Khrih Jesuh Vailam cung ah

Vailam cung ah hling luchin he ka Bawipa cu an thlai.  A tu nai 3:00 pm ahkhan "A dih cang" a ti i A nunnak cu a liam.  Vailam tung a put lio le vailam cung i an thlai lio ah a raltu hna nih an nihsawh.  An volh pamh.  "I khamh kun hngat" an ti.  A dawt Jerusalem nu rual hna caah a fak tuk.  Jesuh Khrih nih vawlei ah A Pa rian a ttuan lio ah Jerusalem nubu hna cu A caah chaw kawltu an si.    Khuaruahhar thil A tuahmi vialte a hmutu an si.    An dawt. An zohthla.  Pathian nih minung A kan serning ah nu nih pa cu bochan a si bantuk in Jerusalem nu rual nih Khrih cu an bochan tuk.  Vailam cung i a tuarnak an hmuh tikah mitthli he an ttap.  An celh lo.  Donh cawk lo in a nu Mary mitthli a tla.  Hi hi Khrih nih kan sualnak in khamhnak  A kan khamhnak caah A tuarnak a si.  Pathian khuakhanning hi theih a har tuk ko.  Nain, Thlarau nih fiannak le hngalhnak A kan pek.  Pathian hmual a simi Khrih vailamtahnak cu zumtu hna kan tthawnnak le lawmhnak ah a cang.  Pathian min thang ttha ko seh!

Khrih vawlei a len lio ah nu hna nih A rianttuannak caah chawva an kawl piak bantuk in, nihin ah A Thawngttha chimnak ding caah Lai nu tampi thisen a thak cang.  CCOC FM rianttuannak timhlamh a si tikah a tho hmasabik mi cu CBCUSA nubu le local church nubu hna an si.  Missionaries 60 in kan thlah lai kan ti mi hi CBCUSA nubu hna nih a zat ceu tuk cu an thlah khawh te lai.  Missionary pakhat caah kum khat ah $2000 lawng a herh.  Duhnak a ngeimi taktak nih tamdeuh zong thlah khawh a si lai.

Khrih khamhnak, dawtnak le velngeihnak Thawngttha cu kan semnak Lairam ah phuan in a um lai.  Kan umnak ram cio ah Khrih Thawngttha cu tlang mei alh bang a lawn te lai i Khrihfabu kip nih thlarau in tthanghnak kan hmu te lai. 

Khrih nih hi vawlei ah A Pennak kauh ter ding in A thisen in A kan auh.  Nangmah na kal lo ah hodah kal in Thawngttha phuang ne lai!

Bawi Khrih Temtuar Caan

Kan Bawipa Jesuh Khrih cu a thih lai can a nai cang.  Kan sualnak in khamhnak caah tuar hram a thok cang. 

1)      Kan hnu Ningani kha Bethany khua ah a phan. 

2)     Zarhpini kha Jerusalem ah laa fa te i cit in lianhngannak he a lut.

3)     Zarhpini zan lei sang ah Bethany khua ah a kir tthan.

4)     Nizan Nikhatni le Nithumni tiang cu Jerusalem ah a kal I cawnpiaknak a tuah tawn.  Zan lei paoh ah Bethany khua ah a kir than tawn.

5)     Nilini zan in Lanhtaak Puai cu an timhtuah cang.  A dawt zultu hna he Lanhtaak Puai rawl an ei tti hna.  A donghnak bik Bawipa Zanriah cu an ei tti hna.  Kan Bawipa Jesuh Khrih cu lungretheihnak in a khat cang.  Zan ah Gethsemane dum ah thla a cam.  A thlan cu thisen in a luang tiah Dr. Luke nih a ttial.  Ningani ni chuah hlan zan ah Jesuh cu an tlaih.  Fung in an tuk, an velh.  A lu ah hling luchin an chinhter. 

6)     Ningani zing in Vailamtah cungah an khenh chih.  A nunnak nih a tuar kho lo.  A thi.  Zanlei sang ah thlan ah an vui.

