CBCUSA Youth Conference
Bethel College, Mishawaka, Indiana
July 3 - 5, 2014
Chin mino 400 deng hmun khat ah Pathian thangthat ttinak le cawnnak kan ngei. Cawnmi subjects: 10; cawnpiaktu: 10; cawnnak classes: 10. Kan fa le hi groups 10 ah then in cawnpiak an si. Nihnih chung hi cang lo tein cawnpiaknak an ngai kho. Campus chung ah hnahnawk le buaimi um hlah, campus zong thianghlim tein kan hman. Campus chung ah kan ei, ihnak khaan ah kan it cio. Bethel College nih tuanvo an lak dih. Kannih cu Pathian thangthat le cawn lawng a si. Hna a thiang tuk. Aho paoh cawnnak ah tel dih a si.
Ramdang Chinmi hna chungah kum 50 cung hi 10% cung kan si lai lo. A tam bik cu kan fa le mino tete hi an si. Hi hna rual nih Khrih dawtnak an tem i an dawt khawh lawng ah Chin Kingdom (Chin Pennak) hi a hmun lai. Hi kan fa le hi kan umnak ram nunphung le sining nih dolh an awl lio te a si fawn. Thlau lai phan an um taktak. A chan le hmun ah an um i vawlei sining in an fim tuk cang. Lairam in a ra mi nu le pa nih kan chimhring kho ti hna lai lo. A fimmi kha a hrut deuh nih cawnpiak khawh nak lam a um lo.
Cu caah, nu le pa le khrihfabu cio nih kan fa le kan dawt taktak hna ahcun hi bantuk cawnpiaknak training ahcun phaisa a dih zong ah kai ter ding kan si. Phaisa a dih lo, CBCUSA nih kan rin ko hna. Mah zal chung sanh ding pocket money te lawng a hau. Hi tluk man deng mi cawnnak ah kan fa le hna thlah ding kan hngalh hna lo ahcun nu le pa ngaihchiatnak hmanh an chuahpi deuh te lai. Khrihfabu cio zong nih biatak tein ruah ding a si.
Vawlei a si caah thlarau fimnak lawng in an i ser kho lai lo. Vawlei fimnak in than chih an hau. Hawi dang sining hngalh an hau. Mi fel le miding ah an i chuah ahcun khrihfabu kip nih kan hlawk tuk ding a si. Nu le pa hna caah lawmhnak sangbik a si lai. Kan mino caah nun hi Pathian le Chin miphun caah nun khi a si ko. Aho zawn dah kan ruah deuh lai? Ruah can a cu ngaingai cang. ICBM tluk in a biapi mi Ramchung Mission (Chin Baptist Home Mission) a si ve. Thlacamnak he lu hlinh tein tuan hau mi mission rian a si.
