Bawipa Thangthat

Monday, December 31, 2012

CBCUSA in Kum Thar 2013 Thluachuah Lawmhpinak
 
Chinmi zumtu hawikom vialte hna,
Kan umnak ram cio ah Pathian nih lam kan hruai cio ko seh!
Kum Thar 2013 lawmhnak nan pumpak, chungkar le khrihfabu cio ah
tlung ko seh!  Kan miphun hi Pathian nih lam kan hruai ko seh!
 
2013 kum cu Chinmi kan caah kum thluachuak a si hrimhrim ko lai.
Kan semnak Chinram (Lairam) ah Khrih Thawngttha kan chim tti hna lai.
Kan umnak ram cio in Lairam ah Khrih Vailamtah pu in
kan zuang hna lai.  Khrih dah ti lo,
phorhlawtpi ding dang kan ngei lo.
Khrih mualphonak Vailamtah cu kan caah
Pathian tthawnnak a si ve cang.
 
To God be the glory!
 
 

Thursday, December 27, 2012

Hakha General Hospital Chapel

CBCUSA nih 2012 kum chung ah Chinram khualipi Hakha ah $45,000 dih in sak mi Chapel a si.  Khrihfabu dang nih a kan bawmmi cu an um ve nain, kanmah deuh nih kan sak ti ding a si.  A tu cu damlo chungkhar nih lungrethei in an um lio caan ah thlacamnak hmun an ngei cang.  Thihnak ton sual tikah ruaksuannak hmun a um cang.  Lai khuate in sizung an rak phak tikah tlun inn ngei lo an tam.  Mizaw a len hna tikah an thil chiahnak a um lo.  Fur ah dornak a um lo tikah dam ttemttuam in an um ttheu.  A tu cu ngaihchiat lungretheihnak an ton tikah dornak hmun an ngei cang.  Zumtu nangmah thawng in a si.  Pathian nih Chin khuapi Hakha ah hi bantuk chapel dawh tuk mi hna a so khomi dirhmun ah A kan chiahmi hi ruah setmat ahcun Bawipa thangtthat lo in na um kho lai lo.  Zeidah kan ttuan tti rih hna lai? nan ti ko lai.

[tang] Hakha General Hospital Chapel
I bawmh ahcun tlawmte kan thawhmi nih thil lianngan pipi a ttuan khawh ko hna.
Cu caah buu in rianttuan hi sifak santlai lo miphun hna kan caah a herh khun.
 
 


Tuesday, December 18, 2012


US State Department ah Lennnak
December 11, 2012
 
Anne Richard, Assistant Secretary of State (Population, Migration and Refugee) cu State Department ah a tthumi ah mi reng sang ngai a si.  Seeking Refuge: The Chin People in Mizoram State, India team in Matthew Wilch, Lawer, lead writer/editor, Jenny Yang, Director of Advocacy and Policy at World Relief, le Pu Zo Tum Hmung le CBCUSA EM Rev. Dr. C Duh Kam hna nih Mizoram ah khua a sami kan miphun hawi ralzaam hna kong cu bia an va ruah. "Amah ton khawh hi a har tuk. Atu bantuk in kanmah Chinmi kong ah Assistant Secretary ton khawh hi Chin tuanbia ah a voikhatnak a si men lai. Kachin, Karen le adang kong he hmunkhat ah ton ahcun a fawi deuh ngai lai. Nain, Chin miphun kong lawnglawng chimh dingin kan ton khawh hi CBCUSA nanmah thawng a si. Nanmah bawmhnak le thlacamnak ruangah report ttha ngai kan ttial kho. Amah A/S Richard hrimhrim nih rak ka tong hna seh, tiah a kan timi a si fawn" tiah Pu Zo Tum Hmung nih a ti.

[tang] Anne Richard cu Matt Wilch nih bia a ruah lio
Mirang pahnih, Asian panga.
 
[Cung] Anne Richard pawng a tthumi hi Hoa Tran a si.
PRM ah Asia lei a tlaitu a si.
 [cung] Hoa Tan pawng ah a tthumi hi Jennifer Handog a si.
PRM i program officer tthiamtthiam a si. Mithar a si.
Chin, Kachin le Wah hna tlaih dingin a tthar in rian an khinh.
A hlan ahcun Hoa nih a tlaih dih.
 [cung] Jenny Yang, Director of Advocacy and Policy at World Relief a si.
Jenny bia a chim cang ahcun mi thinlung a la kho tuk.
[cung] Pathian nih a kan dawt.  Kanmah caah anmah le anmah bia an i ruah.
 
