CBCUSA 4nk Civui

Chin Evangelical Baptist Church

Indianapolis, Indiana

July 6-8, 2012

Thla khat le a cheu lawng a duh cang. Lamhla caah vanlawng ticket cawk a cu cang. Rianttuanmi caah khuanh hal chung a hau cang. Ka zawh ve lai maw/zawh lo ti bantuk in um ruam hlah u. Zawh ding in i tiim cio u. Nan i ngaichih lai lo. Tu tan civui hi cu Chin Khrihfabu tuanbia dal thar ttial caan a si lai. Hi tuanbia ttialnak ah i tel ve lo ding cu nan duh bal lai lo. Nan sia a rem lai lo. Lung awttawm ding a um lo. I tim ko u.

Civui Tlangtaar: "Ahodah ka fial lai?" Isaiah 6:8

Thawngttha Chimtu ding mi hna:

July 5 Thursday: BM tlun zan: Dr. Hai Vung Lian, Pastor

                                                     Emmanuel Baptist Church, Columbus, Ohio 

July 6 Friday: Khual phak zan: Rev. Dr. Thlaawr Bawihrin, Senior Pastor

                                                   Zophei Christian Church, Indianapolis, Indiana

July 7 Saturday Morning: Rev. Dr. Cung Lian Hup, Pastor

                                          Battle Chin Baptist Church, Battle Creek, Michigan

Chun CBCUSA Nubu Pumhnak: Rev. John Hrangzuala Chinzah

                                                  General Secretary, Lairam Jesus Christ Baptist Church

                                                   Lawngtlai, Mizoram

Zan CBCUSA Mino pumhnak: Dr. Kenneth Van Bik, Pastor

                                                Bay-Area Chin Christian Fellowship, Bay Area, California

July 8 Sunday Zing Pumhnak: Rev. Dr. S. Hre Kio, Senior Pastor

                                                    Indiana Chin Baptist Church, Indianapolis, Indiana

July 8 Sunday Zan Pumhnak: Rev. Dr. C Duh Kam, Senior Pastor

                                                   Chin Baptist Mission Church, Washington, DC
                                                   Executive Minister of Chin Baptist Churches USA

Bible Studies (Saturday & Sunday 8:00 - 9:00 am): Rev. Dr. S. Hre Kio

Theihternak: Zarhpini chun cu Mino hlasaknak in caan hman a si lai.

                      A nuam tuk lai hih!

Kan civui tlangtaar "Ahodah ka fial lai?" hi Pathian nih rem a ti ahcun, Chinmi [Laimi] dihlak nih hi civui thok in a tanglei hla hna hi kan sa tthan kho men. Sa tthan kho ding in leikhuaza Chin zumtu vialte Pathian Thlarau nih lam kan hruai seh! Kan sak pi ve u. Thla kan cam piak ve u.

Fung 1nk:

Tu lio ngaknu leng le val, Kan ram ca zeidah nan tuah cio,

A mui mi ram, Zoh ah nan ngaih a chia lo maw?
Mitthli he, Nitin thlacam kan herh.

             A dawh ve ko ttung, kan Lairam mui te zong hi

             Zei hen atu tiang Jesuh mui a len lo,
             Ho hen kan rinh kan ram caah, Jesuh nih,
             Nangmah theng an herh.

Fung 2nk:

Maw Lairam, na duh i thim cang tuah,

Na Bawipa rian ttuan maw na thim deuh lai?
Hlan pipu rianttuan kha dah nai thim lai?
Nihin in i fiang cang tuah.

           Zungzal ca ding ah kei cu, Hi rian lawng ka ttuan cang lai.

           Kei le kan innchungkhar dihlak nih cun,
           Bawipa rian lawng kan ttuan zungzal cang lai.

CBCUSA Board of Management [BM] Meeting caah ruah chung ding

 

            CBCUSA BT meeting [April 28, 2012] ah Laica tthanchonak le Thawngttha chimnak le Lairam tthanchonak rian ttuan ding in Laitlai khrihfabu dang sawm ding in hnatlaknak kha tuah a si cang.  Zeitindah kan ttuan lai? ti hi ruah kan hau hna.

