Lairam Babel Innsang A Cim Te Lai!

 

Vawlei cung khua vialte hi ni hnih chung ah phanh khawh a si cang.
USA in Yangon cu ni hnih.  Lairam zong ni hnih ah phanh khawh a si. 
USA in Kokalta cu ni khat. Kokalta in Aizawl, Mizoram cu minit 45 lawng a rau. 
Mawtor in lanh ahcun Lairam cu ni hnih ah phanh khawh a si. 
USA cu a kau tuk.  Nain, awl tein Laimi kan i tong kho.

Pathian dawtnak thawng in Laimi kan ca zong ah
vawlei cu a fa tuk cang. 

 

A ka ruah ter ngaimi cu Hakha State High School [1971-75] kan kai lio a si.

Kan khua Thau in Hakha cu meng 52 a hla.  Ke in thi dengmang in ni thum

chung kan kal.  USA ahcun suimilam pakhat nak tlawm kan kal.

 

A nai te nain, ni tam tuk kal a haumi cu Chak Lairam in Thlang Lairam Paletwa

khua tlawn hi a si. Hakha - Mandalay - Yangon - Akyab - Paletwa ah kal a hau.

Kawlram khua vialte cul dih hnu ah phak a si.  Hi ruangah Baptist siangbawi

hna nih Thlang Lairam an rak tlawng kho lo i nihin tiang zumlotu an tam

nak a si.  Paletwa khua le Lawngtlai khua cu Kaladan tipi hi

India cozah nih Tilawng lian kalnak in le tlang lam lian a siam dih in cun

aa naih chinchin lai.  Meng 60 hrawnghrang te?

 

Matupi in Paletwa lam an pemh khawh in cun Hakha in Paletwa cu a hla ti lai lo. 

Awl tuk in, chak le thlang, chuah le tlak kan i tlawng kho cang lai.

Hi ka khua le ram hi CCOC Follow-up Mission riantuannak ding hmun a si.

 

Lairam in USA nak in a hla deuh ah ruahmi Paletwa khua cu kan kam te ah 

 a ummi khua a si cang lai.   Aa hmu bal lo mi Laimi cu awl tein kan i hmu

kho cang lai.  USA nak in a lian deuh tuk in kan ruah tawnmi

Lairam cu ram fate ah aa chuah cang lai.

 

Falam le Hakha cu meng 42 lawng a hla.  Falam ah High School 8th Standard

kai ding in 1971 ah kan rak kal.  Mizo tapung ruang ah ram a buai lio a si caah

ID card kan ngei lo i, Zatkuat khuabawi nih zan khat lawng riahnak  nawl

a rak kan pek.  ID card siam ding in khua ah ka hawi pa tleicia Tv. Kung Thang

he kan rak tlung.  Mawtor a um lo.  Falam in Hakha cu ni khat ah kan rak

khen.  Hakha in meng 40 a hlami Hriangkhan khua cu ni khat ah

kan khen  tthan.  Hakha le Thantlang cu meng 18 lawng a hla.

Lairam mawtor lam hi pe 30/40 kau in i co dih sehlaw Falam le

Hakha le Thantlang cu khua khat ah a cang lai.  Zarhpi zing ah

kan duhmi biakinn poah ah kan i pum kho lai.  Hakha in meng 176

a hlami Matupi khua cu suimilam pathum hmanh kan rau lai lo. 

Ruazua khua cu suimilam pakhat le cheu ah kan phan lai.

 

Awl tuk in kan i tlawnkai khawh cang lai caah nihin kan ruah ning bantuk in

kan ruat ti lai lo.  Aa kawm kho lo ding phun ruahnak vialte hi an i

thleng dih te lai.  Lairam cu a fa tuk cang lai  Khrih Thawngttha

kan chimnak ah um kal a awl cang lai.  Gospel team in kan i leeng

 kho hna lai. Kan holh zong hi kan i theih piak viar te lai. 

Kan holh hi hrihhram aa khat dihmi a si caah kan thiam cio te lai. 

Lairam Babel innsang cu a cim ruangmang te lai.

