Australia Tlawnnak Kong

(by Dr. C Duh Kam, EM of CBCUSA)

1) January 7 -12, 2014 @ Forest Edge Camp: Youth Camp of Victorian Chin Baptist Church [VCBC], Melbourne, Australia. VCBC cu member 1000 cuang an si.  Australia ah a nganbik khrihfabu an si.  Youth Camp hmun hi Melbourne khua in mawtor in suimilam pahnih kal a si. Ram tang hmun niam rawn tha a si.  Camp a kaimi mino 115 le rawl chum 8 an si.  Camp ah ni nga le zan nga kan hmang.  Ni li chung hi cawnpiaknak a si.  Zan nga pumhnak kan ngei.  Pathian nih Thlarau Thiang in lam A kan hruai.   Hlasak a nuam.  Pathian bia cawnpiak tikah dai tein an ngai kho.  Bawipa nih A kan umpi hrimhrim ko kan ti cio. Camp a kaimi dihlak nih Khrih ah lawmhnak an ngei cio tiin an chim. 

Ist Sunday (January 12): Zing ah khua kan rak tlung.  Pumhnak voi hnih tuah a si. 

Nikhat zan in Zarhteni zan tiang crusade in kan hman. 

[tang] Praise and Worship: http: //www.youtube.com/watch?v=6VOlzY7mRM4

2nd Sunday (January 19): Pumhnak voi hnih a um tthan.  Zarhpi zan hi kan crusade program a dihnak a si. 

CBCUSA nih Australia Chin Churches hna len le mission rianttuan tti ding in sawm hi kan duh zungzal mi a si caah Laitlai Chin churches dang kha ton ding ah ni hlei ka laknak a si.  Pumh lo can ah hawi he tonnak kan ngei kho.  Khua dang upa hna zong kha phone in ka chawnh pah hna.

1) January 20 (7:00 pm) East Melbourne Chin Churches upa hna he tonnak kan ngei.

2) January 24 (7:00 pm) Chin Hakha [Laica] Komiti upa hna he tonnak: 

 Australia ahcun hi Laica komiti hna zuamnak in 10th Grade tiang hi Laica cawnnak cu an ram cozah nih a tuah piak hna.  Laica lei ah ram dang Laimi dang nak in an cawl kho deuh.  An I zuam cuah mah rih.  CBCUSA nih Literature and Publication Department kan ngeih bantuk in kan L & P Director Pu Thlasui Tluangneh nih ramdang Laimi dihlak he pehtlaihnak a tuah cuahmah.  Laica in tialmi cauk hi zuar khawh nak lam a kawl hlei ah Laica in cauk ttial cio hna sehlaw ti saduhthahnak a ngeihpiak hna.  Hi Komiti hna nih Laica ttialnak le cauk zuarnak kong ah kan I bawm lai tiin tuanvo lak ding in biakhiahnak an tuah colh.  CBCUSA L & P Department he pehtlaihnak an ngei cang lai.   

January 25 & 26 [3rd Saturday & Sunday] cu West Melbourne ah ka hmang.  Zarhte zan le Zarhpi zing ah Melbourne Chin Church ah pumhnak voihnih, le chun ah Chin Baptist Church ah voikhat kan ngei.

3) January 26 [Sunday] (6:00 pm): West Melbourne Chin churches upa hna he tonnak:

 CBCUSA, Lairam Jesus Christ Baptist Church, Lawngtlai, le CACC he Laica le holh le nunphung kong ah si seh, ICBM [thlarau tlaumi tlaihnak mission rian] ah siseh, rian ttuan tti ding in ka sawm hna.   Australia le Europe Laitlai Khrihfabu pawl kan in hngak ko hna tiin ka chimh hna. Australia ahhin Chin Christian Council in Australia (CCCA) cu an thok nain, membership la in an cawl rih lo. An chairman cu Rev. Dr. Dennis Shu Maung a si.  Amah zong a um lio a si.  Upa tam ngai he tonnak kan ngei kho.  An tha a nuam ngai ve.  CCCA nih biatak in thazaang chuah in kan dihlak in rianttuan tti ding cu pumpak thinlung in a lang ngai ko.  CBCUSA nih kan rianttuannak kong hi cahmai 5 khat in ka ttial I ka pek cio hna. Rian ttuan lo in khua kan tlai tuk cang ttung an ti len cio.  CCCA min in rian an tuan khawh nak ding ah tan lak ngai an hau rih.  Thla cam piak cio hna usih.

4) Hlaremh: Kaa pumhnak khrihfabu kip ah mino hlaremh an thiam ngai.  An aw kua le thang in hla an sa.  Hlaremh tling ngai in an sa kho.  Kaa lawmh ngai hna.

5) Media Groups Australia Chin Network le Chin Radio he tonak

[tang] Australia Chin Network group he

 [tang] Australia Chin Radio group he

January 4 in kaa thawh i January 29 ah ka rak phan than.  Nan thlacamnak thawng in Pathian nih damnak a ka pek.  A min ka thangthat.  Nan dihlak cungah kaa lawm tuk.

Bawi Khrih rian ah,

C Duh Kam, EM

CBCUSA