CBCUSA Thawngthanhnak

Pathian nih Chin miphun rianttuan a kan fial.  Thazang a kan hlumter.  CBCUSA ah chungtel dihlak 40 kan si cang.  Bawipa ram kauhnak le kan miphun caah kan ttuan khawh mi a tam ngai te ko lai.

Laimi cu sifak kan si hna caah rianttuan ding a tam taktak.  Thlarau, pumsa le fimnak in kan tthancho khawh nak ding ah biatak chuah kan hau.  Lairam cu Pathian nih a serning kutneh lawng in a taang rih ko.  Ramdang ahcun Pathian kutneh a lang ti lo.  Pathian nih a serning tein a ummi Lairam hi a rawk in a rawk cuahmah.  Kan ser ve a hau.  Pathian bia nih a sermi miphun kan si caah Amah bia hi kan miphun sernak caah a ttha bik.  Cu caah, Khrih Thawngttha kan chim lai.  Kan ram a tthangcho ko lai.

CBCUSA BT Meeting:

Hmun: Dallas Chin Baptist Church, Dallas, Texas
Ni: October 15-16, 2011
Phak Ni: October 14 Friday

Theih Herhmi:


Kannih Laitlai lei ah CBCUSA cu biaknak in kan i hlumnak a si. Laimi lakah hmaisuang ah a kalmi cu kan si rih lo. Cu hlan Laimi sining zoh tikah kannih cu sifak santlai lo deuh kan si hna caah thil pipa taktak ah hawi kan tluk lo ngai rih. Rianttuan kan timhmi paoh hi a thar in thok hau lengmang kan si. Laica le holh ca rianttuannak zong ah hawi dang bantuk in phaisa ngeihcia kan ngei lo. Nain, duhnak kan ngeih hna caah Laitlai pawl hi Lairam ah kan khuasaknak hmunhma a kauh bantuk in CBCUSA nih a rianttuannak hmun zong Paletwa peng in Chaklei Lairam vialte aa tel dih. Harnak tawn tikah Falam le Tedim le Thlang Laimi caah bawmhnak a tuah ve ko. Miphun dang hna caah rian a ttuan ko. Laitlai dihlak hna caah rian a ttuan caah a lohma a kau. Midang cungah thinlungput ttha ngei in rianttuanmi si hi kan zalonnak le thanuamnak a si.


Lairam Jesus Christ Baptist Churches (LJCBC), Lawngtlai, Mizoram zong nih hmun khat ah rianttuan an duhnak an langhter cang. An civuipi ah biakhiahnak an tuah cang. Kannih zong nih official tein kan caih ve lai. Hi hi a biapi ngai. Mizoram um Laitlai hna he rianttuan tti hi a biapi ngai. Mizoram Laitlai ahhin Mara zong kan telh chih ko hna. Saiha ah Laiholh thiam an tam tuk. Mara le Lai district upa cu kanmah phun hawi khat lawngte an si ko. Laiholh aa hrawm kho ding mi kan si dih. Mah holh te lawng in rianttuan timh ahcun a bi tuk caah Laitlai dihlak huap in rianttuan hi biapi taktak a si. Nihin Lai upa nih kan tlolh ahcun kan sungh ding mi thil a ngan tuk. Cu caah, lungfim tein khuaruah kan hau. Kan i dawtnak lam kha hawl a hau.


Mizoram zong ah a cunglei Laitlai pawl hi economic le political power an ngei kho lo mi santlai lo deuh an si tthiam. Mizo he kan i dawt khawh ding hi a biapi tuk fawn. Kan i dawt khawhnak ding ah dirhmun i tluk deuh kan hau. Hawi kan tluk hna lo ahcun mi nih hngalh maw hngalh lo in, tang chiah a awl te. An palh ti awk a ttha thlu tawn lo. Minung phung hna a si pah ko. Cu caah, BIB (Burma, India, Bangladesh) Laitlai pehtlaih tthat hi a biapi taktak. Aa thok rih lo. A tu in chunmang manh thok ding khi kan si. Khi tikah Laiholh le Laica a tthang lai. DVD le CD zong kan i hrawm kho lai kan ti mi bia kha a taktak in a cang te lai. Pathian ram kauhnak caah kan ttuanmi rian nih a chuakpi ding khi a si ko. Khrih caah rianttuantu kan si hna caah kan tlangholh cu dawtnak a si lai. Dawtnak he rian kan ttuan ahcun mi nih a ttha in an kan tem khawh ve ko lai.


Laimi lakah dawtnak he tlik aa zuam ding cu kan si zungzal lai. Ruahnak bi deuh thil cu kaltaak in zapi nih kan i hrawm khawh ding mi ah tel khawh ahcun hmailei ah thazang kan ngei chinchin lai. North America ah a ummi Laitlai khrihfabu vialte kan i hlum tikah cun Pathian ram kauhnak caah le Lairam caah rianttuan khawh mi kan ngei len te ko lai. Khrihfabu fate kan si zong ah bawmhmi si lo in, mibawmtu dirhmun ah kan si khawh chung in kan i zuam lai i, kanmah zong kan tthang ve lai.