 

Lairam

            Lairam hi ram fa te a si.  Minung million cheu hrawnhrang te nih hngah mi a si.  1899 kum ah Rev. Arthur Carson le Mrs. Laura Carson nih Hakha khua ah Thawngttha an rak phurh.  Laimi cu khrihfabu ah tampi kan cang.  Zomi Baptist Convention nih khrihfa kan sinak kum 100 a tlin kum 1999 ahhin Laimi dihlak khrihfa ah cang dih ding in Chin For Christ in One Century (CCOC) program kha 1983 in thok a si. 

1)      An thok kum 1983 ah missionary 85 an thlah.  Zumtu thar 2583 an hmuh.

2)     1984 ah missionary 102, zumtu thar 1,502 an hmuh.

3)     1985 ah missionary 177, zumtu thar 2368 an hmuh.

4)     1986 ah missionary 85, zumtu thar 768 an hmuh.

5)     1987 ah missionary 74, zumtu thar dihlak a fiang lo.

6)     1988 ah missionary 85 an thlah hna nain Kawlram a buai tuk kum a si caah mission field in an tlunter hna.

7)      1989 - 90 ah missionary 87 an thlah hna.  Zumtu thar hna cu khrihfabu in an dir hna i missionary 40 cu pastor an ttuanter hna.  Missoionary a thlahtu Chak Lairam zumtu hna tthanghphawtnak caah missionary 36 cu Revival Group in an thlah hna.  Lairam ah Thawngttha chim duhnak a tthang chinchin.  Chak Laimi tampi nih mission rianttuan duhnak thlarau le thinlung an ngei.

8)     1992-93 ah zumtu thar 2,500 nak tam an tlaih chap hna.  Paletwa, Mindat, le Kanpalet mission field in minung 50 kha Bible sianginn an kai ter hna. 

9)     1992 ah Kankaw le Mindat mission field hna cu Association ah ser an si.

10)   1993 in cun Thlang Lairam ah Thawngttha chim kha Kawl Cozah nih a kham.  Mission field minung nih missionary kha an cohlang fawn hna lo.  Chak Laimi caah Thlang Lairam ah Thawngttha chim khawh a si lo caah Paletwa peng in minung 53, Mindat le Kanpalet in anmah minung 115 kha evangelists training an pek hna.  Anmah minung sin ah rian an ttuan ter hna.  Thawngttha an chim.

11)    1995 ah Kanpalet le Paletwa mission field hna cu Association ah ser an si. Zumtu thar cu 337 an hmuh khawh.  A hlan bantuk in zumtu thar an hmu kho tuk ti lo.  Dontu a tam caah.

12)   Zomi Baptist Convention nih hmunrawn Kawlmi le Asho Chins hna sin ah rianttuannak hmun thar an on tthan.  Kawlmi sin ah Thawngttha an chim.

13)   1983 in CCOC rianttuannak in Buddhist 650 hi khrihfa ah an cang.

14)   2000 kum in CCOC rianttuannak cu baan a si.  Kum 12 chung hi  CCOC rianttuannak aa dinh caah Lairam kan tthanchonak zong a dinh pi chihmi a um ve.  Hi rianttuannak aa peh lo mi cu kan sung tuk in ruah cio a si.

Buddhists nih ttuanmi Tlangcung Rianttuannak  (Taungttaan Tatana)

            Kawl cozah nih tha a pek hna bantuk in Buddhist pawl nih tlangcung ah rianttuannak an thok ve.  Thlang Lairam ah khrihfa a si cia mi tampi an lak hna.  Chak le Thlang Lairam ah sifak santlai lo fa le vialte cu an Buddhist sianginn ah a lak in an kai ter hna.  Lai ngakchia tampi cu Buddhist sianginn ah ca an cawng.  Buddhist ah an cang.  Lairam ah Buddhist pura 106 an sak cang tiah an ti.  Siangcachim Laimi cu an tlawm.  Kawl siangcachim kha Lairam sianginn kip ah an tam cang.  A tu lio dirhmun in Laimi cathiam an tam ve ngai nain, cozah rian an hmu kho lo.  Lairam ah Kawl cozah rianttuan hi an karh lengmang lai.  Lairam ah chawleh rian hna an ttuan rih ahcun Thlang Lairam chung Paletwa, Kanpalet le Mindat cu chim hau lo in, Chak Lairam hmanh ah Kawlholh a leeng ngai te lai.  Lairam ri hmanh hi a bi cuahmah.  Miphun lian deuh nih dolh awlte kan si cang.  Khrihfa ram ah ruahmi Lairam fing le tlang kip i Buddhist pura hmuh leengluang ding cu ruah a har ngai ko.  Khrihfami hna nih rian kan ttuan ve lo ahcun kan ti le ram cu humhak khawh asi ve ti lai lo.  Laiholh hmanh hi Kawlholh nih a dolh thlu te lai.  Khrihfa biaknak hmanh hi biaknak dang nih a chilh khawh.  Cu caah Lairam ah Pathian pennak ram a feh i Bawi Khrih ram a kauh khawhnak ding ah rianttuan thok tthan kan hau.

