Bawipa Thangthat

Thursday, January 29, 2015

ICBMC THLARAU TLAU TLAIHNAK MISSION

[tang] ICBM mission field

[tang] Ohphu Biakinn, Kanpalet sak lio mi

[tang] ICBM nih zohkhenhmi siangngakchia


[tang] Sayama Sui Doi le chungkhar sakmi APyaing biakinn, Kanpalet
Rev. Simon Thawng Hmung le Rev. Bawi Lian Thawng nih onnak 
an tuah pi hna.  



[tang] ICBM nih sak lio mi biakinn hmai ah lunglawm tein.
Hi hi pei mission rianttuan nuamhnak a si ko cu!
Aa lawm mi an um caah kan thlarau cu a cawl ve.

[tang] Bangladesh ah Bawm [Lai] ngaknu pawl an lam lio.
Pathian nih miphun khat si zong aa thei bal lo mi kha a thar in
a kan ton ter.  Evangelical Christian Church [ECC] in rianttuan hawi nih
an kan kuatmi an si.


"Khrih pennak cu a kau chinchin lai, nangmah thanwg in."

Tuesday, January 20, 2015

JESUH KHRIH THAWNGTHA NIH PATHIAN PENNAK CU A TLUN TER

Hakha khua fate ah an rak phan. Khrih Thawngtha caah nunnak an pek.
Santlai lo Chin miphun kan caah Khrih tuartemnak an i hrawm.

[tang] Hi Lai tlangval caah zeitluk in dah Khrih kong theih hi a har hnga?
Khrih kong cu Bawmtu Thlarau nih lungpemnak a pek hna.
Khrih cu Bawi le Khamhtu ah an pom.
An hrinthan.



[tang] Nihin 2015 Hakha Khua
Jesuh Khrih nih Pathian Pennak kong a chim tikah chang ah thlahmi thilnu le 
antam ci hna a tahchunh tawn.  Vawi lehkhat ah vut tiah cang kho a si lo.
Duhsah tein a ciah a ciah hnu ah thil lianngan a sinak kong a chim tawn.
Khrih Thawngtha nih vawikhat te ah Hakha hna hi a ser lo.
Nain, kum 100 reng lo kan kal tikah hi dirhmun ah a cang.
Kan Lairam le kan miphun ah Pathian Pennak a tlunnak caah can sau pi
hngah kan hau.  Cansau pi ca in khuaruah kan herh ve. 
Pathian sin ah thlacam kan herh.





[tang] Siangbawi te thlan



[tang] Thantlang ah New Eden Garden ah tilionak a si.
CRDP nih an tuahmi a si.


[tang] Ramdang hrinsor le thang lio Lai fanu le fapa kong hi fak piin ruah kan hau.



Ramdang hrinsor le thang lio hna hi Pathian bia hi Laica le Laiholh in 
cawnpiak an hau.  Hi lawng ah Laimi kan chan hi an peh khawh lai.
Kan miphun lawng hlah, vawlei ah Khrih ceunak an si kho lai.

Huam tuk lo zong ah Bawlung chuihpi an hau.
Khrih zong bualrawn ah a chuih ve a hau ko cang.  A pennak a tlunnak ding caah.

Upa le mino zong kan i kawm lai.  A pennak chung ah a leengmi kan si.
Upa nih kan dawt hna lai.  Mino nih upa cu an tihzah ve hna lai.
Dawtnak . . . Agape . . . Dawtnak

Kan rak chuih bal cio ko, kan thiam ngai ve ko. Kan no lio ah.
Kan thinlung in kan in chuihpi hna.  Khrih nih an chuihpi mi hna hi cu
philh hrimhrim hlah u.  Teitu cu Amah a si kha philh hlah.
Na nun a tluang lai.  Thluachuah na hmu lai.

Khrih cabuai cu kan kil ti hna.
Washington, DC ah a si.  

