Bawipa Thangthat

Wednesday, November 20, 2013


INTERNATIONAL CHIN BAPIST MISSION [ICBM]
MISSIONARY TRAINING
Yangon Lai Baptist Church
November 18-30, 2013
"Ahodah ka fial lai?  Ahodah ka lamkaltu a si lai?"
Isaiah 6:8
ICBM missionary training cu an thok cang.  Missionary 31,  field directors 2,
le Simitlang Ministers 4 dihlak 37 an kai kho.  Training Coordinator cu
Lai Baptist Church in Youth Director Saya Za Uk Sang a si. 
Training kainak ah Dr. Cung Lian Hup, Rev. Zammang Mualcin,
Dr. S. Hre Kio le Pu Kepling Khengmual hna nih an telpi hna.
Bawipa thang ttha ko seh.


Zei ruang ko ah hme phaisa tamtuk dih in
Khrih Thawngtha cu kan chim lai?
A tawinak tein in let ko ning aw. 
Thlarau hliam hma tuar an tam tuk.  Khrih damnak
an herh.  An thei rih lo cu Thawngtha cu!


Tuesday, November 19, 2013

CBCUSA EM nih Laitlai Khrihfabu hna Lennak:

1) Zotung Baptist Church [ZBC], Baltimore, Maryland ah lennak
[November 17, 2013 Sunday]

ZBC nih an ka sawm bantuk in kan va leeng kho hna.  CBCUSA kong cu catial le bia in ka chimh hna.  Duhnung mino tete an si hna.  An ruahnak a pical ngai.  Kanmah te lawng in um ding kan si lo, Chin miphun hawi sin ah um ding kan si an ti.  Pathian an duh.  Hawi sin ah fonh duhnak an ngeihmi thinlung hi kan herh bik mi a si.  2014 kum in cun Chin Baptist Churches USA ah kan lut ve lai tiin bia an khiah cang.  Thla cam piak hna usih. 
 [tang] Chinese Buffet ah Zanriah


 

2) Indiana Matu Christian Church, Indianapolis, Indiana ah
November 10, 2013 Sunday

IMCC ah ka va leeng hna.  An members an tam ngai.  Indianpolis, IN ah Matu church pali a ummi lak ah a lianbik an si.  Bawipa Zanriah le Tipil peknak ka ngei kho i kaa lawm ngai.  Hmun dangdang ah kan i pum cio ko hna nain, mui kan van i hmuh ahhin Khrihfa kan sinak le Laimi kan sinak hmual te cu a tthawng ngai tawn.  ICBM rianttuannak caah thawhlawm an kholhmi caah thla ka campiak fawn hna.














 

Saturday, November 9, 2013

Cawnpiaknak hmanlo mi kong ah ralrin a herhnak
 
Kawlram in USA ah a rak tlawngmi Pathian rianttuantu (Baptist bu a si lo mi) pakhat nih email a ka kuat.  “Profet cu a zummi ka si ko nain, USA ah profet phun in thawngtha a chimmi kha ralrin nan hau, phaisa kawlnak caah an hman hna” tiah a ti.  Hi kong hi ka ruat.  Hi hlan deuh le a tu nai te ah Chin khrihfabu dangdang ah phungchimmi kong ka theih tikah Bible sining lo in cawnpiaknak hi ralrin kan hau ti hi a fiang ngai.  Khrihfabu ah Bible kalning tein cawnpiaknak a um lo ahcun, kan mipi kan pial pi hna lai.  Kan khrihfabu zong a pial kho. 
 
