Bawipa Thangthat

Wednesday, August 27, 2014


[cung] A tang ah Dr. Cung Lian Hup nihan kong a ttial.  Kan Chinram ah
Khrih Thawngttha phurtu kan pa le hna cheu khat cu mual an liam cang.
A cheu cu an kum a upa cang.  CCOC an rak thok ahhin ZBC nih phaisa
an ngei lo.  Laimi cu sifak le kan si fawn.  Palai hi kan thlah hna lai i
fund kan kawl lai an ti.  Zumhnak in an rak thlah hna.  Nuhmei an tho,
pahmei an tli.  Ar te le vok te hna an pek.  Thlarau tlaumi tampi
an rak tlaih.  Lairam ah Pathian rian kan ttuan lio a si caah
upa deuh paoh nih cun kan theih, kan khrihfabu cio ah
biatak tein kan rak aupi cio. 

**********************************************************

Aug 27 at 4:09 PM 

Dear Bawi Khrih ah riantuan ti hawi hna,

CCOC Second Round (ICBM) Thawhvo kong hi kan Ngunkeng Pu Kepling nih a kan thanh lengmang i a cung ah kan i lawm ngaingai.  Thawhvo kong a kan thanhmi kan hmuh poah ah a tho rih lomi Khrihfabu kan i phuhrung pah.  August thla a dih hin cun, 2014 kum dihnak ah thla 4 lawng a van i duh cang lai i, thla 4 chung ah kan thawhvo kan tho manh lo sual hnga maw ti nan phang cio ko lai dah ka ti.

Kanmah Battle Creek Khrihfabu zong kan CCOC Thawhvo hi kan khawl cuahmah ve.  Kan tlamtlinh kho ve rih lo.  Kan i zuam cuahmah ve; October dih hlan ah kan thawh thlu theu lai tiah ruahchan nak kan ngei ko.  October dih hrawng ah cun Pu Kepling sin ah kan kuat khawh te ko lai dah ka ti.

Khrifabu dang zong rak i zuam cio u law tiah kan nawl hna.  Tukum ah kan tuanmi a tam ngaingai cang.  Kan Ngunkeng nih report a kan pek lengmang bang, missionary zong hi kan duh ning in kan hmu kho hna lo na in, 50 leng kai nih an tuan cuahmah ko. Minung kan si caah kan tlamtlinh lonak tampi a um ko lai.  Sihmanhsehlaw, an tuan cuahmah ti cu theih peng an hau.  Sianghngakchia 36 kan cawm cuahmah hna.  Hakha ah sianginn an kai cuahmah ko.  Thla campiak cio hna u sih.

A tanglei hmanthlak hi Tlangkhua Pastor Rev. Chan Thang Jubilee lio ah an rak i thlakmi hmanthlak a si.  Hmantlak zoh ah lung a leng hringhran.

Ka theih khawh tawk ah FBA in Rev. Hrang Kap Hnin le Rev. Than Tin Sum an i tel.  HBA in Rev. David Van Bik, Rev. Van Hre, Rev. Hniar Kio an i tel.  Saya Huat Kham zong a tel ve khi.  Rev. Hniar Kio hi CCOC a thoktu upa lak ah pakhat a si ve.  Amah nih ZBC Mission Department i Director a tuan lio ah CCOC hi linsa ngai in hmai ah rak nawr a si.  A hawikom Rev. Hrang Kap Hnin te hna zong Saya Van Bik te hna he, CCOC ah cun lungkhat in an rak tang ti hna.  Philh khawh ding phun a si lo. Saya Hrang Kap Hnin zong Mission Department ah Director a rak tuanmi a si.

Hi hna hmanthlak zoh in kan pa le ke neh zulh nan lung a tho cio theu lai dah ka ti.  An ke neh kan zulh khawhnak ding ah kutsih in tang ti hna u sih law, Pathian thawngtha phuang ti hna u sih tiah kan sawm hna.