[tang] Rev. Timothy Pa Hrang hi Pathian a duh lawng hmanh si lo in,
kan miphun kong ah a ngamh a sang taktak.
Chinmi dihlak nih Khrih cabuai kan kil khawh nak ding ah 
hmun kip ah mi a sawm hna.  Nepyidaw lei ah bus in kal lio.

[tang] Khrih cabuai ah kan miphun dihlak hi thut ti hi kan duh bik mi a si.
Nikhat khat ah Khrih a ra than lai.  A pennak hi kauh ter ding ah rian a kan fial.




Tuesday, January 6, 2015

INTERNATIONAL CHIN BAPTIST MISSION 
[ICBM]


"Chin Mission Hmanthlak Sermon"

 [cung] 1899 kum hrawng i siangbawi nu le pa nih Hakha khua an rak phak lio
Lai tlangval pawl cu a cung i hmanthlaknak in an rak chia deuh rih.  
An biar le lupawng cu a chia ngaingai.  Lai nungak aa dawhbik bik zong 
thim kho an si.  Tu chan Lai lengnu rual nih thim duh hna hnga ri!
[cung] Siangbawinu Laura cu Laimi sining a tuar kho lo.
Hakha an phak zan ah a tap thluahmah ko. 
A pasal cu "Arthur, ka si kho lo. . . ka si kho lo . . . ka si kho lo. . ." a rak ti. Siangbawipa nih "hi ka hmun lawng hi Pathian rianttuannak a si lo. . . hmun dang ah kan ttuan kho ko" 
a rak ti.

A thaizing cu khua a dei.  Hlawh hlam ah Lai kuli phur pawl cu an khua lei tlun pah in an sin ah an ra.  Hi lio ah hnipuan cu i hruk rih hna hlah kaw, thurhnawm taktak in tak le kholh bal lo cu si hna, Siangbawinu lung cu a rak dong tuk. A lung a rak rawk tuk.

Kuli phur mi lak ah Lai lengno tleirawl te Zing Biak Tha cu a hnuk bo nawn tein a tak lawng ngacha tein siangbawinu cu hlawh hlam pah in a rak chawnh biak pah.  A hmai te cu a panh tuk.  Siangbawinu he lam pi thluangthluan rak i zul hna kaw i tlaihchannak te an rak ngei.  Zing Biak Tha nih a hmai panh bu tein "bye, bye" rak ti dawh a si.  A bia cu a cingmi an um lo. 

Cu cang ka cun, siangbawinu nih Henry Drummond nih "Dawtnak cu vawlei cung ah a sunglawi bik (Love is the greatest thing in the world" tiah a rak ti mi bia kha a van thei.  Hi miphun hna caah pei Thawngtha chim ding ah fial kan si tiah  aa fiang.  Khrih Khamhnak Thawngtha cu kan Laimi sin ah chim an rak thok.

Lai leng rual sin ah biahalnak

A cung bik ah a ummi Lai tlangval pawl hi nan va duh hna lai maw? 
Nan benh duh hna lai maw?

Laimi cu hi bantuk dirhmun in Khrih Thawngtha nih atu kan dirhmun ah
a sermi kan si hi philh hlah u.








Atu ICBM mission rianttuannak hmun ah khua a sa mi kan miphun hawi hna cu
a cung lei Lai tlangval hna bantuk dirhmun ah a um rih mi an tam.  Vawlei sinak in a hnufual 
taktak mi an tam.  Khrih khamhnak an theih rih lo.  An theih lawng ah kanmah bantuk in
pumsa le thlarau in khamhnak an hmu kho lai.

Cu caah, thothan Khrih nih "Va kal ulaw ka Thawngtha va chim u" tiah a kan ti.


 ICBM rianttuannak cu July 13, 2013 ni ah Chin Evangelical Baptist Church, Indianapolis, IN
ah Pathian sin ah pekchanhnak tuah lio a si.  Kan miphun cu Khrih Thawngtha caah 
pek a si.  Cu thok in kum khat ah minung pakhat $25 in thawh a si.  



