailamtah hmual cu A tthawng tuk cang. Ram thar ah a kal kho lo mi hna nih zumhnak in an hacang an rial cio. Thawhlawm cu a karh thluahmah. Zumhnak in thlahmi missionary hna cu ti le rawl in an tlacham lo. Jehovah Jireh nih zei kip a khaan taktak. Hi hi CCOC zumhnak in rian a ttuanmi a si.

AD 2000 in CCOC rianttuannak cu baan a si. Kum 13 a rauh hnu ah Chin mipi upa deuh hna thlarau nih a ngaih zungzal mi CCOC Follow Up Mission cu ICBM tiin July 13, 2013 ni ah CEBC biakinn, Indianapolis, IN ah kan thok than. A tu lio kum no mi hna nih kan ngaihmi miphun hawi thlarau tlaumi hna tlaihnak cu theih ter a har taktak. Zumhnak in rian kan ttuan lai van ti hi ICBM kong kan ceihnak cabuai le tthutdan lawng nih i cinken ding cu kan duh ve lo. Chin maivan kip le blogs hna hmang in kan au hna. Kan au zungzal lai. Kan fa le dihlak nih nan au dih hlan tiang chim le rel kan dai lai lo. Chin nutung le patung no rual le Chin mino nan dihlak Khrih ah thawh caan a si cang. "Maw Lairam/Chinram, na duh i thim cang tuah, na Bawipa rianttuan maw naa thim deuh lai? Aho rian ttuan dah!"

CCOC hlasak ngaih ding hi www.lairambawiparam.blogspot.com ah tampi a um. Can na pek khawh ahcun Khrih dawtnak nih an cawi taktak ko lai.

Bawi Khrih rian ah,

C Duh Kam, EM
CBCUSA

INTERNATIONAL CHIN BAPTIST MISSION [ICBM]

(CCOC Follow Up Mission)

Vawleicung theologian minthang Emil Brunner nih Mei cu a kangh lawng ah a nung.  A kangh lo ah cun a thi.  Cubantuk in Khrihfabu cu mission a tuan lawng ah a nung.  Mission a tuan lo ah cun a thi a rak ti. (As fire exists by burning, the church exists by mission.  If there is no burning, there is no fire; if there is no mission, there is no church).

Khirhfabu tuanbia kan zoh tikah, mah hi a hmaan ngaingai.  Khrihfabu nih mission a tuan tik poah ah Khrihfabu a thangcho i, mission rian a tuan huam lo tikah Khrihfabu a tumchuk.  Karen pawl nih Kachin ram le kan Lai ram le Mru pawl sin ah mission an tuan chung poah hi an Khrihfabu a rak karh i, a tu hi Mru pawl sin lawng i an tuan tik ah kan Khrihfabu a thangcho kho ti lo tiah confess an tuahmi hi voi tampi ka theih balmi a si (Dr. Honor Nyo zong nih a ka chimh bal).

Kan Laimi zong mission rian tuan kan thok in thancho kan i ot ka ti ah cun ka palh lai lo dah tiah ka ruah.  Rev. That Dun le Rev. Pa Hrek thlanglei Laitlang i mission rian an tuan thok in thancho kan i thok rua tiah ka ruah.

CBCUSA chungkhar pawl zong, mission rian a tuanmi Khrihfabu poah an thangcho ti in ka ruah ko.  CBCUSA hrimhrim zong hi mission riantuan a ngol ah cun a thi ko lai tiah ka zumh.  Mei cu a kangh a hauh bantuk in CBCUSA zong mission rian a tuan a hau. Cu lo ah cun a thi ko lai.

Cu mission rian kan tuannak ah ICBM kan timi cu a muisam lang in CBCUSA aiawh in rian a tuanmi cu a si.  Krhihfabu nan dihlak in thawhvo kan in khinh hna.  Nan hmai cu kan in khap ruam hna lo.  Asina in kan ruah than mi cu, hi rian hi a ho pumpak minlanghnak caah kan tuahmi a si lo.  Mi vialte nih Jesuh Khrih cu Bawi an si tiah an au khawhnak ca ding tu ah a si ko.  Atu tiang Khrihfabu nih nan thawh cuahmah i kan Ngunkeng sinah nan kuatmi phaisa zong kan rak hmuh lengmang i kan i lawm.  Nan thawh cuahmah rih lai i, kan tlamtlinh te ko lai tiah zumhnak ka ngei.

Thawhvo kan in khiahmi hna tlamtling te in nan rak thawh khawhnak ding ah, thla kan in campiak hna i,  nan thawh dihnak lai zong Bawi Khrih min in kan in nawl hna.

Nan riantuan hawi,

Cung Lian Hup

Director of ICBM