Cawnpiaktu hna hi a hram thok le a lai ahcun an cawnpiaknak cu a ttha kan ti tawn nain, a donghnak ah an chimmi cu aa dang tawn. USA le ramdang dang ah Kawlram lei ah an chim tawn ning thiam in an kan cawnpiak.  Cawnpiaknak kong ah ralrin hau in kan um tthan.  Laimi chung in biaknak bu tamtuk a chuahnak hi Jesuh zumhnak ruang ah a si theng lo. Bible sining lo in cawnpiaknak kan zulh caah a si bik.  Jesuh zumhnak le nunnak ah minung hi kan i then kho lo.  A hrintthan i Khrih nun in a nung mi caah thennak lam an tuak lo.  Khrihfabu ah buaibainak a chuahnak cu Satan rianttuannak a si.  An cawnpiaknak nih biangaitu hna thlarau an tlaih hnu ahcun ral tha ngai in bia an chim ngam.  Hi bantuk in an duhmi hi an chim tawn.  Mi tampi nih kan zumh hna i lam kan tlau tawn.  Kan thlarau caah ttih a nung.  Cawnpiaktu ca chinchin ahcun ttih a nung tuk.
 
Cawnpiaktu hna kan caah Pathian biatak chim lo in Bible bia hi kanmah duh hoih in chim cu ttih a nung taktak.  Pastors, Evangelists le phungchimtu upa dihlak nih ralrin kan herh taktak.  Zumtu tampi cu phungchimtu le cawnpiaktu kha a kan hngatchan.  Pathian bia an ngai.  Kan chimmi a hman lo ahcun kha hna vialte thlarau kha a pingpang ah kan kal pi hna. Mi dang zumhnak a pial tertu si cu Pathian nih A duh hrimhrim lai lo.  Kan cung ah Aa lawm kho hrimhrim lai lo.
 
1)      Cawnpiaktu kan caah ttih a nung tuk.  James 3:1 ah “Ka u le ka nau hna, tam tuk cu saya (cawnpiaktu) nan si awk a si lo, zeicatiah kannih saya pawl hi hawi nak fak deuh in biaceihnak kan hmu lai ti kha nan hngalh” tiah a ti.  Zumtu hmasa hna nih an rak ton cang caah hi ti hin cawnpiaktu hna kong cu Bible ah hin tial a si.  Bible biatak sining in cawnpiak lo in, mah duhmi tlamtlinnak caah le mah pumpak hlawknak caah cawnpiaknak a tuahmi cu Pathian nih fak khun in bia a kan ceih lai.  Minung zeizat, thlarau zeizat dah kan pialpi cang hna ti cu kan ruah a hau.  Mi dang thlarau kal sual ter cu cawnpiaktu kanmah caah mawhnak a si cang.  Pathian nih kan chimmi vialte hi record aa ngeih dih ko lai.  Kanmah bia lila in biaceihnak kan huah lai.
 
2)     USA ah cawnpiaknak hman lo a cangmi cu Cheuhra Cheukhat peknak kong a si.  Ram dang zong ah a cang ve men ko lai.  Cu cawnpiaknak cu “Khrihfabu ah nan pekmi cheuhra cheukhat cu Pathian nih a cohlang lo.  Mission caah nan pekmi lawng a cohlan” tiin cawnpiaknak cu tuah a si.  Kanmah sin ah nan pek ahcun Pathian aa lawm lai ti bantuk in cawnpiaknak cu a um tiah an chim cio mi a si.  Hi ruangah zumtu tampi nih an cheuhra cheukhat kha khrihfabu ah pe lo in hmun dangdang ah an pekmi kong cu theih cio a si.  Pathian bia cawnpiaktu kan herh ko nain, Bible bia nih a kan chimh ning in cawnpiak lo cu Laimi zumtu hna kan caah a poi taktak ding a si.
 
Pathian sin chawpeknak le cheuhra cheukhat peknak kong cu Bible chung ah hmun tampi ah kan hmuh.  Cu chung in tlawmte kan langhter lai:

(a)   Cheuhra cheukhat cu Pathian zumhnak in le a thluachuah lawmhnak in kan pek tikah Pathian cu aa lawm.  Marka 12:41-44 ah Jesuh Khrih nih “Mirum tampi nih chaw an pekmi cu an ngeih hlei an pek, tangka pahnih a pekmi sifak nuhmei nu nih cun a ngeihmi vialte kha a sanh dih” tiah a ti.  Zeizong hngal kho tu Pathian nih chaw petu thinlung kha a zoh.  A sin ah chawpek cu mah i phorhlawtnak caah a si lo.  Khrih zumhnak he thlarau le thinlung in pek a si.  Cu cu Pathian nih a cohlan le a lawmhmi a si.  Khrih nih nuhmei nu cu ngeih hlei mi phaisa tampi a pemi hna nak in tam deuh a pek tiah a ti.  Amah caah aa zuah lo.  A pek dih hirhiar. 

