CAAN LE CHAN KHA ZEIHMANH LO IN KAN LIAM TER SUAL AHCUN

Kan tuanbia nih a kan mawhchiat lai.

Tuanbia nih mawhchiat kan timi cu hmailei chan Lai hawi nih

a kan mawhchiat lai tinak a si.  Chan nih thil ttha tuah ding in a kan onh lio ah

rianttuan hngapmap hi a biapi cem.  Ngaihchih ding a um lo.

Nihin Laimi kan chan zoh tikah khuaruahhar thil a tam.  Vawlei cung ram ttha bikbik ah

a kan thlah chan hi tuak le ruah lo awk a ttha lo.  Pathian nih chan ngei lo in a kan thlah lai lo. Ram dang ah Laimi tlau ding cun a kan thlah siang lai lo.  Kan miphun sin ah maw,
mi ramdang hna sinah maw, A ram kauhnak caah rianttuan kho ding tu in
a kan thlah a si deuh lai.  Laitlai Chin khrihfabu hna hi lung aa rual ahcun
Laimi dihlak caah rianttuan kho ding in thazang a kan pek.

Kan caan hman thiam i zuam hna usih.

CBCUSA BT Meeting, Milwaukee, Wisconsin A Kaimi hna

Minung kan nunnak a thlumtertu cu Jesuh Khrih a si. Khrih vel le dawtnak nih 

kan ttemttawn hlah sehlaw cu, Khrihfabu hna hi an dir kho hnga lo.  Dawtnak bia 

chuak lo sual sehlaw cu, kan nunnak cu thingro bang a caar ko hnga!  Bawipa Khrih caah a dir i rianttuantu nannih cu Pathian Tufa nunnak cauk chung ah min ttialmi hna caah 

rianttuantu Khrih sal ttha nan si! Khrih caah kan nunnak hi si ko seh!

"Pathian zangfahnak hmuh caan cu a tu caan hi a si i

khamhnak hmuh ni cu nihin ni hi a si!"

[II Korin 6:2]

[tang] Zophei Christian Church biakinn hmun ah CBCUSA pastors pawl

August 2011 ah ZCC nih CBCUSA pastors hna hrimhtthannak program a kan tuahpiak

lio ah an biakinn hmun ah rawl a kan dangh. Inn le hmun ttha 10 acres an ngei.

 

 

Paletwa Peng Biakinn an si.  Biakinn hi man fak deuhmi sak piak khawh lo hmanh ah ngaidi hi canphio si kho sehlaw a vam hna cu mau hi ttha tein tah ahcun aa dawh ngai ko lai.  Cu bantuk cu $500 nih a sak khawh lai.  A zuam kho mi chungkhar zong Laimi chung in an um ve te lai.

Global Chin Association for Christian Communication (GCACC)

          Vawlei khuaza Laitlai Chin churches hna hi Thlang Lairam ah Laica cawnpiaknak (Lai Literature) le Thawngttha chimnak (evangleism) in rianttuan tti kan herhnak kong cu GCACC chunmang kan ttialmi ah biapi bik in kan langhter cang.  A tanglei ah GCACC tiin kan ttialmi rel ding tampi a um.  Bible rel khawh lo ahcun Thawngttha chim hi mual a ngei kho lo.  Cu caah Thlang Lairam ah Laica cawnpiaknak le Thawngttha chim a herhnak hi biapi bik in GCACC chunmang nih a dirpi mi cu a si.    Laica le Laiholh ram cu a kau cia cang.  Matupi peng nih an thiam cia.  Hi bantuk in Laica hi an rel khawh cio ahcun kan Chin miphun nih hlawknak tampi a hmuh lai. Chin miphun nih holh pakhat hi kan i hrawm kho te lai.  Laiholh in chimmi Pathian Thawngttha, Lai Bible le Bible Hrilhfiah hna zong mi tampi nih kan rel khawh ahcun Lairam dihlak ah Khrih ram cu a kau chinchin lai.

        GCACC chunmang cu Pathian nih a ttha in a ruah a si ko lai tiin Dr. Hla Aung, GS of CACC, Hakha cakuat rel tikah a lang.  Dr. Hla Aung cakuat [January 9, 2012] cu atanghi a si:

Dear Ramleng um u le nau hna,

Nan dihlak Bawi Krih min in CACC nih nan kut kan in tlaih hna. 2012 kum thar zong Bawipa lam hruainak thawng in dam le lawm in nan phan cio lai tiah zumhnak kan ngei. Atu ah Thlanglei Laitlang ah CACC nih Laica cawnnak program kong thawngthanhnak ka rak in tuah hna.