Pentecost Ni ceu tu hi tleu pul in a cer lai.  Zan ah thlapa

le arfi hna zong an ceu zungzal lai.  Lairam cu

dawtnak ram ah a cang te lai. 

 

Kan Bible chung ah Babel cu holh dannak (Genesis 11:7), Pentecost Ni cu

holh i theih piaknak ni an si (Lamkaltu 2:8).  Pentecost Ni cu Dawtnak Ni kan ti lai.

Peter nih "Vailamtahnak ah nan thahmi Jesuh cu Pathian nih Bawipa le

Khrih ah a ser cang" (Lamkaltu 2:36) tiah a chim tikah an thinlung

a hriah hna.  Unau le hna, zeidah kan tuah lai? an ti. 

Cu ti cun, an ngeih thil le ti le rawl an i hrawm kho. 

Ni fa tein Bawipa an thangtthat tti hna.

 

Laimi cu kan holh nak in kan thinlung tu hi aa dang deuh.

Kan holh cu Babel innsang holh he tahchunh phu hmanh a si lo.

Aa khat ngai ko hna.  Kan um tti khawh hna lo caah

kan i theihpiak khawh lo tu a si.  Laimi khrihfa dihlak hi

Pentecost Ni khrihfa bantuk si lawng kan baa.

 

Babel innsang a tlu ruangmang te ko lai.

 

 

 

 

 

 

Chin Khrihfabu Vialte Sinah Thlacam Cahnak

Chin miphun hi mi tlawmte kan si.  Chinram hngaktu le ramdang khuasa dihlak komh ah

million pakhat hmanh kan si lo.  Vawlei cung ah sifak bik ram Myanmar ram chung ah

sifak bikmi miphun kan si.  Miphun hawi dang cu anmah pumpak in an si a fah hmanh ah

an vawlei tal a rum.  A chung ah lung man sung an ngei.  Rethei le thaba ngai in an ttuanmi man cu an hmuh khawh. 

Biaknak Rianttuantu hna caah thlacamnak kan herh tuk!

Kannih Chin miphun le Chinram cu Pathian nih A serning tein a um peng ti tlak a si rih.  Kan vawlei nih a chuahmi thil man sung a um lo. Kan vawlei hi a cawl lo. A zengbaimi a lo. Thisen rep ngei lo midamlo bantuk a si.  Kanmah minung lawng hi a cawl kho ding in ser kan si.  Kan vawlei hi kanmah nih cawlpi le lehthal khawh lawng ah Chinram nih duhnunnak a ngei kho ding a si.  Pathian nih hi kan dirhmun in a cawl kho ding ah A rak kan sermi hi khuaruahhar cem a si.  Khrih Thawngttha cu Rev. Arthur le Laura Carson hna nih Chinram vawlei ah March 15, 1899 ni ah a ci an tuh. Vawlei a chia ngai nain, Khrih Thawngttha thlaici cu a kheu ve ko.  Jesuh Khrih nih "Thlaici cu vawlei tthatnak ah an tla" (Matthai 13:8) a ti mi a lo.  Kan Chinram vawlei cu a ttha lo nain, Thawngttha thlaici a tlaknak cu Chinmi hna kan thinlung vawlei ttha kha a rak si.  Hi vawlei ttha cu Pathian nih nunnak tiva a luanter nak hmun a si.  Hi ti te in Chinram ah Khrih Pennak ram cu a kau cuahmah i nihin ahcun USA, Canada, Europe, Australia, New Zealand le Asia ram kip zong ah Chinmi umnak paoh ah Khrih Pennak cu a tlung.
 

Nain, Thlang Chinram ahcun Pathian Thawngttha a thei bal lo mi tampi an um rih. Khrih hi an duh lo zong a si lo.  An hngalh rih lo ca tu ah A zultu an si khawh rih lo nak a si.  Chinmi zumtu hna thinlung ah Khrih Thawngttha chim duhnak a chuah caah 1983 - 1999 chung cu Zomi Baptist Convention hruainak in CCOC rian cu ttuan a si.  Thlarau tlaumi tampi an rak tlaih hna.  2013 kum in CCOC Follow-up Mission cu ttuan tthan ding in CBCUSA nih Chinmi zumtu dihlak cu sawm kan thok hna. Chin miphun dihlak nih "Jesuh Khrih cu Bawipa a si" (Filipi 2:11) tiah kan ti dih hlan tiang mission rianttuan ding in timhtuahnak kan ngeih lio a si.
 