Pu Zo Tum Hmung hi Rangoon ah Peace talk a kal ve nain, Sunday, December 9, 2012 chun ah an dih cangka in zaan ah U.S ah A/S Richard ton duh ruang ah a rak zuang tthan colh. Kan tonnak hmun hi amah office ah a si. 4pm ah kan ton. 30 minutes chung lawng caan ka ngei lai, tiah Hoa nih a kan ti. Nain, kan dih kha 5:30pm ah a si. Caan tampi a kan pek, kan i lawm. Upa lian kan ton khawh cu lung a hmui ngai. Cun, Jennifer  Handog nih hin Mizoram ah ka tlawng ve lai a ti ve.
 
Pu Zo Tum Hmung nih cun "US cozah pi nih Mizoram ah Chin ralzaam an um timi a pawm khawh ding a biapi bik. Kan report cu hmual a ngei. Jennifer nih Mizoram a kal khawh taktak ahcun lam tampi a awng lai. Mizoram um Chin ca lawng hmanh si loin Chin State caah humanitarian aid/development lam sialtu a si fawn lai" tiah a ti. Hi team hna an website cu www.chinseekingrefuge.com a si.
 
Christmas caan sunglawi lio ah thawng ttha tete theih hi a nuam khun.  Kan Chin miphun hi Pathian nih kan cawisang chin ko seh!  Kan ram hruaitu upa hna zong Pathian nih hmang chin ko hna seh!  Amah Pathian ttihzahmi hruaitu kan ngeih khawh hna hi kan thluachuah hmuhmi a lian hringhran.
 

Wednesday, December 12, 2012


CBCUSA Office, Indianapolis, Indiana

               Chinmi tambik umnak le Chin Churches lian kan ngeihnak khua cu Indianapolis, Indiana a si.  2nk cu Dallas, Texas le 3nk cu Washington, DC a si. USA i khuapi lian le dawh tampi ah Chin khrihfabu hi kan ngei fawn hna.  A tanglei map ah rawng aihre in a ummi khua paoh ah Chin khrihfabu kan um hna.  Indianapolis, Indiana cu USA nichuah lei hmun lai deuh ah a um. January 2013 in cun Indianapolis, Indiana ah cantling in office kan ngei kho cang lai.  Hi ka khua hi USA Chinmi zumtu dihlak nih center ah hmang in Chinram hmun kip ah 2013 kum in mission rianttuan kan thok cang lai.  Leikhuaza Chin khrihfabu hna zong nih rianttuan tti ding in Joint Mission in nan i tel cio khawh tik ahcun kan Chinram ah Bawi Khrih Pennak cu a tlung tuan ko lai.  Thla cam tti hna usih.  Kan caan le chan ttha hi man ngei tein hmang tti hna usih.

USA ram chung Chin khrihfabu hna umnak
(Aihre rawng hi Chin zumtu hna kan umnak)





[tang] Vawlei cung ram kip kan umnak in Chinram ah Vailamtah tung put in zuang hna usih.
[tang] Chin State (Lairam)
Lairam tlawn duh tikah, Washington, DC in Kolkata, India tiang ah suimilam 17, Kolkata in Aizawl, Mizoram hi suimilam pakhat, Aizawl in Hakha, Thantlang, Falam le Tedim cu mawtor in nikhat kal asi.  USA in Hakha cu ni thum ah phak khawh a si. Ramdang ummi kan caah Chinram cu kan inn kam te ah a um tiin ruah ding a si.  A hla lo.  Vawlei cu khua te pakhat (Global Village) in an ruah caah kan umnak ram cio in mit in hei cuanh khawh mi bantuk a si.  Thlang Chinram ah a ummi Bawi Khrih nih hin ramdang Chinmi zumtu hna aw hi awl tein theih khawh ding in a um cang.  Chinram map a lai in a thlang lei hmun hna ah mission rian cu ttuan ding kan si. Lairam cu Bawipa ram ah kan ser lai.
[tang] Chinram (Lairam) Cherry Par
  

Vancungmi nih cun "Khrih cu thihnak in thawhter a si cang i nan hmai ah Galilee ah A kal chung cang" tiah zultu hna kha a ti hna. Kannih zong nih Thlang Lairam ah Vailamtah put in kal kan i timh tikah Amah Khrih cu kan hmai ah A rak kal chung cang.  Kannih cu pumsa in Thlang Chinram ah kan kal kho lai lo nain, kan thlarau le thinlung cu Asia, Australia, Europe, le North America in van va bang an zuan ve tikah Khrih nih hmai panh tein nan ra cang maw tiin A rak kan don ve lai.  

[tang] CBCUSA BM meeting
Nutling le Patling minung 500 nih CCOC 2nd Round Mission rian cu kan ttuan ko lai an ti.
Pathian thangtthathnak hmun ah a pummi minung 3500 hrawng nih lungtho ngai in
kan kal ko lai tiin kut kan thlir tthan.  Cu ti cun, Lairam mission rian cu ttuan ding
in timh le lamh a si cang.  Kan thinlung le thlarau ah Khrih bia cu tuh kan thok cang.