Nan riantuan hawi,


CCOC [Chin for Christ in One Century] 
1983-2000 Riantuannak Kong

CCOC kong hi kan fa le mino deuh nih cun theih awk a har men lai. Thlang Lairam ah miphun hawi thlarau tlaumi hna tlaihnak caah Khrih Thawngtha chimnak a si caah upa deuh thinlung le thlarau ahcun a nung taktak. A cam ngai.  Hi bantuk in Khrih Thawngtha an chim lio ah CCOC palai ngaknu tlangval hna nunnak a liam thawng nih Lairam cu li bang a hninh dih.  Ngaknu no te Ngai Za Siam (19) cu CCOC revival group in Thantlang peng chung an len lio ah May 24, 1988 ni ah dam lo in laang in an zonh lio ah Phai khua thlang te ah a thaw a cat.  Laimi kan thinlung ahhin nu nih mi dang caah nunnak pek hi kan ruat bal lo mi a si.  Pa nih mi dang caah fahnak tuar cu kan ruah khawh deuh.  Leengno Ngai Za Siam thih thawng theih tikah Laimi zumtu hna mitthli a hai dih.  Ngaih a chia tuk. Hi bantuk in harnak tuar in Khrih Thawngtha chimnak nih misual mi hna kan caah Vailamtah cung ah Khrih mualphonak cu hmual a ngeih ter.  Chin zumtu hna nih pek chin lengmang an duh.  Nuhmei an tho. Pahmei an tli.  Sifahmi nih Khrih caah mualpho kan ngamh.  Hi hi Paul nih Vailamtahnak cu Pathian hmual a si a tinak a si (I Kor. 1:18).

Lairam
Lairam hi ram fa te a si. Minung million cheu hrawnghrang te nih hngah mi a si. 1899 kum ah Rev. Arthur Carson le Mrs. Laura Carson nih Hakha khua ah Thawngttha an rak phurh. Laimi cu khrihfa ah tampi kan cang. Zomi Baptist Convention nih khrihfa kan sinak kum 100 a tlin kum 1999 ahhin Laimi dihlak khrihfa ah cang dih ding in Chin For Christ in One Century (CCOC) program kha 1983 in thok a si. 

1) An thok kum 1983 ah missionary 85 an thlah. Zumtu thar 2583 an hmuh.

2) 1984 ah missionary 102, zumtu thar 1,502 an hmuh.

3) 1985 ah missionary 177, zumtu thar 2368 an hmuh.

4) 1986 ah missionary 85, zumtu thar 768 an hmuh.

5) 1987 ah missionary 74, zumtu thar dihlak a fiang lo.

6) 1988 ah missionary 85 an thlah hna nain Kawlram a buai tuk kum a si caah mission field in an tlunter hna.

7) 1989 - 90 ah missionary 87 an thlah hna. Zumtu thar hna cu khrihfabu in an dir hna i missionary 40 cu pastor an ttuanter hna. Missoionary a thlahtu Chak Lairam zumtu hna tthanghphawtnak caah missionary 36 cu Revival Group in an thlah hna. Lairam ah Thawngttha chim duhnak a tthang chinchin. Chak Laimi tampi nih mission rianttuan duhnak thlarau le thinlung an ngei. 

8) 1992-93 ah zumtu thar 2,500 nak tam an tlaih chap hna. Paletwa, Mindat, le Kanpalet mission field in minung 50 kha Bible sianginn an kai ter hna. 

9) 1992 ah Gangaw le Mindat mission field hna cu Association ah ser an si.

10) 1993 in cun Thlang Lairam ah Thawngttha chim kha Kawl Cozah nih a kham. Mission field minung nih missionary kha an cohlang fawn hna lo. Chak Laimi caah Thlang Lairam ah Thawngttha chim khawh a si lo caah Paletwa peng in minung 53, Mindat le Kanpalet in anmah minung 115 kha evangelists training an pek hna. Anmah minung sin ah rian an ttuan ter hna. Thawngttha an chim.

11) 1995 ah Kanpalet le Paletwa mission field hna cu Association ah ser an si. Zumtu thar cu 337 an hmuh khawh. A hlan bantuk in zumtu thar an hmu kho tuk ti lo. Dontu a tam caah. 

12) Zomi Baptist Convention nih hmunrawn Kawlmi le Asho Chins hna sin ah rianttuannak hmun thar an on tthan. Kawlmi sin ah Thawngttha an chim.

13) 1983 in CCOC rianttuannak in Buddhist 650 hi khrihfa ah an cang.

14) 2000 kum in CCOC rianttuannak cu baan a si. Kum 12 chung hi CCOC rianttuannak aa dinh caah Lairam kan tthanchonak zong a dinh pi chihmi a um ve. Hi rianttuannak aa peh lo mi cu kan sung tuk in ruah cio a si.

A Ttuantu Hlawknak

Hi bantuk thlarau tlaihnak rianttuan pah in a ttuantu hna zong nih thlarau in tthanghnak kan ngei ve. "Mei cu alhnak in a nun bantuk in, Khrihfabu cu mission in a nung" (by Dr. Emil Brunner). Mission rianttuannak an thazaang a zawr tuk caah Nitlak lei khrihfabu hna cu an tla cuahmah. Mission rianttuan cu a ttuantu caah a hlawk bik.  ICBM Program kan thokmi hi Thawngtha kan chimhmi hna nak in Bawipa ram kauhnak caah phaisa a pe mi nih kan hlawk deuh te lai. Pathian nih lam kan hruai ko seh!