Hi rianttuannak cu a lian tuk.  Jesuh Khrih nih A thawhtthan hnu ah a chimmi Fialmi Thawngttha Chim Rian a si.  Hi hi Khrih nih vancung le vawlei cung i a ummi nawl ngeihnak vialte pek a si hnu ah a chimmi a si (Matthai 28:18-19).  Kan miphun hawi hna sin ah Khrih Thawngttha chim ding rian a tawlreltu hruaitu kannih cu tthawnnak kan ngei lo.  Minung menmen kan si hna.  Hi rianttuannak hi aa khinh ngam ding kan si lo.  Nain, Bawipa Pathian bochan in le Chin zumtu mipi nan dihlak thlacamnak bochan in ttuan ding ah kan i ot phawt ko.  Rianttuantu le tawlreltu kan dihlak caah Bawipa Pathian sin ah thla kan campiak u.  Mitthli kan thlak piak u. Kan aupiak u.  Bawipa nih nan ttah aunak aw cu a theih hrimhrim lai.  Thlarau in Chin miphun dihlak zong kan i tthang kho ko lai.  Khrih hi zohchih in kan kal tti kho ko hna lai (Hebru 12:2).  Nan thlacamnak kan miphun thazaang!

Chin Miphun hna caah Rianttuanmi nih thlacampiak an herh tuk!

Mithiang Paul nih cun Lamkaltu tlangval no te Timothy kha feltuk in atanglei bantuk in a rak cah:
 

"Dai te le rem te in kan um i kan biaknak phung kha ttha tein kan zulh khawh i ziaza ttha in kan um khawh nak hnga, a hmasa bik ah siangpahrang le nawlngeitu hna caah khan Pathian sin ah nawlnak le thlacam piaknak le halpiaknak le lawmhnak bia chim nak kha kan tuah awk a si tiah fial kan duh hna" (I Timothy 2:1-2) tiah a rak ti. 
 

Paul nih cun kan ram rianttuantu hna caah Pathian sin ah mibu pi in thlacampiak  (public prayers) le lawmhnak bia chim a herhnak kong kha a rak chim.  Jesuh Khrih a thihnak in kum 30 hrawng a rauh ah hi cakuat hi ttial a si.  Khrih kha pumsa in a nun lio a hngaltu an si.  Khrih rim hang a tlau rih lo.  Khrih vailamtah hmual a ngeih lio a si rih ko.  Khrih nih A Thawngttha chim ding in hranhram lo in A auhmi Paul nih ram hruaitu le nawl ngeitu hna caah thlacam a herhning cu fiang ngai tein Timothy kha ca a rak kuat.

 

 

Pathian sin thlacamnak lawng nih teinak a kan pek khawh lai!
 

Chin Miphun biaknak le uknak lei rianttuantu kan caah nan thlacamnak kan herh tuk hringhran.  Khrih Khamhnak Thawngttha chim kan i timh lio a si.  Uknak lei in kan Chinram ser ding rian thok timh ka lawng a si rih.  Leikhuaza Chin khrihfabu vialte nih aw chuak in thla kan campiak zungzal u tiah Bawi Khrih min in zangfah kan nawl hna.

Pathian nih kan Chinram le miphun hi A thluachuah tampi in vurh hram ko seh!
 

Bawipa kan umpi ko! 


C Duh Kam, EM
CBCUSA 

 

FEBRUARY 20, 2013

65nk LAI PHUNPI NI
 

Happy Chin National Day 

To

All the Chins in the Globe!
 

Kan sunhloihmi kan Lai Phunpi Ni kan phanh khawh caah

kan i lawm tuk cio hna.  Biaknak lei nih cun kan miphun

A kan sertu le cawisangtu Pathian kan thangtthat.