2013 kum in 2nk CCOC rian kan thok lai maw?

            A min hi 2nk CCOC kan ti ko nain, OC hi one century ti a si i kum 113 ah kan luh cang caah min thar cu bunh a hau lai.  Laimi zapi nih kan duhmi min te kan bunh a hau lai.  Hi rianttuannak hi kan ttuan ko lai kan ti ahcun CBCUSA budget chung in aa ttuan kho lai lo.  Kan budget leeng ah khrihfabu cio le pumpak nih Pathian kan zumhnak kha kan rrianttuannak hrampi si a hau lai. 

 

1983 kum i CCOC thok lai ah ZBC nih missionary 100 thlah ding ah kyats ting thum a dih ding in an rak tuak.  ZBC nih a rak ngei lo.  Zumhnak in an thok.  Missionary an thlah hnu ah Thawngttha chim in fund an kawl tikah hman cawk lo in phaisa cu an hmuh.  Bawipa a chambau kho lo.  Nuhmei le pahmei an tho.  Sifak an i tthang.  Caw, vok le ar hna zong nih Thlang Lairam ah Thawngttha chim ah an i thawh.  Khrih zumhnak taktak a um ahcun thli zil a hrangmi hmanh nih Bawipa aw a ken rua tiin theih a si.   Hi rianttuannak hi nihin tiang rak peh kho usihlaw cu Lairam kong ah thil vialte a fiang cikcek cang hnga.  Lairam dihlak hi a tthangcho ngai cang hnga.  Nain, Bawipa Pathian nih 2000 pin lei ah ram rum le ttha ah a phanmi  Chinmi zumtu hna nih ttuan ding ah a rak chiahmi a si ko lai.  Nangmah le keimah rian ah a chiahmi a si.  Kan van a ttha tuk hringhran.  Bawi Khrih ram kauhnak ah kan kut neh aa tel lo ding kha A duh lo caah a si.

CBCUSA BT ah Thawngttha chim ding in leikhuaza Laitlai Chin khrihfabu vialte sawm ding in biakhiahnak kan tuah cang.  Mi sawm aa tiimmi nih kan ttuan ngam ding ttung lo ahcun lampi ah kan taang sual kho.  Hmai lei kal kho ttung lo, hnu ah kir ngam ttung lo in, tartahak in um khawh a si.  Cu caah, a ra lai mi CBCUSA BM meeting [July 6,2012] ah hi kong hi ceih ding in bialu ah kan chiah lai.  Nan khrihfabu cio nih nan ngamh lai maw?  Zeitluk in dah kan ral a tthat khawh lai?  Khrihfabu cheu khat ahcun Thawngttha chimnak thok tthan ding in an hacang an rial cang ti thawng kan theih.  Mi thinlung a suk ngai cang.  Nan khrihfabu cio ah thlacamnak he rak ruat cio ulaw, BM meeting tikah ruahnak cu chuah kho cio ding in, i zuam hna usih.

Hi cakuat hi leikhuaza Laitlai khrihfabu hruaitu hna nih theih ve ding in gcacc@googlegroups.com in kan kuat cio hna. 