7)     Zarhteni cu Jesuh ruak cu thlan chungah a um ko rih.

8)     Zarhpini zing ahcun Jesuh cu thihnak nih a tei lo.  A thotthan. 

Jerusalem khua ah hi tan Lanhtaak Puai a zawhmi cu an tam khun.  Million pahnih leeng an si lai tiin an ruah.  Jerusalem khua chung hmun kip ah riahnak buuk an sak i an um hna.  An i tuaibur ko.  Puai ah a rami an tamnak cu Khrih ruangah a si.  Pathian rian a ttuan lio ah khuaruahhar thil tampi a tuah hna.  A min a thang tuk.  Farasi pawl nih an ngiar ngai tikah mi tampi nih tu tan Lanhtaak Puai ah thil pakhat khat a cang lai tiin an ruah caah minung tampi cu Puai zawh ah an ra hna.

A taktak in, vawlei Judah siangpahrang si lo in, Pathian Fapa Vanbawi Messiah a sinak tu kha a lang.  Hosana, hosana tiin a dawngtu mipi nih hnu lei an chit cang.  Vailamtah cungah thlai i thah ding lawng kha an bawh cang.  Nilini zan ah an tlaih i Ningani zing ah Vailam ahcun an tah.  Hi lio can cu Khrih nih nangmah le keimah caah nganfah a tuar lio a si.  Vailam cungah an thlai.  A hnak ah fei in an chunh.  A nganfah a tuar kho lo. A nu le Jerusalem nu hna cu mitthli he an tap.  Jerusalem nu rual hi Jesuh Khrih nih vawlei ah Pathian rian a ttuan lio ah phaisa a kawlpiaktu an si.  Nu hna nih an rak dawt tuk.   Vailam cung ah Pathian Fapa ve lo bang, santlailo te thil ti kho lo bang an thlai ko.  “Ka ti a hal” tiah a au.  Hi lio zong ah mi nih nehsawh le thlanglamh a tuar rih.  A sin ah vailam an tahmi misual pakhat nih a nihsawh ve.  “Messiah na si kun lo maw?  Nangmah cu i khamh law kannih zong kan khamh ve hngat? a ti (Luke 23:39). 

Chun suimilam hlei hnih hrawng ah chunmui a tlung.  Suimilam pathum chung cu ram cu muihnak nih a khuh dih.  Jesuh cu aw thang pi in a au i, “Ka Pa, Na kut chung ah Ka thlarau kha ka chiah” tiah a ti.  A chim dih in a thi (Luke 23:46).

Misualmi hna kan khamhnak caah Pathian Fapa nih lam har bik aa thim.  A Pa, Pathian duhnak cu A zulh dih.  Kannih cu A thisen in a kan ttawl.  Hawhra bantuk in kan sualnak cu a thiang cang.
 *****************************************

CCOC Follow-up Mission [CCOC FM] ah tel ding in aa tiimmi buu hna:

1) CBCUSA, 

2) Denmark Chin Christian Fellowship, 

3) Chin Christian Fellowship, Kuala Lumpur, Malaysia, 

4) Chin Baptist Convention, Falam, Chin State, 

5) CACC, Hakha, le 

6) Lairam Jesus Christ Baptist Church, Lawngtlai. 

 

Zomi Baptist Convention [ZBC] in Chin Baptist Convention [CBC] ah

 

ZBC cu 1953 kum ah an rak thok.  Kum 60 a ruah hnu ah Chin Baptist Convention [CBC] tiah March 23, 2013 ni ZBC's Triennial Conference, Carson Baptist Church, Tahan ah an thlen.  April 01, 2013 in CBC min cu an hman cang lai. 