Atu cozah thar a thlen hnu ah Chin State cozah i Social Affairs Minister pa kan va ton. A cozah sianginn ah Laica cawnnak kongkau he pehtlai in bia halnak le bia ruahnak kan ngei. Minister pa nih a kan timi cu nanmah biaknak lei nih tangka nan ngeih ahcun a cozah sianginn zong ah Laica cawnnak cu tuah khawh a si ko tiah a ti. Amahbelte, ca mipuai awng le sungh ca he a pehtlai lai lo a ti. Cucu thawngttha ngaingai ah kan ruah. Cu hnu ah Paletwa, Kanpetlet le Mindat Association ah a ttuan liomi hna General Secretary pawl kha anmah le Association chung ah a ummi khua te pawl ah Laica cawn duhmi khua um hna seh law zeitin dah nan ruah hnga tiah an ruahnak kan hal hna. A dihlak in CACC lei nih a chimtu ding saya thlahlawh pekpiak ding in a cozah sianginn ah Laica cawn ding a si ah cun kan i lawm tuk ko hnga tiah an kan ti.

Cucaah ramleng um u le nau hna nan sin ah bawmh hal kan in duh ko hnga. Thlanglei Laitlang ah hin tukum 2012 June thla in a thawk ding sianginn cacawn kum ah Paletwa, Mindat le Kanpetlet peng i a coazah sianginn ah Laica cawnnak hi ngei kho usih law tiah kan duh. A tlawm bik peng pengkhat ah khua 10 ah Laica cawnnak ngei kho usih law tiah kan duh. Asinain tangka kan ngei lo. Cucaah ramleng um nanmah Lai tlai kan unau nih ram le miphun dawtnak in pumpak in a si ah khrihfabu in a si ah hi Thlanglei Laitlang chung i a cozah sianginn hna ah Laica cawnnak ding hi rak kan bawm uh law tiah nawlpet kan in duh ko hna. Sianginn pakhat ah cachimtu pakhat thlahlawh thla 10 chung pekpiak ding a si hnga. A kan bawm kho tu nan um a si ahcun CACC ah thawng rak kan thanh uh law CACC Triennial Meeting (March 28-April 2) ah khoi ka peng khoi ka khua ah Laica cawnnak cu tuah siseh ti kha biachahnak ngei in 2012 June thla sianginn hun cun thawk colh a si hnga.   

Thlahlawh hi CACC Triennial ah ceih kan hmasa a hau lai tiah ka ruah. Buakhlak in thlakhat ah Ks. 75,000 in 100,000 (plus an tlun kalnak T.A.) kar cu a si te hnga lo maw. Cun a cawnnak khua hi anmah nih an duh lawnglawng ah cawnter a si hnga. A duh lo mi khua ah cun hramhram in cawnter ti bantuk a si lai lo.

A bawm duhtu poah CACC kan mail ah thawngthanhnak rak kan tuahpiak uh law ti zong in thawngthanh chih kan in duh hna. Tampi kan i lawm.

Nan dihlak cung ah kum thar daihnak le thluachuahnak tlung ko seh,
 

Hla Aung
CACC

 

         Pathian nih Khrih Thawngttha karhnak caah Laica cawn khawh nak lam a on cang.  Hi bantuk in aa on hlan ah Kanpalet khua ah kyat ting 50 dih in, siangngakchia umnak inn hna sa in Laica cawnnak cu CBCUSA nih CACC he rianttuan kan thoknak kha a si.  A tu bantuk in, lam a on cang caah saya te hlawh le cauk le pencial te hna ca lawng ah phaisa a dih cang lai.  Phaisa tampi dih in inn sak hna cu a hau tuk men ti lai lo.  Nain, biakinn maw, mibu meeting tuahnak ding inn (community center) hna maw, sak kan hau lai.  Laica cawnnak caah leikhuaza Laitlai Chin churches dihlak nih saya pakhat cio tal cu thlah kho ding in i zuam hna usih.

