Pathian Timhtuahnak Dah lo ahcun

Laimi kan tuanbia a no tuk. Kan vawlei hmanh a no tuk caah khur chung chuak lungvar le zinan zong a um kho lo. Nihin ni ah Laimi nih hi dirhmun kan phak khawh hi Pathian nih a kan khaanpiakmi a si hrimhrim. Laimi tiin chim ahcun a kau tuk deuh. Nihin ah hi dirhmun ah nang le kei kan phak khawh hi khuaruahhar tuk a si. Lairam in kan i kenmi leiphit a thian hlan ah Pathian nih cung ah a kan cawi. Kan miphun hi a cawisan. A kan dawt hrimhrim ko. Kan sin in a dawtnak a lak tthan sualnak hnga lo, ttihzah le upat pe usih. Sunpar luchin chinh ter zungzal usih.

Van nih khin Pathian sunparnak an chim (The heavens declare the glory of God) Ps. 19:1.
A sermi thil vialte hna hi Pathian lamkaltu an si dih. Nang le kei zong Pathian nih a lamkaltu ah a kan thlah. Fiang tein hmu kho usihlaw vawlei dihlak hi Pathian biakinn an si ko hnga.

CBFA Civui III

CBFA Civui cu a nai cang! CBFA chungtel khrihfabu 19 kan si. A lut ding an um rih hna. Hawikom Chin khrihfabu an um rih. Civui zawhmi kan tam lai. 2008 CBFA Civui lio ah hlaremhbu pakua an i tel kho. 2010 CBFA civui ahcun hlaremhbu tamdeuh an i tel kho lai tiah kan ruah. Dallas, Texas in Chin Baptist Church le Texas Chin Baptist Church mino cu vanlawng ticket an i cawk cang hna. Civui tuahnak hi BWI airport he aa naih te. Khrihfabu a tam deuh cu mawtor lianpi pawl in a bubu in an ra lai. July 02, 2010 ni i khual don lai cu upa deuh pawl hmanh an thin a tur pah ko cang. Mino caah ahcun chim hau lo! Lairam i ZBC civui bantuk a si lai. Hlaremh, quartet, duet, le solo a tam lai. Phungchimtu ding zong a thiam taktak mi an si. Tu tan civui cu kan i ngaih taktak ko hih.

Hlan lio ah Jesuh Khrih Thawngttha vawlei khua za kip ah a aupi mi Khrihfab ram hna cu an thi a kik tuk cang. Pathian nih a thawngttha chim ding ah a thimmi Chin miphun zumtu hna nih Pathian bia le hla cu thinlung le thlarau in kan chim i kan sak ding a si cang. Vawlei siangpahrang nganbik umnak Washington, DC ah Khrih cu sunpar le lianhngannak pe in thawngttha aupi ding kan si. "Khrih caah leikhuaza Chinmi" tiin Chin mino vialte hi Pathian kut ah kan chanh hna lai. Ramdang Chin miphun hawi zumtu hna nih thla kan cam piak cio u.

Khualtlung tawlrel a awl deuh khawh nak caah CBFA website chungah Registration tuahnak a um. Hi Registration Form hi hmet law na tuah khawh lai.

CBFA Civui mitthlam ah cuan ter tthan ding ah:

2008 CBFA Civui (Dallas, Texas) hlaremh hi ngai tthan hmanh u.
(1) Battle Creek Chin Baptist Church hlaremh
(2) Jacksonville Chin Baptist Church Hlaremh
(3) Chin Baptist Mission Church Quartet

Bawi Khrih rian ah,

C. Duh Kam
CBFA Executive Minister
Washington, DC

Hringtu Nu Ni (Mother's Day)

May 9, 2010 Hringtu Nu hna Ni kan phan tthan. Ka nu dawtnak aw nem te cu ka hnatlam ah a leng. A mithmai cu ka mitthlam ah a cuang tthan. Kei ka caah van ram nuam lawng ah ka nu cu ka ton khawh cang lai. Nu le nunglio a ngeimi nih dawt kha philh hna hlah u. Vawlei cung ah a thlumbik mi nu cu kan nu le hi an si.

Hringtu nu hna upat le ttihzah peknak caah vawlei cung ram kip nih Mother's Day cu an lawmh cio. Nain, a ni bel aa dang. Kanmah bantuk in, May 9, 2010 ah a lawm mi ram hi an tam bik.

Hringtu nu le cu upat pek lo awk an ttha lo. Thla kua chung a kan pawi. An pum in himnak an kan pek. Hi thla kua chung vialte kan nu le cu kan damnak sizung, ti le rawl einak coka, ti lungduh dinnak tikhur, lumsa tein zaunak ihkhun, ni linsa lak in kan i dawrnak thladem, chuk le cho aa dang lo mi kan lamthluan, kan i lawmhnak hmun, kan hni le puan, nunnak thisen le thluak tiang in a kan hrawmhtu an si. Harnak fak bik tuar in, thisen he a kan hrin. Ti le rawl a kan pek. A kan pawm. A kan puak. A kut in harnak chung in kan luat khawh nak hnga a kan khamkanh. A sung bik mi cu a dawtnak thinlung a si. Cu dawtnak thinlung nih kan cungah mithmai panh tein a umter. A mithmai zoh ah duh a nung zungzal. Mah le ca cio ah hringtu nu cu siangpahrang bawinu bantuk an si. Aho nu hmanh nih an tluk kho hna lo. A nunnak cu fa le ta, fa le nunnak cu hringtu nu ta an si.

Fa le caah saduhthahnak nganpi a ngei. Chunmang a man peng. Zanmang ttha deuh hmanh khi, fanu le fapa caah si seh tiin. Fanu le fapa le nih hawi tluk lo lai a phang zungzal. A dawt bik mi fanu/fapa nih a chimh a ngaih lo tikah mitthli he khua a sa. A mitthli cu "a dawtnak ca in ttial" bantuk a si. Thla a cam. Van a zoh. Bawmtu a kawl. Pathian sin ah thazang a la. A fa le cu Tukhal ttha kut ah a kan chiah tawn. Nu le dawtnak cu cham khawh ding a si lo. Dawtnak lei kan baa tam ko.

Zarhpini Mother's Day ah Pathian thangtthat ding in i tiim hna usih. Kan nu le kha upat le ttihzah pek cio ding in.