 

CCOC Follow-up Mission Kong ah Lawmhnak

Pathian khuakhanning cu minung nih kan ruah phak lo mi a si zungzal.  CCOC Thawngttha chimnak thok tthan ding in CBCUSA BM nih bia a khiah.  Central Committee minung 16 a thim hna.  Meeting voithum tuah a si.  Hi komiti nih timhtuahnak cu CBCUSA BT meeting, Amarillo, Texas ah an chuahpi.  BT chungtel a tam u pi nih hnatlaknak an tuahpiak hna.  Hi kong ah thinphannak zong kan ngei hna i lungsiaherhnak zong kan chim cio hna.  Pathian nih A theih dih. Hi rianttuannak cu A ram kauhnak caah a si.   CCOC FM komiti hna nih Chin Baptist Convention (CBC), Former ZBC, le Chin khrihfabu dang hna sawm ding in timhtuahnak an ngei.  An sawmmi cheu khat cu an i tel ve cang hna.  Hi bantuk in CCOC FM komiti nih ruahmi cu tlam a tling sual lai lo ti kan phang tuk cio hna.  

Pathian cu A ttha tuk hringhran.  Amah caah Amah lila cu Chin zumtu hna hmang in rianttuan aa timhnak a lang.  CCOC FM Director Dr. Cung Lian Hup nih ZBC's 21st Triennial Conference ah CBCUSA in sawmnak ca cu a vaa phurh.  ZBC palai tampi nih CBUSA he rianttuan tti ding in duhnak an langhter.  Biakhiahnak an tuah.  CBCUSA, CBC (ZBC) le Mission Field ah rianttuantu upa hna kha CCOC FM rianttuannak kong cu ceih tti ding in an fial hna. CCOC FM Central Komiti nih an ruah ning in CCOC FM Board, Burma cu  ser a si lai.   A herhning in Komiti member chap a si lai.  Office cu Hakha ah a um lai.  Hi bantuk in Chin zumtu hna cu Khrih ram kauhnak caah rian kan ttuan tti hna lai.

CCOC FM rianttuannak caah khrihfabu le pumpak in missionaries cawm a duhmi an tam ngai cang.  A ruah hlan ah list in kan langhter te lai.  Khrihfabu kip nih phaisa thawh khawh ding in i zuam hna usih.

Ngaih a um cem mi cu Summer 2013 chung ah CBCUSA pastors le mino hna cu Revival Groups paruk ah i tthen in Khrihfabu tampi sin ah len ding in timhtuah a si.  Pathian nih A Thlarau thiang in lam A kan hruai lai. Chinmi zumtu dihlak nih "Jesuh Khrih cu Bawipa a si' tiah kan au lai.  

Ahohmanh i din lo in Khrih Vailamtah hi i put in Thawngttha a theilo mi Chin miphun hawi hna sin ah kal hna usih.

Pathian nih sunparnak co ko seh!

CBCUSA Board of Trustees 10nk Meeting

Amarillo Chin Christian Church (ACCC), Texas

March 8-10, 2013

 

Pathian lamhruainak thawng in kan meeting cu tlamtling tein kan liim khawh. Meeting a kaimi kan tam.  Pathian thluachuah tampi kan dong.  A rian thiang tam deuh ttuan kho ding in khrihfabu kip kha thluachuah A kan pek.  CBCUSA chungtel dihlak 63 kan si cang.  2013 kum kan number cu a ttha ngai.  Pathian ttihzahnak le pakhat le pakhat ttihzah upat dawtnak nih meeting hi dawh tein a kan dihter tawn.  A donghnak hi aa dawh zungzal.  

 

ACCC zumtu hna nih meeting kaimi an kan dawt tuk.  Ti le rawl ttha tuk in an kan pek.  Khrih an ttihzah le dawt ruangah khual a kan dawtning duh an nung tuk. ACCC upa le zumtu dihlak cungah lawmhnak tampi kan ngei. Hawi sin in dawtnak fak pi in kan teem caan paoh ah ka thinlung ah a chuak tawnmi cu "Vawlei ah Khrih hi um lo seh law!" ti hi a si.  Khrih zumtu kan si ruangah le miphun khat kan si ruangah dawtnak hmual a fak chin lengmang.  Kan meeting dih hlan ah pumhnak vawikhat, le a dih hnu ah vawithum kan ngei.  Dallas, Texas in Bethel Baptist Church (BBC) mino 50 reng lo nih an kan rak telpi.  Hlasak an thiam.  An i biatak.  BBC mino hna le ACCC mino hna nih hla tthattha an kan sakpi.  Tu tan Pathian thangtthat cu a nuam kho taktak ko.  Thlarau thazaang tampi kan hmu cio hna.