Monday, August 25, 2014


CALVARY CHIN BAPTIST CHURCH, CINCINNATI-KENTUCKY
August 24, 2014 (Sunday) Worship Service

Hruaitu hna cawnpiaknak cu Zarhteni ah kan tuah.  Zarhpini cu Pathian thangthatnak le hawikomhnak kan ngei.  An sin in lawmhnak lianpi ka ngeihmi cu:

(1) ICBM [CCOC Follow Up Mission) caah 2014 ah thawh ding cu kum thok ka ah khrihfabu pi nih member pakhat $25 ca in an pek chung.  Member kip nih anmah le an thawhvo cio kha an van cham diahmah.  Thlarau a tlaumi rian hi chungkhar kip nih anmah rian taktak ah an i chiah. 

(2) Buu rianttuannak a herhnak kong an thei.  Ttuan tti duhnak thinlung an ngei.  Miphun fa te Laimi bantuk nih kan herh bik mi thlarau an ngei. 

(3) Sunday School Cauk zong an fa le dihlak caah an cawkpiak hna.  Biakinn ah fel tein thawngthanhnak an tuah.

(4) Kan chimmi Thawngtha cu Pathian Hmual (the power of God) I Korin 1:18) hi a si.  Khrih tuartemnak kong hi fak deuh ngai in chim kan i zuam.  Kan chim khawh tawk tein.  Thlarau tlaumi hna A kan khamhnak kong a si i ICBM rianttuannak hi a hoih tthan lengmang ko.

Khrihfa biaknak ahcun pek ngam paoh ah tam deuh hmuh, le thlarau le pumsa in tthancho a si tawn.  Peknak thinlung a ngeimi hna hi Khrih nih nunnak pek in a kan khamhnak kong hi an fiang kho deuh.  Cu caah, an pek tikah an i lawm.  Khrihfabu ah Khrih dawtnak a nung kho.  Thlarau in thanchonak a um.  Khrihfabu a tthangcho.

[tang] Hruainak Training kaimi upa, mino upa, nu upa le Sunday School saya/ma te
 [tang] CCBC pastor le upa he hawikomhan zanriah
 [tang] CCBC Praise & Worship team
 [tang] Hawikomhnak ah pastor le upa dihlak he an khua kan cuan.
 [tang] Hawikomhnak Buffet

[tang] Cincinnati, Ohio khuapi
 [tang] Pathian thangthat lio can.
Pathian/Khrih/Thlarau thangthat hi a nuam.
Hi lio ah thinlung nih kan thangthatmi kha a hmuh.
Thil dang a ruat lo.  Bawipa cung ah kan thinlung aa fu.
Khrih nih Vailam cung in a dawtu a nu Mary le zultu hawi hna
a zoh hna bantuk in kanmah lei ah A mit a van hawi.
Thlarau nunnak ti thiang cu van ruah bang a van sur ter.
Kan thlarau thinlung chung ah a luang riahmah. 
A rocar mi kan thlarau nih a dawp.  Cu ti te cun,
kan thlarau nunnak thingkung cu hring dildel tein
tthan a thok.  A ti hal can ah van a zoh.
Nunnak ti thiang nih a cawm. 
Vawlei hi Bawipa lawmhnak in a hman.
Van innka cu a caah hun cia in a um.
Sunpar luchin nih a hngah.
Bawipa thangthat hi a nuam!


Tuesday, August 19, 2014


ICBM REVIVAL TEAM [CBMC, DC NUBU] LENNAK
To
Charlotte Chin Baptist Church (CCBC)
Charlotte, NC
August 16-17, 2014
 
Thlarau tlaumi hna tlaihnak ICBM [CCOC Follow Up Mission) rianttuannak thlarau
tthanghthannak caah ICBM Revivial Team CBMC, DC nubu minung 21 & CBCUSA EM cu
CCBC, Charlotte, NC ah an leeng.
 
Pathian Thlarau Thiang lamhruainak thawng in leengtu le lenmi Chin zumtu hna cu
thanuamnak he an khat.  CCOC Follow Up Mission caah naupawi lio hna nih
pumchung fa te caah an thawh chih ve nak kong an chim. 
A poi lio nu hna sin in kan thawh ve ko lai tiah an tinak zong kan theih.
Kan i lawm taktak.  Biatak tein ICBM caah chaw an kholh lio a si.
September thla chung ah kan pek khawh lai an ti.
 
[tang] ICBM [CBMC, DC Nubu] Team
 



 
 [tang] Charlotte Chin Baptist Church Mino Hlaremh






[tang] CBMC Nubu Gospel Team






 
[tang] Dr. Billy Graham Library
 [tang] Dr. Billy Graham Inn le Library
 [tang] Pastor Aaron Tawk Al, CCBC he Dr. Billy Graham Library kan len lio


Hi ka in meng li a hlatnak lo ah 1927 kum ah an inn hi an sak.  Billy nu a thih in 1981 ah
Dr. Billy Graham Library kam ah an tthial.  A nupi zong hi ka hmun ah a ruak an phum.
 