Thlarau in a hrintthanmi zumtu hna hi vawlei a kaltaakmi

kan si lo.  Hi vawlei ah a tlungmi Khrih pennak ah

aa lawmmi tu kan si hna. Kan umnak ram le vawlei

hi ser ding ah Pathian nih rianpekmi kan si.
 

Filosofar Aristotle nih uknak (politics) kong a chim tikah

 "Minung cu a chuahnak in uk-hruainak saram a si

(Man is a political animal)" tiah a rak ti.
 

Ahohmanh semnak ram le vawlei he aa tthen kho mi kan um lo.

Kan fim ahcun techin le fapar hna zong nih an hrihhram cu
an dothlat peng lai. An zoh peng lai.  An ttial te ko lai.

An thinlung nih Chinram [Lairam] ttheu hi a fuh te lai.

Thisen in an tuanbia thoknak a si caah.



CBCUSA Office ah Zuarmi Lai Cauk

Lai Khrihfa Cattialtu Phu (LKCP) nih Bible Hrilhfiah an kan ttial piak.  Kan van tthatnak cu
mah holh tein Bible Hrilhfiah ngeihnak ding ah cathiam sang ngeih hmasat a hau.
Hi bantuk Bible thiamsang tampi kan ngeih caah cattialtu kan ngei kho. 
Khrihfa kan sinak kum 100 kan si hnu lawng ah hi dirhmun hi kan phan kho.
Kan miphun nih a donmi Pathian thluachuah a si.

 Cauk cawk ding kan ngeihmi hna cu:
1) II Korin Cakuat (by Lecturer Ngun Cer Chin)
2)Baptist Tuanbia le Zumhnak (by Dr. Sang Awr)
3) Managing the Church and Its Related Organizations (by Dr. Sang Awr)
4) Pathian Sunparnak Caah (by Dr. Sang Awr)
 5) Theological Themes for Our Times (by Dr. Samuel Ngun Ling)
6)  Mirang Holh in I Chawnhbiaknak (by Dr. Van Ni)
7) Thinlung Hma A Tuarmi Hna Damternak (by Sayama Julie Moe Ngunkil)
8) Zeizong A Tuahkhotu Pathian le Nganfah A Tuarmi Minung (Rev. Mang Hre)
9) Thantlang Tipil Khrihfabu Tuanbia (by TBC, Thantlang)
10) Efesa Cakuat (Rev. Za Mang)

A man: Uk chahmi $10.00; Uk panmi $5.00.
Laiholh in ttialmi cauk ngeih khawh kan i zuam lai.

[tang] Indianapolis, IN ahcun hawi he zing ah lakphak ti din tti khawh a si.
Lairam sining in kan nung kho.  A ruang cu naih niam tein kan tthutdir caah a si.

Chin Baptist Churches USA
7105 Chimney Rock Ct, Indianapolis, Indiana
Ph: 317-489-0383

CCOC Follow Up Mission Komiti Meeting

February 14 zan in February 15 zanlei 3:30 pm tiang tuah a si.  Hi rianttuannak caah Pathian nih lam A kan hruai ko.  Khrihfabu tampi nih Khrih Thawngtha chimnak caah tampi kan thawh cang.  Chin zumtu paoh tel cio ding in sawm dih an si lai.  Ram kip in tel cio ding ah saduh kan that.  Kan saduhthah le thlacamnak cu Khrih Thawngttha a thei bal lo mi kan miphun hawi hna sin ah kal in chim hi a si ko.  Pathian bochan le zumhnak in ttuan ding mi a si.  Tawlreltu le khuakhangtu hna thinlung ah zeidang an ruah chih mi a um lo.  Thawngttha chim hi a si ko. 