 

Khual in a ra mi paoh nih an khrihfabu min ACCC kan chim tikah "C" pakhat hi kan thlau piak lengmang hna i "ACC" tiin kan chim piak ttheu hna. Amarillo Chin Christian ti tiang in kan chim nain a dawh tuk tthiam.  A kan ngaihthiam ko lai.  Zarhpi zan cu pumhnak a dih in rawl dawr ah an kan kalpi tthan.  Kan tlunnak hotel ah kan phan i ttian lai kan siang hrim lo tuk hna. Zan ttim tiang Hotel Lobby ah capo kan sai i kum khat chung hmanh ah kan nih khawh lo ding tiang in kan ni hna.  Kan i lawm hna.  Thinlung vitimen ttha taktak kan hmu kho.  A ruang bik cu ACCC zumtu hna nih an kan dawt tuk caah kan tha a rak nuam tuk khi a rak si.

 

Vawi nolh 2014 BT meeting cu Chin Baptist Church, Dallas, Texas ah Spring Break lio ah tuah a si lai.  Hi tikah cun chungtel thar zong kan karh lai.  Kan rianttuan thar mi hna theipar hmuh ding a um cang lai.  A nuam chin lengmang ko lai.  Bawi Khrih vel ruang ah.

 

[tang] Bethel Baptist Church Mino Hlaremh lio

 [tang] Aa pummi mipi



 [tang] ACCC Nubu Hlaremh

 

 [tang] CBMC Pastor Sui Hliang le CBCUSA nubu chair Sailo Nu he

 [tang] Tian siang lo in Hotel ah capo a saimi pawl

 [tang] Kan tlun lei ah Denvar lei kan zuang i a langmi hawhra

 

***Hmanthlak kan tar chap te lai.

 

 

Khrihfa Biaknak le Nitlak lei Democracy

Nitlak lei ram hna cu Khrihfa biaknak a ttanh hmasami an si. Thluachuah tampi an hmu.  A tu cu Khrih cu an kal taak hnik cang.  Vawlei lei in an ram a fek tuk cang.  Anmah nih an tuah khawhmi a tam.  Pathian rianttuannak hmual a lang kho ti lo.  Biaknak an herh ti lo.  Vancung kai theng an duh ttung lo ahcun.  Khrihfa biaknak cu a ttumchuk lei lam a panh cang.  Zei ruang ah?


American Baptist Churches USA ah General Board member sinak in kum li kaa tel ve.  Cu hnu ah Board fa deuh ah an ser i Board of General Ministries [BGM] tiin kum hnih kaa tel  tthan.  An i hruaining hi a ceihkhangtu ka si ve caah ka theihmi a um ve.  Hi mit in ka zoh tikah le khrihfabu dang hna an i hruaining zoh tikah a tanglei bantuk in ka hmuhning a si. 


1) Baptist Churches pawl nih an zalawnnak Local Autonomy cu fak ngai in an hman.  Anmah biakinn cio ah an me a rem cio cang.  Hi thil nih a chuahpimi cu rianttuan ttinak (corporation) thazang ttumchuknak a si.  Rianttuan ttinak thazaang a zawr tuk cang.  Local churches nih buu rianttuannak caah thazaang an chuah tlawm tuk.  A cungbik level ah an rianttuannak cu an ngeih tthing phaisa a karh hna kha hmang in Pathian rian an ttuan hna.  Phaisa karh in rianttuan cu zumtu hna a tthangtawntu thlarau zawrnak a si.  Biaknak cu a bu in a lumsaa mi thlarau in a tthang ding a si.  Hi lumsatnak thlarau cu a tlau cuahmah ahcun kum zeizat dek kan kal khawh lai?  Pathian nih tthanghtthannak A pek hna lo ahcun Khrihfa biaknak hi Nitlaklei ram ahcun a thi ko lai.