[tang] CBCUSA Pastors hna
Ral ttha ngai ding an lo ko.  Pumrua ttha zong an tam. 


 

Monday, December 10, 2012


Kansas City Chin Churches Pathian Thangtthatnak
December 08 - 09, 2012

Zumtu hna kan caah Pathian thangtthat tti hi a nuam bik ko.  Thinlung aa hliphau.  Pathian Bia cu thluak in thinlung ah a luang.  Thinlung nih thluak le mit le hna le kaa le pum tthen kip ah a kuat tthan.  Cu ti cun, kan thisen a lumsa.  Thlarau rianttuannak thazaang kan hmu.  Kan zumhmi aa khat.  Mi kip nih Pathian muisam keng kan si cio mi kha kan van theih tthan.  Kan lak ah dawtnak thlizil a hrang.  A ziam kho lo mi Pathian vel le zangfahnak ruangah.

CCOC 2nd Round Mission rianttuannak caah 2012 kum dihlak thla nga a duh ah minung pakhat $ 5.00 nak tlawm lo in, zumhnak in tho ding in khua kan khaan.  Pathian nih thluachuah a pek.  Tampi a chuak cang.  2013 kum ahcun minung pakhat $ 25.00 nak tlawm lo in zumhnak he kan ti.  Zei tin hme a si khawh lai?  Kan tuah kho ngai hnga maw timi thinlung kha Satan sin in a ra colh.
Khrih nih vawlei khuazakip ah va kal ulaw miphun vialte hna khi
Ka zultu ah va ser hna u tiah el khawh lo ding in A kan fial
Matthai 28:19



ZBC nih CCOC palai 100 thlah ding in an rak khaan lio ah Pathian rianttuantu kan pa le lila nih kan thlah kho hnga maw? an rak ti ve ko.  Nain, Khrih zumhnak in ttuan ko usih timi nih a tei.  An thlah taktak.  Khrih Thawngttha an chim.  A cheu nih an nunnak le thisen an pek.  Laitlang ah Khrih ruangah nunnak pek tiang in Thawngttha chimnak kong cu tlang mei alh bang a lawn thluahmah.  Nuhmei le pahmei nih um awk an thei ti lo.  Phaisa phar le mucih tamat cu a mui hmanh hmu bal hna hlah.  An arbawm an zoh.  An vok kawm an bih.  Kan arte le vokte ngeih chun te hi Thlang Lairam ah kan thlah ve ko ne lai an ti.  Cu ti cun, ZBC nih CCOC rian kum 16 chung an ttuan tikah zumtu thar 22,000 an hmuh chuah hna. 

Kannih cu arbawm le vokkawm kan ngei ve ttung lo i zeitindah kan si ve ne lai?  Lungre a thei tuk ko ne lo maw?  Laimi leeng le val hna, zeitindah kan tuah ne lai?  Mirang nih Wallet le Check Book le Bank Card le Credit Card an timi hna nih Lai nuhmei le pahmei hna arbawm le vokkawm cu a tei kho te ko hnga lo maw?  Na pum cungah a ummi vialte cu Bawipa nih an relpiak ko lai.  A chuah tam zong ah a thun tthan lengmang tu cu Jehovah Jireh Pathian a si zungzal lai.

Kansas City Chin Churches hna Pathian thangtthat ttinak ah Zarhte zan ah kei, Zarhpini ah Dr. S Hre Kio nih Thawngttha kan chim. Pathian nih a kan umpi ko lai.  Mi lung a tho ko lai.  Zumhnak in kan ttuan khawh ko lai.  Bawipa nih A kan hruai lai.

Kansas City Chin Churches Pathian Thangtthatnak




 [cung] Lautu Christian Church Mino
 St. Joseph Chin Baptist Church Mino
 [cung] Kansas Chin Baptist Church Choir
 [cung] Kansas City hruaitu upa hna he
[cung] Saya Za Bik le hawi (Trio)





 

Saturday, December 8, 2012


CCOC 2nd Round Mission Board Meeting

December 07, 2012 ni 9:00 am - 9:30 pm tiang kan tuah.  Chinram peng kip USA state dangdang in pastors hna le Thlang Lairam lei in pastors le Kansas City ah a ummi upa hna nih an kan teipi.  Mission kong ah saduhthahnak chim le ceihttinak kan ngei.  Kan i nuam ngai.  Nihin tiang kan kalmi ah Pathian nih A kan umpinak a lang ngai.  Hi rianttuannak caah Chinmi zumtu pumpak cio ih nan zumhnak kha bochan in ttuan ding a si.  Nangmah na tel lo, na kal lo ahcun kan ttuan kho lai lo.  Nangmah na kal lo ahcun hodah kal in a ttuan lai?