Bawi Khrih rian ah,

C Duh Kam, Executive Minister

Chin Baptist Churches USA
Washington, DC

Chin Baptist Churches USA (CBCUSA)
June 06, 2012

Chungtel Khrihfabu hna cu:

1.       Albany Chin Christian Church, Albany, New York

2.      Amarillo Chin Christian Church, Amarillo, Texas

3.      Battle Creek Chin Baptist Church, Battle Creek, Michigan

4.     Bay-area Chin Christian Fellowship, California
5.     Bethel Baptist Church of Texas, Lewisville, Texas

6.      Cactus Chin Christian Church, Cactus, Texas

7.     Calvary Chin Baptist Church, Kentucky-Cincinnati, Ohio

8.      Carson Chin Baptist Church, Milwaukee, Wisconsin

9.     Chin Baptist Church, Dallas, Texas

10.     Chin Baptist Church, Des Moines, Iowa

11.   Chin Baptist Church, Grand Rapids, Michigan

12.     Chin Baptist Church, Marshalltown, Iowa

13.    Chin Baptist Church, Milwaukee, Wisconsin

14.    Chin Baptist Church, Phoenix, Arizona

15.   Chin Baptist Mission Church, Washington, DC

16.    Chin Bethel Church, Laurel, MD

17.   Chin Christian Baptist Church, Omaha, Nebraska

18.    Chin Christian Church, Indianapolis, Indiana

19.   Chin Christian Church of Houston, Houston, Texas

20.   Chin Christian Fellowship, Bowling Green, Kentucky

21.  Chin Evangelical Baptist Church, Dallas, Texas

22.    Chin Evangelical Baptist Church, Indianapolis, Indiana

23.   Chin Evangelical Baptist Church, Jacksonville, Florida

24.   Chin Evangelical Church, Kansas City, Kansas

25.  Colorado Chin Baptist Church, Denver, Colorado

26.   Dallas Chin Baptist Church, Dallas, Texas

27.  Emmanuel Chin Baptist Church, Columbus, Ohio

28.   Emmanuel Chin Baptist Church, Dallas, Texas

29.  First Chin Baptist Church, New Bern, NC

30.  Georgia Chin Baptist Church, Atlanta, Georgia

31.   Greeley Chin Christian Fellowship, Greeley, Corolado

32.    Indiana Chin Baptist Church, Indianapolis, Indiana

33.   Indiana Lautu Evangelical Church, Indianapolis, Indiana

34.   Jacksonville Chin Baptist Church, Jacksonville, Florida

35.   Kansas Chin Baptist Church, Kansas City, Kansas

36.   Lai Baptist Church, Buffalo, New York

37.   Lai Baptist Church, Washington, DC

38.   Lancaster Chin Christian Fellowship, Lancaster, Pennsylvania

39.   Lautu Chin Christian Church, Kansas City, Kansas

40.   Lansing Chin Baptist Church, Lansing, Michigan

41.  Living Christian Church, Indianapolis, IN

42.   Midland Chin Baptist Church, Midland, Texas

43.  Midland Chin Immanuel Church, Midland, Texas

44.   Missouri Lai Baptist Church, Springfield, MO

45.  Missouri Chin Baptist Church, St. Joseph, MO

46.  Monmouth Chin Christian Church, Monmouth, Illinois

47.  Oklahoma Chin Baptist Church, Oklahoma, OK
48. Omaha Chin Christian Church, Omaha, Nebraska

49.  Philadelphia Chin Baptist Church, Philadelphia, Pennsylvania

50.  Rochester Chin Christian Fellowship, Rochester, New York

51.  Salt Lake Chin Christian Church, Salt Lake City, Utah

52.  Springfield Chin Community Church, Springfield, Missouri

53.    St. Joseph Chin Christian Church, St. Joseph, Missouri

54.   Syracuse Chin Christian Church, Syracuse, New York

55.   Texas Chin Baptist Church, Dallas, Texas

56.  Virginia Beach Chin Christian Church, Virginia Beach, Virginia

57.   Zophei Christian Church, Indianapolis, IN

      

       CBCUSA in Sawmnak:


      CBCUSA chungtel zumtu hna nih Lairam ah mission rianttuan ding in leikhuaza Laitlai Chin khrihfabu vialte kha sawm ding in BT meeting April 28, 2012 ah biakhiahnak a tuah cang.  CBCUSA nih ttuantti ding in sawm an duhmi hna cu a thar a si lo.  Cu hlan ah ramdang Laitlai khrihfabu dihlak nih kan ttuan ciami an si ko.  Hmun khat ah thazang chuah tti ding in thlacam sawmnak a si:

1.    Khrih Thawngttha chimnak [Evangelism];  2000 kum in aa din cang mi CCOC rianttuannak kha thok tthan ding.  CCOC rianttuannak hi rak i peh thluahmah sehlaw, Thlang Lairam hi khrihfa an si dih cang hnga.  Laimi sinak hi an fiang khun hnga.  Laimi kan si ti zong an hngalh dih cang hnga.  An hungcho deuh hnga.  Lairam zong hi a kauhning tein kan ngeih khawh hnga.  CCOC rianttuannak kan hngolmi cu kan sung tuk in ruah cio a si.  Cu caah, Laimi zumtu dihlak nih ttha kan ti cio ahcun 2013 kum ahhin cun hmun khat pi ah Lairam ah kan zuang tti hnga.  CACC nih cun 2013 kum in Thlang Lairam ah Thawngttha chimnak mission rian hi biatak chuah tthan ding in biakhiahnak an tuah cang.  CBCUSA he kan chunmang aa khat.  Pathian khuakhannak a si lai.  A dang zong nih nan chim rih lo caah a si men ko lai.  A tu cu chim tti ding in sawm kan in duh hna.

2.   Lai Literature le Fimnak (Lai Literature & Education) tthanchonak:
      CACC GS hlun Rev. Dr. Hla Aung nih Thlang Lairam in Laica chimtu saya an herhnak kong kha a kan thanh cang.  Nan theih cio ttheu lai.  Thawngttha chimnak ah ca le holh hi thiam lo ahcun Bible hi an rel kho lo i khrihfabu le khrihfa sinak zong a tthang kho lo.  Cu caah, mission rian a ttuanmi siangbawi te nih ca a kan tuahpiak, a kan chimhnak a si.  Bible ttha tein rel khawh hi a biapi bik.  Thlang Laimi nih Kawlca le holh cu an thiam nain, Kawl cu khrihfa an tlawm caah Bible bia le hla cu an holh in an ttial tam kho lai lo.  Hrilhfiah te hna zong an ttial kho lai lo.  Kannih Laimi cu khrihfa kan sinak kum 100 leng a kai ve cang.  Laiholh le ca in Bible hrilhfiah cu Lai Khrihfa Cattialtu Phu (LKCP) nih an ttial lio pi a si.  CBCUSA nih kum fa tein phaisa kan bawmh hna.  Thlang Lairam kan miphun hawi hna nih Laica an rel khawh ahcun Lai Bible le Hrilhfiah tiang in an ngeih khawh ve lai.  Laica ttial le rel cu an thiam hrimhrim ding a si.  Hranhram lo in fial phung a si lo nain, an duh ve ahcun chimh khawh ve ding in kan i zuam a hau ve.  Kanpalet ah CACC hruainak in Boarding school cu kan sak cang.  CBCUSA nih Laica cawnnak caah budget cu kan suai ve.  Nain, hmun khat ca lawng ah a si.  Hmun tampi ah an herh cang.  Thawngttha chim pah in kan tuah khawhmi rian awl te a si ko.
 
      A tu ah Rev. Dr. Lal Uk nih CACC GS rian cu April 2012 chuahka in a thok cang.  Duhnak le zuamnak a ngei tukmi mino a si.  Biatak chuah aa tim.  Kan rianttuannak cu hma a kal chin lengmang lai.  Laica tthanchonak a herh kan ti lio ah Laimi nih Education in tthanchonak an ngeih ding kha a biapi tuk.  Lairam ah cachimtu saya cu Kawl lawng te an si cang.  Laimi cathiam vialte nih Lairam kan hngah lo caah sianginn vialte hi Kawl ta ah a cang lai ti phan a um ngai.  Lairam in mifim cathiam tampi an chuahnak ding tu ah ttan kan hau hna.  A tu ahcun Bible sianginn lawng ah scholarship program kan tuah khawh.  High School le University a kaimi ca zong ah tuah kan herh rih.  Chin Christian College hi Chin Christian University tiang a si khawh ding in kan i zuam a hau.  Cu ti cun, Lairam nih cathiam tampi a ngeih khawh lai.