2) Khrihfabu dang Methodist le Presbyterian churches le a dang bu pawl nih Baptist Churches hna bantuk in Local Autonomy cu tlaihtleng ah an hmang lo nain, an democracy zalawnnak nih pumpak le mah bu duhning le zalawnnak cu a chuahpi.  A tthawnter ve.  Anmah churches cio tthawn kha biapi ah an chiah ve hna.  Baptist churches hna tlaihtleng Local Autonomy phun in an kal ti khawh a si.  Bia dang in chim ahcun an democracy zalawnnak nih an biaknak cu Local Autonomy lei ah a hruai hna.  Anmah umnak local churches cio caah rianttuannak an tthawn ter.  Mibu rianttuan ttinak (corporation) thazaang a zawr ter hna.  Bu rianttuannak thazaang a zawr tikah an bu ningpi in lumsatnak thlarau a zawr ve.  Local Churches cu an tthawn ngai zong ah miphun a huap kho lo.  Anmah ca lawng ah an tthawng.  Kaupi in rianttuan tti khawhnak a zawr tikah Khrihfabu ttumchuknak lei ah an kal.  Nitlak lei ram Khrihfabu biaknak bu paoh an si dih.  Khrihfa biaknak hi democracy le liberal ruahnak in sau a kal kho theng lai lo.  Seino hna nih khrihfa biaknak hi an peh ti lo kho men, Pathian Thlarau nih A tthangh tthan hna lo ahcun.

3) Khrihfa biaknak nih Nitlak lei ram le miphun cu a ser cang hna.  Pathian thluachuah tampi an hmu cang.  An rum cang.  An fim cang.  Biaknak in buu rianttuanak a um lo zong ah vawlei lei bu a tthawngmi an tam tuk.  An uknak bu a tthawng.  An ram le miphun cu a rawk ti lai lo.  Nain, Khrih pennak tu cu a bi cuahmah cang.  Khrihfa biaknak cu thlan khur ah a pil hnik cang.  Hi hi zumtu hna kan caah ngaihchia bik a si.  Nichuak lei biaknak ngan pipi nih Khrihfa biaknak cu a dolh cuahmah.  Khrih ram a bi chin lengmang.

Chin Khrihfabu hna nih zei lam dah kan zulh lai?

American Baptist Churches USA nih a tu ning in kan kal ahcun kan thi tuan lai ti cu an hngalh.  Thlennak ding lam an kawl.  Thlennak ding caah $ 600,000 dih ding in thiamsang mi lam an kawl ter hna.  Hi kong ceih lio ah kaa tel ve.  Anmah le an khrihfabu cio ah me a rem cangmi pastors le hruaitu upa hna caah thlen ti hi a awl lo.  An ruat har ngai.  Puerto Rico ah ABCUSA Biennial Civui  2011 lio ah meeting kan tuah.  Minung kan tam ngai.  Hi lio ah thlennak kong cu kan ceih.  Kei nih "Thlennak lam nan kawl lo i a tu bantuk in nan kal ahcun nan thi tthiamtthiam lai, nanmah chan a dih in cun Baptist biakinn vialte hi a lawng dih lai.  Thlarau in kan tthanchonak lam cu a thar in kan kawl a hau" tiah ka ti ve hna.  Sau ngai kan ceih.  Bia kan khiak kho lo.  Biennial Meeting kaimi kan tam.  Mipi lei nih thlacam rualnak ngei usih an ti.  Kan dihlak in thla kan cam tti hna.  Thlennak Program tuahnak caah $600,000 cu budget thar kan suai khawh.  Ka upat ngaimi hna cu bia kan khiah khawh lo lio i thlacam ttinak an kan ngeihpi mi hi a si.  A tu hi "Thlarau nih a kan thlen (Transformed by the Spirit)" ti hi an dir pi thok cang.  A lam an kawl lio a si.  Minung a kan thlengtu cu Pathian Thlarau a sinak a lang.