[tang] ICBM nih a thlahmi missionaries an si.  Maymyo ah training an kai lio a si.
Vailamtah hram ah kan phak pi mi thlarau vial te hna cu kan suiluchin dawhtertu
an si te lai, cu sui khuapi dawh le nuam ahcun.

















CCOC HLA: ccoc mitthli


Biahmaithi:

Kan si khawh zin pan ahcun minung hi tam deuh in i but cu a ttha deuh.  Khrihfabu hna hi a lianh ahcun office rianttuannak ah hmanmi phaisa kha a tlawm deuh.  Rianttuannak thazaang a ngei kho deuh.  Hmun khat ah mi tam deuh kan um tti paoh ahhin fimnak aa chap.  Kan bu a nganning rup in mui le sam zong aa ser kho.  I dawh deuhnak a si.  Thinlung pipuam an ngei kho deuh tawn. 
Lairam khuapi Hakha khua khi khuate lei vialte nih rak fuh hna sehlaw minung 100,000 nih kan hngah khawh ahcun can rau lo te ah kan dihlak in kan fim deuh lai.  Kan i dawh deuh lai.  Kan rum deuh lai.  Khuate nu le pa vialte hna nih khuapi mui an keng lai i chan an man deuh hrimhrim lai.  Khuate in khuapi ah a pem tuan paoh an nunnak a rem deuh ko.  An ngeih lem lo zong ah an multlor deuh hrimhrim ko.

Cu caah, Laimi bantuk miphun tlawmte nih cun a lian lei paoh hi kan i thim/ham awk a si.  Khrihfabu zong i tthen lengmang lo in, hmun khat te ah Pathian biak tti khawh nak lam hi kawl kan herh chin lengmang.  Kan fa le hi pipa deuh in kan tthan pi khawh hna lai.   A tthen cia mi khrihfabu fa deuh nih cun i fonh khawh tthan nak ding lam cu kawl a phu ko.  Kan tthatpi deuh hrimhrim ko lai.

Pathian nih kan miphun caah khuakhanmi

Ram dang ah minung tam ngai kan kal nain, Lairam ah hrinsor fanau thangthar an tam ve hrat i Lairam milu an ttum tuk lem lo.  Hi hi kan miphun caah thawng tha a si.  Kan herhmi cu zeitindah kan i hlum khawh lai i rian kan ttuan tti khawh lai ti hi ruah a herh deuh cang.  Ram dang kan um zong ah nu le pa le pi le pu hna chuahsemnak Lairam cu kan philh hlei lo.  Pathian sin thlacamnak he kan ram te cu dirkamh ttaangmaang kan i tim ko hna.  Laimi thinlung cu Pathian nih a theih.  Khuaruahhar in lam a kan hruai chin lengmang ko.

ICBM rianttuannak Pathian Program 

ICBM cu ZBC (atu CBC) nih 1983 in 1999 tiang a rak ttuanmi COCC rianttuannak pehzulh hi a si.  COCC rianttuannak cu a min sakmi hrim ah kum zabu pakhat (kum 100) chung ah Chinmi vialte khrihfa ah can ter ding ti mi chunmang a si. ZBC nih Pathian bawmhnak in tamtuk an ttuan khawh.  An i tinhmi tiang an ttuan khawh ko.  An lohma kha pehzulh ding in Pathian nih ram dang ah Laimi thong tam ngai a kan thlah hna.  Cu caah, CBCUSA nih ICBM cu Pathian sin ah July 13, 2013 ni ah Chin Evangelical Baptist Church, Indianapolis, Indiana ah pekchanhnak a tuah.  CBCUSA civui July 2012 ah a rami zumtu 3500 hrawng nih hnatlaknak kut an thlir caah khuakhang laireltu hna nih Pathian bochan in ral tha ngai in kan miphun cu A rianttuan ding in Pathian kut cak ah pekthannak cu an kan tuahpi.  