      A tu bantuk in hmun khat ah rian kan ttuan tti ahcun Chin Christian College, Hakha le Union Theological College, Matupi zong hi ttha deuh ngai in kan bawmh khawh hna lai.  Biaknak le vawlei fimthiamnak ngei mi hruaitu ttha tampi an chuak kho te lai. 

3.   Harnak ah i bawmhnak le hunchonak rian ttuan ding (relief and development):
      Cu hlan ah Laimi nih mei le ti le thlichia in harnak kan ton ah siseh, mangttaam in harnak kan ton tikah siseh, leikhuaza Laitlai Chin khrihfabu hna nih bawmhnak cu kan tuah tawn hna.  Kachin ralzaam hna bawmhnak caah ting thong khat reng lo tiang in bawmhnak kan tuah khawh.  Hi vialte hi hmailei chan caah rianttuannak ttha a si khawh nak ding ah hmun khat ah rianttuan cu kan herh hna.  A pikpak in rianttuannak nih kan tthat ding tluk in kan ttha kho lo.  Tawlrelnak (management) kha miphun huap in aa tuah lo tikah, miphun tthanchonak thlarau hi a chuahpi kho taktak lo. 
     
      A tu ahcun Burma ram cu zalonnak lam i ong ding bantuk a lawh caah, ramdang non profit organization pawl nih luh i rianttuan ding in an i tiim ngai cang.  World Relief pawl hna cu hawi nih Lairam an tlawnpi cang hna.  A tu hi an tlawnpi rih hna lai.  Kannih cu mi hnufual lengmang ah kan cang ko rih.  Kan si peng awk a si ti lo.  Pathian nih a kan timhning hi Laimi dihlak caah leikhuaza Laitlai Chin khrihfabu hna hi rianttuan ding in a kan fial ti cu a fiang ko cang.  Nihin ah a pikpak in relief & development kan tuah bantuk in cun ramdang mi nih rianttuanpi an kan duh lai lo.  A kan zum lai lo.  A fekfuanmi bu hi ngeih kan herh.  Hi zong ahhin Hakha, Chin State theng ah hmunhma a bunhmi rianttuannak bu cu ngeih kan herh.  Relief & Development zong ttuan kho ding tiang in leikhuaza Laitlai Chin khrihfabu hna nih bu pakhat ser in Hakha khua ah office ngeih kan hau.  CACC maw kan rinh hna lai maw? A thar tein dah kan ser lai? ti tiang in ramkip Laitlai Chin khrihfabu hruaitu hna nih kan ruah tti a hau ding a si hnga. Lairam tlawn ah a kal ding mi pa zong va leeng ve hrimhrim hna tiah bia kan cah.  Hawi nih sawmmi a si caah an lenpi te hnga maw, a fiang rih lo. Mi hnufual rumro ah i thlai peng ding cu ruah a rem lo ngai.  Hmai ah kan chuah khawh ve nak ding in rianttuan tti cu kan herh takta


     
      Hi rianttuannak hi kan tlai sual lo ding ah rianrang in tuah a hau cang. Ramdang nih Lairam an cuanh ngai cang. Lutheran World Federation (LWF) cu Yangon ah zunghmun an ngei cang. Church World Service zong nih Burma ram cu an cuanh cang. US cozah nih USAID hi Yangon ah a chiah lai. World Relief office cu kan umnak Baltimore, Maryland ah a si caah Mizoram a tlawngmi team pawl he kan leeng hna. CACC rianttuannak le a ram chung ah rianttuanmi Christian Association for Rural Development (CARD) le Chin Relief and Development Program (CRDP) kong kha kan chimh hna. An website le contact numbers zong kan pek hna. Mizoram team Mr. Matthew Wilch nih LWF, Yangon zong ca a kuat hna.  