        Thawngttha Chimnak [Evangelism] cu kan philh lo ding a si fawn.  Khrihfabu caah a biapibik a si.  Thlarau in kan tthannak ding caah vitimen tthabik a si. Hi kong ah kan dihlak thazaang kan hlum a herhnak a si.  Thlang Lairam ah Kanpalet le Mindat le Paletwa peng chung ah Khrih Thawngttha he kan luh a hau.  Kaladan tipi cu India cozah nih tilawng lian kalnak caah a ser cuahmah caah Paletwa khua cu Nitlak Lairam (Mizoram) le Nichuah/Chak Lairam hna nih pehtlaihnak hmun ah hman khawh a si lai.  Paletwa khua ahhin Thlang Lairam mission center inn dawh ngaimi kan ngeih khawh ahcun Thlang Lairam ah mission rianttuannak kha hi hmun in tawlrel khawh a si lai.  Ramdang in Laitlai Chin churches pawl zong nih kan va leeng kho lai.  Midang Mirang churches pawl hna zong mission rianttuan tti ding in kan sawm hna lai i kan lenpi hna lai.  Kan rianttuanmi kan hmuh khawh cio tik ahcun kan tha a nuam lai.  Thazang tampi kan chuah khawh chin lengmang lai.  Mission rian a ttuanmi Chin churches dihlak nih thazang kan ngei lai.  Cu ti cun, Thlang Lairam cu Bawipa lennak ram ah a cang kho lai.  Hi rianttuan ding ah Khrih nih a kan sawm.

         Hi bantuk in mission rianttuannak caah GCACC zungpi cu Hakha, Chin State ah a um lai.  General Secretary, Hakha nih ramkip rianttuannak buu vialte hi a kan tthithruai lai. Thawng a kan thanh lai.  A tu CACC cu a ttuan tawnmi rian a ttuan ko lai.  Ram dang khrihfabu vialte hi rianttuannak thazaang a chuahtu kan si lai.  Ram kip upa vialte kha kum fa tein meeting kan tuah lai.  Ram a on lai caah GCACC zunghmun, Hakha ah meeting kan tuah kho lai.  A caan ah Thailand le Malaysia le ramdang ram khatkhat ah meeting kan tuah kho lai.  Hakha khuapi ah meeting kan tuah pah in crusade hna kan tuah pah lai.  Chak Laimi vialte hi mission thlarau he an i tthang ve lai i Lairam cu Thlarau khuaitizu le cawhnuk luannak ram taktak ah Khrih nih a ser lai.  Meithal in phoi cia mi vailamtah hna cu an bir tthan lai.  Lairam cu Bawipa Ram a si tthan lai.  Hi Lairam in miphun dang sin ah Khrih Thawngttha kan aupi khawh te lai.   Thla cam hna usih.

Thlang Laimi kan miphun hawi hna he "Mangbik Sangcem cu" timi hla sa in laam lai cu ngaih a um taktak ko.  [tang] hi Macedonia Mission secretary Saya Lian Ceu Bik nih Thlang Laimi a tlawn hna lio ah an rak laam pi mi hmanthlak a si.  Khrih dawtnak hla sa in laam cu an duh tuk ve ko.

          Burma ram ah zalawnnak a um ahcun ramdang Lai mino pawl hmanh hi Gospel Concert tuahpi ding in kan tlawn khawh caan a um te lai.  A tu hi rianttuan thok kho ding in Bawipa Pathian nih lam a kan sial piak lio a si.  I tiim hna usih.  Thazaang hlum usih.  Khrih Thawngttha nih kanmah lak ah dawtnak le rualremnal a tlun ter lai.

[cung] Thlang Lairam biakinn tete an si.  Zeitindah sak piak lo cun kan um khawh lai!

Nangmah le keimah rian a si.  $1000 nih cun biakinn pakhat cu a sak khawh lai.

"Ahodah ka fial lai? Whom shall I send?" [Isaih 6:8]

Bawi Khrih rian ah,

C Duh Kam

Executive Minister

Chin Baptist Churches USA

Washington, DC

      

CBCUSA Prokrem Sunglawi hna

[1] CBCUSA BT Meeting

Hmun: Battle Creek Chin Baptist Church, Battle Creek, Michigan

Ni: April 22-23, 2012 (Saturday & Sunday)

BT palai hna phak ni: April 21, 012 (Ningani)

Gospel Crusade: Zan le Zarhpini ah pumhnak a um lai.

[2] CBCUSA 4NK Civui

Hmun: Chin Evangelical Baptist Church, Indianapolis, IN

Ni: July 6-8, 2012

Zapi phak ni: July 6, 2012 Ningani

BM meeting ni: July 6, 2012 Ningani

BM palai hna phak ni: July 5, 2012 Nilini

Theihternak:  ABCUSA in Burmese Refugee Task Force Komiti nih DVD tawi tuah an timh caah BT meeting le CBCUSA civui hi recording an tuah te lai.