CBCUSA OFFICE ONNAK

Pathian nih kan ruah phak khawh lo tiang in thluachuah A kan pek.  Miphun santlai lo te kan si ko.  Nain, A dawtnak cu kan cungah a hmun peng.  Dawt awk tlak lo kan si ko nain, rumro lo in A kan dawt a si ko.  Chin Baptist Churches USA cu BT meeting March 8-10, 2013 in cun chungtel member 61 kan si ve cang lai.  A rianttuan ding ah khrihfabu kip hi kan thangcho chin lengmang.  Milu kan tam.  Pathian ah lawmhnak kan chimmi thawhlawm a tam chin lengmang.  Bawipa cu A rawl a ttaam bal lai lo.  Kan miphun hi Bawipa ti le rawl ah kan cang kho ve.  Kan miphun damnak caah kanmah lila a kan hman khawh cang.  Bawipa nih sunparnak co ko seh!

[tang] CBCUSA Office Inn

 [tang] Inn hmai ah EM

 [tang] CBCUSA President Rev. Ngun Awi

 [tang] ICBC nungak nih hla in Pathian a thangtthat lio

 Zanriah dum tti lio

 

CBCUSA YOUTH UPA TONNAK

CBCUSA Mino Upa hna tonnak cu kan phan dengmang cang.  Pathian nih lamhruai hna seh!  Mino nih Pathian thangtthatnak hla an sak lo ahcun Khrihfa biaknak cu a fe lawng a taang tawn.  Mino cu tlang cung in a luangmi rial ti dai bantuk an si.  Lairam ah a um lo mi mino nih tlangcung rial ti dai ti zong cu an hngal kho lo men lai.  Hi tikik te cu Lairam khuasa Laimi kan caah kan tihal a riamhtertu bik a si. "Mino cu thlarau tihal a riamhtertu nan si" ti hi kan chim duhmi a si.

Chin Bethel Church le Chin Baptist Mission Church le Lai Baptist Church mino hna nih abu tein don le zohkhenh ding in an i timh lio a si.  Kan Lairam nih Jesuh Khrih a herh bantuk tein Mino hna lungrualnak [youth unity] hi a herh tuk.  Thla cam piak hna usih.

Pathian Thangtthatnak Caanhmannak:

February 16, 2013 Saturday
Hmun: CBC (Laurel) Biakinn
Caan: 7:00 pm - 10:00 pm

Pumh hruaitu: ... Hniar Hlun (LBC, NY)
Sermon: ... Pastor Ronald Charles Nun Uk (CCBC)
Zapi ca thlacam: ... Pastor Sui Hliang (CBMC)
Biatawi Chim: ... Rev. Rollin Van Bik (LBC, DC)
Solo: ... Milla Biak Nawn Par, Zai Tin Tial, Van Tha Hlei Dim
Acting Song: ... CBC (DC) Mino
Donnak Hla: ... DC Mino
Thluachuah Pe tu: ... Rev. Phillip Hreng Ling (CBC, DC)

"Bawipa lianhngannak cu chim tti u si law a min cu thangtthat ti u sih" - Salm 34:3

CBCUSA le CACC nih Kanpalet Boarding ah Chiahmi Sianghngakchia

 

Boarding School cu CBCUSA le Melbourn Chin Church nih CACC tawlrelnak in

kan sak.  Kanpalet peng khuate ah a ummi siangngakchia hna kha Boarding ah an chiah hna.

Tu kum ah a ummi hi 20 an si.  Sianginn on tthan tikah 40 hrawng sianginn kai ter ding in

timh an si.  Cacawn ter pah in Pathian bia an chimh hna.

 

[tang] Siangngakchia Hmanthlak
javascript:;

 

Bawipa, lam kan hruai ko!

 

 CBCUSA Office Onnak le CCOC 2nd Round Mission Meeting

CCOC2RM meeting 

Ni le caan: February 15, 2013 @ 9:00 am - 4:00 pm

Hmun: Chin Evangelical Baptist Church, Indianapolis, IN

 

CBCUSA Office Onnak

Ni le caan: February 15, 2013 @ 4:00 pm

7105 Chimney Rock Court

Indianapolis, Indiana

 

CBCUSA Officers Council Meeting

Ni le caan: February 15, 2013 @ 7:00 pm

Hmun: CBCUSA Office

 

CBCUSA BT Meeting

Ni: March 08-10, 2013

Hmun: Amarillo Chin Christian Church

Amarillo, Texas