      Mizoram ah Chin ralzaam hna a tlawngmi hna kha CBCUSA nih an umkalnak le cauk chuahnak caah kan bawmh hna.  An hmuhmi thil nih an lung a suk ngaingai hna.  US hruaitu tampi sin ah an chim.  Thawngthanh an i zuam.  Hi thil nih Lairam chung khuasa hna sining le bawmhnak an herhning kha a chuahpi tthan.  Lairam khuasa 73% cu sifah taktak in khua an sa i, Chin State cu Burma chung states & divisions 14 laksah sifakbik a si tiah chim chih a si.  A ho ruang hmanh ah si lo in, cozah a tthat lonak theipar a si tiin langhter a si.  Lairam hi Laimi nih hngah tlakmi hmunhma a si lo ahcun ralzaam nih an fuh kho lai lo ti a fian chih.  Cu caah Lairam chung lei ah thinlung an pek chih.  Mr. Matthew Wilch cu LWF ah rian a ttuan lio in Guam ah a ummi Chin miphun bawmhnak ah a ttang.  A tu ah ramchung Chinmi kan kong cu a theih chin.   Laimi caah fak ngai in a ttang.  Mizoram a tlawngmi team hna caah thla cam piak cio hna usih. 

     
      Lairam hi pehtlaihnak a tthat lo ruangah, meng hra a hlat mi khuami hmanh hi nun chung ah i hmu lo in vanram ah aa tong ding kan tam tuk.  Nihin ram tthancho kan umnak ah lam le pehtlaihnak a tthat caah khuapi pakhat chung kan i len tikah meng 60 hlat zong ah mawtor in kan i leeng kho ko.  Pathian kan thangtthat tti kho hna.  Falam le Hakha hna cu meng 42 lawng a hla.  Lam kaupi ser in khua khat ah ser ding a si ko.  Paletwa - Matupi - Hakha lam hna hi ttha tein aa siam tikah cun kan holh zong kan i thiam piak dih lai.  A tu bantuk dirhmun cu kan si peng lai lo.  A tu ahcun dawt ding hmanh kan hngal kho lo.  Pehtlaihnak a tthat tikah cun awl tein kan i hmu lai.  Kan thiambik mi holh zong kan hmang tti kho dih te ko lai.  Fing le tlang le ram hna hi sersiam kan hau hmasa.  Relief & Development cu biapi ngai in ttuan kan herh.


      A cunglei thil sining vialte hi cuan in CBCUSA nih Lairam ah rianttuan tti ding in sawm kan in duhnak hna cu a si.  Abik in, Pathian ram  kauhnak caah  Evangelism & Mission rianttuan ding ah kan in sawm duhmi hna a si.  Thawngttha nih cun relief le development cu a hrin chih tawnmi a si.  Pathian nih a kan bawmh lai.  Kan miphun caah lawmhnak theipar ttha kan hmu te ko lai.

      Bawi Khrih rian thiang ah,

C Duh Kam
Executive Minister
Chin Baptist Church USA

CBCUSA 4nk Civui Sawmnak

Dawtmi mipun hawi hna: 

Pathian nih kan miphun zong a phunphun in thluachuah a kan pek. Nifatin pumsa le thlarau in kan nunnak a tluanter. USA ramchung zumtu hna zong Amah lamhruainak thawng in, tthawnnak kan hmu. Kan miphun nih thlarau thinlung in a hlam bak in a hlam mi Chinmi vialte Pathian thangtthat ttinak CBCUSA 4nk Civuipi zong dong ding in Chin Evangelical Baptist Church (CEBC), Indianapolis, IN zumtu hna le Indiana khuasa Chin zumtu vialte cu an i timtuah cuahmah. Civui tlamtlinnak ding in a phunphun in khua an khang. Civui dongtu CEBC zumtu hna cu an biakinn an sa pah. Civuipi tuahnak caah rian an i phaw. An cawl cuahmah lio pi a si. 

CBCUSA 4nk Civui

Civui dongtu: Chin Evangelical Baptist Church (CEBC), Indianapolis, Indiana

Civui ni: July 6 (Friday) zan in July 8 (Sunday) tiang.

BM meeting tuah ni: July 6 (Friday) zapi phak ni ah tuah a si lai.

Indianapolis, IN: USA ram chung Chinmi (Laimi) kan khuapi a si. Minung 6000 reng lo an um. Lairam he tahchun ahcun Thantlang khuanak in a lian deuh. USA ram chung ah khua laili bik a si. Nichuak lei in, New York le Washington, DC le Attlanta, Georgia le Jacksonville, Florida lei in siseh, thlanglei in Dallas, Texas le Colorado lei in siseh, nitlak lei in Utah le Arizona le Kansas in siseh, chaklei Aiwa, Wisconsin le Illonios le Michigan hna in siseh, mah le mawtor cio i khalh in civui kan zawh kho lai.