ICBM cu kan miphun Pathian a thei lo mi thlarau tlau hna tlaih tthannak program a si. Miphun kan ti hnu ahcun Khrih vailamtah ttanhnak thlarau le miphun dawtnak thlarau aa tel chih.  A tthawng tuk mi thlarau pahnih aa komh.  Biatak chuah lo hi Pathian lawng si lo in, kan miphun hawi hna hmai khah lo ding phun in kan um. Pathian min in aa hlummi cu zohchuk mi miphun cu an si bal lo.  A dirkamhtu hna cu Jehovah Pathian a si.

Cu caah Australia, New Zealand, Malaysia, Delhi, India le North America ah a ummi Chin churches tampi kan i tel hna.  ICBM hi kanmah tuah khawh mi a si lo.  Pathian program a si ti hi kan fiang ko lai dah.  Hi tluk program a lianmi hi Bawipa hnatlaknak tel lo in minung nih tuah khawh ding a si lo.  Santlai lo miphun fate kan si ko nain, Khrih caah nunnak a pe ngammi miphun kan si caah Pathian nih laksawng ah a kan pek ve.  A thluachuah hamnak caah a kan khanpiak.  Hi bantuk rianttuannak ah aa tel kho mi sinak kong hi mah pumpak le khrihfabu cio nih Pathian khuakhanning khuaruahhar hi ruah a phu taktak.  Pathian nih miphun fate Chin miphun hi thinlung thlarau in miphun ngan le thluachuak ah a kan sernak a si ti usihlaw kan palh lai lo.  Pathian cu miphun fa te sin ah rian a ttuan duhmi a si caah Laimi he rianttuan hi A zak lai lo.  Aa lawm tuk ko lai.

ICBM rianttuanning

Gangaw, Kanpalet, Mindat le Paletwa peng ah missionaries 60 hrawng a thlah hna.  ICBM Myanmar director le field directors pali cu missionaries hna he rian an ttuan tti hna.  Hi peng pali chung i Association rianttuantu hna cu khrihfabu santlai an um lo caah an hlawh te zong bawmh pah an hau hna.  Biakinn le centers sakpiak ding le santlai lo ngakchia sianginn kainak bawmhnak kha a tuah hna.  Thlarau tlaumi hna cu Bawipa sur chung ah an i ok pah lengmang cang.  

Hi peng chung ah a ummi Chinmi hna hi Buddhists an si hna.  Biaknak ngei lo an um ti lo ti tluk an si.  An sin rianttuan hi ti fim lak sur cheh he aa lo kan ti tawn.  An per a pe ngai.  Nga tlaihnak caah can lak a hau.  Miphun dang Kawlmi lak ah mission rianttuan he aa lo lo. Kannih Laimi cu kanmah har tein kan har ko.  Ei le din ruah ah biaknak bu kha kan panh lem lo.  Sawilem thiam ngai a haumi kan si.  Cu caah, ICBM missionaries hna nih an um celh hna lai i khrihfabu fek tein an dir tiang tthial lo in an umpi hna lai.  Pathian sin ah kan pekmi chaw hna cu thlarau tlai miphun hawi hna lak aw aan an ngei cang.  I lawm ko u.  Bawipa Pathian nih nan kut cung tein A sin ah nan pekmi phaisa chuah lio te kha a hmuh in a hngalh ko.  Amah thawhlawm kuang ah aa chiah ko hna. Pek lei ahhin hmuh lei nak in lunglawmhnak thluachuah a um deuh tiah Bawipa Jesuh nih a ti (Lamkaltu 20:35).  

Pathian cu kan zamtaak lai lo

Pathian nih kan pek cia mi a cohlan cang.  Kan thlacamnak a theih.  Hei zamtaak usih law, kan hnu lei zong in a kan zoh peng men ko lai.  Zamtaak lo in Khrih caah a dir ngammi zumtu si hi a ttha bik ko.


CBCUSA 5NK CIVUI A NAI CANG

Hmun: Zophei Christian Church, Indianapolis, Indiana
Ni thla: June 5 - 7, 2015 (Friday - Sunday)
BM Meeting: June 5, 2015 [Friday]