(b)  “Cheuhra Cheukhat cu Pathian ta a si” (Levitikas 27:30-33).  Pathian ta hi kanmah duhnak ah hmannak nawl kan ngei lo.  Pathian sin ah pek ding a si.  Cheuhra cheukhat chung in zumhnak thlaici tuh phung a si lo.  Zumhnak thlaici nangmah covo in na tuh awk a si. Cawnpiaktu saya na pe kho lo.  Missionary cawmnak caah na hmang kho lo.  Pathian ta a si.

(c)    Profet Malakhi sin ah Pathian bia [Malakhi 3:7-12] hi tha tein rel usih.  Kan fian deuhnak ding in a tlang tete in kan then lai:
(1)    Pathian nih cun “Minung nih Pathian cu hlen awk a si hnga maw?  Si hrimhrim hlah, asi nain, nan ka hlen. 

(2)   Nan cheuhra cheukhat le nan thawhlawm ahhin nan ka deh a si lo maw?  Nannih nih nan ka deh caah nan miphun ning pi in nan dihlak cung ah chiatserhnak kha a um. 

(3)   Cheuhra cheukhat cu a dihlak in thawhlawm inn ah rak pu u, cun ka inn chung ahcun rawl um seh. 

(4)  Ka hniksak tuah ngat u, van innka cu kan hon piak hna le hon piak hna lo, thluachuah vanluhnak cu kan thlet hnawh hna le hnawh hna lo zoh tuah ngat u, tiah ralkapbu Bawipa nih a ti

(5)   Nan vawlei nih a chuahmi a hrawktu hna le nan mitsur ruang car ko in a tuahtu butik khaubawk cu ka kham hna lai i nan lo i mitsur ruang cu an thei a sur in an i sur lai, tiah ralkapbu Bawipa nih a ti. 

 A cung i Malakhi 3:8 hi Mirang Bible dangdang ahcun nan ka hlen/deh ti lo in, “Minung nih Pathian cu a fir awk a si maw?  A tu nan ka fir ko (Will a man rob God? Yet you rob me).  Nan cheuhra cheukhat le thawhlawm in nan ka fir. . . Cheuhra cheukhat cu thawhlawm inn ah rak pu u, ka inn chung ah rawl um seh, tiah a ti.

Pathian sin ah cheuhra cheukhat tling in kan pek lo tikah Pathian kha kan ramh i kan fir a si.  A phaisa bawm kha hranhram lo in kan chuh i kan bauh piak bantuk in a rak tem.  Pathian ta a si mi cheuhra cheukhat cu biakinn chung ah kan put awk a si.  Hi cu keimah bia a si lo.  Phungchimtu pastors, saya le upa hna nih kan chimmi bia a si lo.  Profet Malakhi sin in Pathian nih A kan chimh mi Bible bia a si. 

Cheuhra cheukhat cu kanmah nawl in hman khawh a si lo.  Zumhnak thlaici tuhnak le missionary thlahnak le Bible sianginn kaimi hna bawmhnak le zei dangdang ah kan hman ahcun Pathian nih Ka chaw na firmi in maw thluachuahnak na ka hal A kan ti lai.  A thli thup in kan firmi chaw cu zeizong hngaltu Pathian nih a theih dih ko.  Bible nih a kan cawnpiak ning in Pathian sin ah lawmhnak chim hna usih. Chaw pe cio hna usih.

 
C Duh Kam, EM
CBCUSA