Vanlawng in zuang lo in, mah mawtor tein civui zawh khawh hi rampi USA bantuk ahcun a har ngai. Nain, Pathian nih miphun ning piin Bawipa thangtthat a duhmi Chin miphun cu hi bantuk in si kho ding ah a kan timhtuahning a si. Bawipa nih kan khuasak tuntuknak le tthutdirning cu a kan khanpiak mi a si. Civuipi tuah in Ka thangtthat hna seh ti a kan duhnak hi a fiang ngai.

Civui a zawh ding hi tthal sianginn khar ka te, kan fa le pawl an zalon lio te a si lai caah ngapum lom tete bang Lai ngaknu tleirawl le tlangval no tete mui a tam lai. CBCUSA mino dihlak komh in "Halleluia Chorus" sak thawng theih lai cu ngaih a um taktak ko. Tlangval upa deuh pawl mawtor mawngtu le an nau le kilkawitu tlangval hrokual taktak zong Bawi Khrih caah tiin thahrum he Pathian thangtthat ding aa timmi an tam tuk fawn lai. Chin zumtu 5000 cuang nih Pathian kan thangtthat tti kho lai tiah kan zumh. Lairam Isua Khrihta Baptist Kohhran (Lairam Jesus Christ Baptist Church), Lawngtlai, Mizoram le Baptist Churches of Mizoram, Lunglei in hruaitu upa zong ra ding in an i tiim hna. LJCBC General Secretary Rev. C. Hrangzuala cu USA visa a hmung cang. Ram dang khuasa Chin zumtu hna zong nih vacation kal can ah rak kan telpi ve u. Kan nu le cheukhat pawl nih kan civui tuahnak inn (minung 4500 tlum) khoimaw ka in a kan lampiak pah lai. Kan Bawipa Jesuh Khrih an thah lai caan Jerusalem Lanhtaak Puai bantuk a si lai. Minung kan tam tuk lai. Indianapolis khual riahnak buuk vialte cu Chinmi nih kan hngah dih lai. A nuam lai hih! Jerusalem ah Hosana ti cu dai hmanh sehlaw, Indianapolis Lai khuapi ah Hosana ti cu a dai kho lai lo. Bawipa sunparnak a lang hrimhrim lai. To God be the glory!

CBCUSA khrihfabu:

Chungtel khrihfabu dihlak 55 kan si cang. Hi rianttuannak ah aa tel ding khrihfabu a um len rih. Ngakchia semmawng rual tel in member 14,000 hrawng kan si cang. Lairam he tahchun ahcun Chin khualipi Hakha khua tia khi kan si. Hi khrihfabu vialte nih Bawipa sin in kan hmuhmi cheuhra cheukhat dihlak ih 5% in Komh Mission rian kan ttuan hna. Mei kangh, thliachia tuar le ttaamnak ton tikah Chinmi dihlak caah rian kan ttuan tti hna. Ramdang ah puicimh vanchiat bechiatnak an ton tikah bawmhnak kan tuah tti hna. Bawipa nih lungkhat tein A rianttuan ding ah a kan fial ti hi kan zumh lawng si lo in, a tem bak in kan tem khawh cang. CBCUSA cu leikhuaza Chinmi zumtu hawidawt hna he Lairam ah va bang zuang tti i Khrih ram kauhnak caah rianttuan ding cu a hiar bak in a hiar cang. Ni le caan hi a luan kho ti hi a hngalh ttung, caan ttha ngeih lio ah Bawipa lohma ah dir ding in ready a si cang. Thla kan campiak cio u.

Bawi Khrih rian ah,

C Duh Kam

Executive Minister

Chin Baptist Churches USA
___________________________________

CBCUSA 9nk BT Meeting (April 28-29, 2012)

Battle Creek Chin Baptist Church, Michigan nih nuam tak in a kan tuahpiak.  An biakinn thar luhnak kan tuah i a nuam taktak.

[tang] BT meeting kaimi CBCUSA upa

BCBC Biakinn kam ah

[tang] Batle Creek Chin Baptist Church biakinn thar luhnak