Thlang Lairam ah Buddhists pawl nih biatak tein mission rian an ttuan ve.  Khrihfami nih khrihfa ah canter kan timh hna bantuk tein Buddhists ah can ter an timh ve hna.  Kan ruahnak nak in an mission rianttuannak a rak ngan deuh.  Mindat khua ah Pathian rianttuantu pakhat nih an rianttuanning cu a kan chimh.  Buddhists ah an thlenmi hna an tam ngai.  Chinram ah Khih Pennak hi a kau lei lam panh lo in, a bi deuhdeuh.  Khrih Thawngtha hi kan chim lo ahcun, kan ram cu biaknak dang nih a khuh tuan ko lai.  Cu caah, dawtnak thinlung pu in Khrih an theih khawh ve nak ding ah chim ding hi Fial kan si. 

 [cung] Rev. Dr. S. Hre Kio biachim lio
 [cung] Rev. Dr. S Hre Kio biachim lio
 [cung] Lai jacket ai hrukmi Rev. Kham Za Nang (Tonzang Baptist Association)
 [cung] Mindat Saya Thang Aung
 [cung] CCOC2RM meeting kaimi
 [cung] CBCUSA AEM Rev. Dr. Thlaawr Bawihrin
 [cung & tang] Meeting lio
 [tang]  Thing par ah vate an i hngilh lio.  Pathian thilser aa dawh ning!
Thlichia le khuasik nih a den hna caan ahcun harnak an tuar tawn.
Khrih nih cun thingpar ah bu an ngei, Kei cu lu chiahnak hmun
hmanh ka ngei lo tiah a rak ti.
 [tang] Mindat in Rev. Kee Thang, Austin, Texas
[cung] U Joseph Than Shwe, Zotung Christian Church, Kansa le Rev. Hrang Kam, GCBC
 
 

Tuesday, December 4, 2012


Zei Ruang Ko Ah Dah Thawngttha Chim?

Paul nih a thinlung in a temmi hi ruat law na theih ko lai.  "Thawngttha ka chim menmen ruang ah hin kaa phorhlawt awk a si lo.  A ngaite ti ahcun, va chim, tiah fial pei ka si cu.  Thawngttha cu chim lo in rak um ning law, zeitluk in dek ka caah a poi hnga!" (Yet when I preach the gospel, I cannot boast, for I am compelled to preach. Woe to me if I do not preach the gospel!) [I Korin 9:16].

Thawngttha hi chim lo ahcun a poi tuk ding in Paul nih aa ruat.  Vawlei le Kawlram in cun chim rih lo in, kanmah Chinmi lak ah zumlotu an tam tuk.  Chim lo ahcun a poi tuk in kan ruah ve ko lai.  Khrih nih A kan fialnak taktak kan theih tikah cun.

Pathian nih na sin ah Profet Isaiah hmang in a chimmi cu "Ahodah ka fial lai?  Ahodah ka lamkaltu a si lai?" a ti (Isaiah 6:8).  Paul nih fiang tuk in a theih.  Judahmi le Jentailmi hna dannak vambangpi nih a kham ko lo.  Khrih Thawngttha he tlik zuamnak ah a tli thluahmah ko. 

Christmas thla cu kan phan.  Vanmi hna nih sakmi "Pathian sunparnak le leicung mi hna sin ah remnak hla" thawng cu kan hna thlam ah a leeng.  Nain, Khrih nih A kan tlanhnak thisen hla cu an sa kho lo.  Khrih thisen in tlanhmi nangmah le keimah sak ding in chiah a si. Khrih nih A nawlngeihnak hmang in khua zakip ah kal in A thawngttha chim ding ah A kan fial (Matthai 28:19).

Thawngttha chim ding in naa tiim ve lai maw?
 
******************************************************************
 
CNF hruaitu hna le Cozah i tonnak, Yangon caah thla cam piak cio hna usih.
 
                CACC General Secretary Rev. Dr. Lal Uk nih CNF upa hna cu Mizoram lei in Kawlram lei ah lut in Yangon lei ah a zuanpi hna. A cheu upa cheukhat Yangon ah direct in an zuang. Tu zarh Ningani le Zarhteni (December 7-8, 2012) ah tonnak an ngei lai. Lai lungrawn khua zung ah salcan kan zuam hrim ti lo. An i tonnak caah le kan ram ah zalawnnak tling a um khawh nak hnga thla cam cio hna usih. A hleice in leikhuaza Chin khrihfabu thlacambu vialte nih thla cam piak cio ding ah Bawi Khrih min kan sawm hna.