 

Friday, August 15, 2014

A RA LIO MI CBCUSA PROGRAM HNA

(1) CBCUSA Ministers' Retreat
 
Ni: September 10 - 12, 2014
Hmun: Green Lake, Wisconsin
 
 
(2) Mid America Chin Christian Fellowship (MACCF) Conference
 
 Ni: August 29-September 01, 2014
 Hmun: Quad City Chin Baptist Church, Moline, IL
 
 
(3) CBCUSA Region - 4 Mino Conference
 
Ni: August 29 - September 01, 2014
Hmun: Springfield Community Church, Springfield, MO
 
 
(4) ICBM Revival Groups Lennak a kal lio


(5) International Lai/Chin Christian Leaders Meeting

Ni: November 14-15, 2014
Hmun: Lawngtlain, Mizoram
 
 
***Bawi Khrih min in Nawlnak***
 
Thlacamnak in bawm cio hna usih.

Monday, August 11, 2014

CBCUSA YOUTH CONFERENCE
July 3-5, 2014
Bethel College, Mishawaka, Indiana
Bethel College campus ah tuah a si.  Kan riak.  Kan ei ding kho.
Khaan 10 ah cawnpiaktu 10 nih suimilam pakhat in khan dihlak ah
i tthial in cawnpiak a si.  Mino 400 an kai kho. 
Pathian thangthat hlasak a nuam taktak. 

Hi tluk US ram tha ah Pathian thluachuah kan donmi cungah

kan i lawmhnak hi hmailei kan fa le nih Pathian an theih lo ahcun

kan miphun tlaunak thiang a phan kho.  Kan i lawmhnak mitthli hi
ngaihchiatnak mitthli nih a thlen sual nak hnga lo ding ah
kan fa le nih Pathian an theih khawh nak hnga nu le pa nih
thlacampiak kan hau hna.  Mino le Sunday School fanau le nih
Pathian an zumh khawh nak ding ah home mission rian ngan pi
kan ngei.  Khrih ram le kan miphun cu an cungah aa khing.
Thawngtha phur kho tu si hram hna seh!
[tang] CBCUSA Youth Conference Lio Pathian Thangthatnak
[tang] Indiana mino nih States dangdang in a ra mi Chin mino kha hla in donnak
 [tang] DC mino
[tang] Pastors nih kan telpi hna ahcun mino zong an tha a tho ve.
 [tang] Rawl ei lio
 An ttamh ning aa dawh ngai. Kan fa le an thiam chin lengmang

CBCUSA Women Training
July 4-6, 2014
Texas Chin Baptist Church, Dallas, Texas
CBCUSA khrihfabu 82 in Chin nutung no pawl 400 cu States kip in vanlawng in an rak zuang.
A cheu mawtor in an rak ra.  Pathian dawtnak thawng in Lairam ah lo a thlo ciahmah tawnmi
kan nu le hna zong nih USA hi an ngamh tuk cang ai.  An i nuam kho tuk.
Pathian thluachuah a si hi philh hram lo ding in an i cawnpiak.
Cawnpiaktu hna cu:
(1) Dr. S. Hre Kio le (2) Rev. Sui Hliang Chorei (CBMC, DC pastor)










Pathian Ram Kauhnak Caah A Herhmi

(1) Buu in rianttuannak thazaang pek a herh.
Biaknak dang an tthawnbiknak cu a bu in rian an tuan caah a si.

(2) Chin miphun hi milu kan tlawm tuk caah kan i fun lawng ah kan tthawng lai.
Mah cio in kan um i rian kan tuan ahcun zei pipa kan tuah kho lai lo.  Miphun dang hna nih
capo ah a kan saih peng ko lai.  A tu a tthangchomi vawlei pi cung ah kan leeng ve cang.
I fonh khawh chung in i fonh kan hau.  Rianttuan tti kan hau.

(3) Khrih ram kauhnak rian hi thlacamnak he kan ttuan tti hna ahcun kan dihlak in
kan tthang tti lai.  Kan i lawm tti hna lai.

(4) Thil fa tete ah um peng i tiim lo in, a lian deuh mi si kho ding in kan i zuam ahcun
kan dihlak in kan lian lai.  Kan mui zong aa dawh deuh lai.  Kan pumrua zong a tha deuh lai.

(5) Miphun fate kan si zong ah miphun pi thinlung put hi ngeih i zuam kan hau hna.
Lungrualnak (unity) cu kan thazaang a si zungzal lai.
Lungrualnak cu Khrih in a ra mi a si.