CBCUSA EM

Washington, DC

 Vancouver Chin Baptist Church ah BT meeting kaimi (October 2009)

Kan nunnak cu tuanbia ah an cang tawn.  Bawi Khrih caah 

kan i peknak nun zong Khrihfabu tuanbia ah a cang ve.

Chin Baptist Churches USA Thawngthanh

Dawtmi miphun hawi vialte hna:

         2012 chung ah kan luh caangka in kan ram le miphun caah nunnak le thisen thaap in rianttuantu Lai pasal ttha hna nih kan miphun tuanbia thar a kan ttialpiakmi kong kan theih tikah kan i lawm hringhran hna. Chin khrihfabu hna nih thlacamnak kan ngeihpiak hna bantuk in,  hmailei zong ah thla cam piak zungzal hna usih.  Pathian nih lunun ngandamnak phaw ko hna seh!  
         

         Kan ram le miphun hi zalawnnak taktak kan hmuh khawh nak ding ah Pathian lamhruainak le bawmhnak kan herh.  Kan Chin miphun lakah dawtnak a tthan khawh nak ding ah thlacamnak kan herh tuk fawn.  Miphun dang hna he rianttuan ttinak le biaceih khuakhan ttinak hrimhrim ah hin Chin miphun lungrualnak hi hmual a ngei bik zungzal ko lai.  Khrihfa zumtu kan si bantuk in, Chinmi lak ah kan i dannak hna zong hi Bawipa sunparnak caah hmang thiam hna usihlaw kan miphun lak ah dawtnak le remnak a leen khawh nak hnga, leikhuaza Chin khrihfabu vialte nih Bawipa sin ah hal hna usih.  Nihin kan thanuamnak hi lawmhnak taktak ah a can khawh nak hnga, Pathian sin ah thla cam zungzal hna usih.

       A ra lai mi July 6-8, 2012 cu Chin Evangelical Baptist Church, Indianapolis, IN ah Chin Baptist Churches USA 4nk Civui cu tuah a si lai.  Tuahnak ding hmun tlam a tling dih cang.  Indianapolis cu North America ah Chin khuapi a si.  Hmun laili bik a si.  Minung thong ruk leeng an um.  USA le Canada ram chung Lai khua hmun kip in mah mawtor in rat khawh ding a si caah khual a tlung ding hi kan tam ngai lai tiah kan ruah.  CBCUSA ah khrihfabu 45 kan um cang.  CBCUSA Youth Department hruaitu hna zong nih biatak tein timhlamhnak an ngei. Hlaremh le hlasakthiam tampi kan ngei hna.  Caan tin a har lai caah  state/region in hlaremh sak zong a hau men lai tiin ruah a si.    Ngaknu le tlangval 500 tluk nih Halleluai Chorus an kan sak piak khawh men te lai.  USA Independence zungkhar lio a si lai caah civui zawh ding hi a thawng in kan si kho lai.  Pathian a thangtthat tti kho ding minung hi kan tam ngaingai lai.  Hi CBCUSA ah Lawngtlai, Mizoram in Lairam Jesus Christ Baptist Church nih a voikhatnak ah palai cheu khat an rak thlah ve hna lai.  Lei khuaza khrihfabu in hruaitu upa tal nih kan telpi cio ulaw tha a nuam tuk hnga.  Chin khrihfabu tuanbia ah dal thar a si ve te lai.

            American Baptist Churches USA in Burmese Refugee Task Force komiti nih Burma ram in a ra mi hna kan tuanbia hi DVD tawi nonte in tuah kan timh i hi CBCUSA civui hi record tuah ding in kan timh fawn.  A bik in, Chin mino zumtu hna cawlcanghnak zawn ko hi telh ttha bik a si lai tiin kan ruah.  Khrih a kaltaak mi American rammi mino hna hi kan Chin mino cawlcanghnak nih a tthangh phawt khawh deuh nak ding kha kan saduhthahnak a si chih.  Burma ram in a ra mi zumtu hna nih American Baptist Churches le biaknak bu dangdang hna hi tthangh phawt ding ah Pathian nih a kan thlah tiin ruah a si cio.  Khrih lamkaltu kan si hna. A bik in, Chin mino vialte, Khrih caah dir u.  Bawipa ram kauhnak caah i pumpe hna u.  Bawipa Khrih nih an herh hna.

Bawi Khrih rian ah,

C Duh Kam
Executive Minister
Chin Baptist Churches USA