A tu lio Nitlak lei biaknak nih an zulhmi lam hi Chin zumtu hna nih kan zawh ahcun Chin Khrihfa biaknak le bu hna cu kan thi colh ko lai.  Hi lam cu zulh ttha in an ruah lo mi a si cang.  Kan hmai ah thlankhur a um. Kan hrial kho lai lo. Kan tla colh ko lai.   Hi thlankhur kan hrial khawh nak ding ahcun buu rianttuannak (corporation) a tthawn a hau.  Local churches pawl tthawnter cu Nitlak lei ram nih an hman i an i thihpi mi a si cang.  An kal taak kho ttung lo.  An i chim ngam fawn ti lo.  Zalawnnak democrocy he cun an hman chih tikah an i laklawh dih cang.  Cung lei in rianttuantu hna nih hruai awk an ttha tuk ti lo.  An i hrawm khawh mi tiang lawng an ttuan cang.  Rianttuan ttinak thazaang an ngei ti lo.  Thlen (change) timi hi an herhnak a si.  An i thlen ding a herhmi cu kanmah CBCUSA bantuk Chin khhrihfabu hna nih kan I hruainak "Rianttuan tti duhnak" ah an i thlen a hau.  "A tu kan i hruainak bantuk ah an kir tthan a hau cang."  Kannih nih cun kan i hruaining hi kan lung a tling lo kho men.  Mirang hruaining a ttha deuh kan ti men lai.  Nain, anmah nih kal taak cu an duh ko cang.

1) Kannih Chinmi nih Nitlak lei Khrihfabu hna nih an thihpimi lam hi kan zulh ahcun khrihfabu a thi lai.  Biaknak bu a tha a der ahcun kan miphun hi a tha a der lai.  Vawlei lei in kannih Chinmi cu kan tthancho rih lo caah miphun thihnak zong a si kho.  Thlarau bia in kan chim ahcun "kan miphun hi a thi taktak ko lai."

2) Kan miphun hi thlarau le pumsa in tthangcho seh ti kan duh ahcun buu rianttuannak (corporation/incorporation) a tthawn a hau.  Local churches pawl nih kanmah thazaang tthawn cio hi biapi ah kan chiah sual ahcun CBCUSA bantuk Chin khrihfabu hna zong hi thazaang a der lai.  Miphun level in buu rianttuannak lawng nih miphun a tunmer  khawh.  Khrih ram a kauh ter khawh.  CBCUSA ahhin Local church in cun buu 8/9 lawng nih rian kan ttuan khawh lai.  Buu 50 hrawng cu kan fa ngai rih.  Nain, kan i hlum i rian kan ttuan tti tikah khrihfabu fa tete nih thazaang lianpi kan ngei kho ve.  Khrihfabu lian bantuk in thazaang kan ngei kho ve.  Nitlak lei biaknak pawl nih an ngeih khawh lo mi buu rianttuannak thlarau tthawnnak hi kan ngei.  Hi ruangah buu rianttuannak cu a biapi taktak.  Hi thlarau lawng nih kan miphun hi thlarau le pumsa in a nunter khawh lai.

Miphun le ram a dawmi nih cun hi kong hi biatak in kan bih in kan ruah a herh.  Cuai kan thlai a herh taktak.  Keimah hruaitu ka si ruang ah si lo in Nitlak lei ram ah kum sau kan um hlei ah a chung deuh rianttuannak ah kaa tel ve nak in kaa fianmi a si.  Hi hi biaknak caah "biatak" a si in ka ruah.  Ka chim ngamnak a si.  Mah ca ruat in biachim cu Pathian nih a duh lo.  Khrihfabu zawnruahnak le kan Chin miphun hi Khrih zumhnak in kan nun khawhnak ding lam kha dap in ka chim duhmi a si deuh.

Bawi Khrih rian ah,

C Duh Kam
Executive Minister
CBCUSA