CBCUSA Thawngthanhnak
1) San Juan, Puerto Rico ah tuahmi American Baptist Churches USA civui cu nizan in a dih ruangmang. Puerto Rico hi USA nih a ngeihmi Central America ah tikulh pahat a si. Anmah nih an chimning in million pali reng lo kan um e an ti. Mi nih tlawn an duhmi tikulh a si. USA citizen an si nain, state dirhmun an phak lo caah President thimnak ah me an pe kho lo.
2) Biaknak lei in, Baptist church 220 a ngeimi American Baptist Covention pakhat a si. ABCUSA ah bochan tlak ngaimi convention a si. ABCUSA civui hi 1981 an rak tuah bal cang. Kum 30 hnu ah an tuah tthan. Civui a kan tuahpi ning an thiam tuk. Music a phunphun he nuam tuk in Pathian kan thangtthat kho. Anmah duh hoih in hla hi a aw a phunphun in an tuah. Tutan civui hlasak cu a nuam tuk an ti cio. Phungchimtu an thiam taktak fawn.
3) ABCUSA civui zawhmi Laimi pasarih kan si. Kan i nuam ngai ve. Chin khrhfabu kip nih kan pastor cio tal thlah kho tawn usihlaw a ttha ngai hnga. Civui kan ti tikah cawn ding mi tampi a um. Hmai lei ahcun i tel khawh cio kan i zuam hna lai. Kan khrihfabu cio caah a hlawk hrimhrim lai.
4) Zarhpini cu San Juan khua Local church (mah duhnak) cio ah kan i pum hna. Pastor Ronald Charles le kei cu First Baptist Church of Puerto Rico ah kan i pum. Member 300 hrawng an si. An biakinn a fa te i voihnih in pumhnak an tuah. Praise and Worship an thiam, a nuam taktak. Pumhnak hi an nunter bak ko. A satu hna cu nungak le tlangval lawng si lo in, nutung le patung no he si dawh an si. Hlaremhbu cu nutung le patung ( tar si lo in) an si. An thiam taktak. Chin khrihfabu pawl nih tthan ding mi tamtuk kan ngei ti kaa fiang ngai. Laimi cu nupi tthit le vangeih cang ka in, hlaremh ti lo timi nunzia kan ngei. Pathian cu thih tiang kan thangtthat ding a si caah dinh caan ngeih kan hau lo. Nutung le patung zong nih hlaremh nak ah i tel ding kan si ve. Kan fa le mino lawng rinh ding an si lo.
5) Nihin ah civui zawhmi cu an tlung dih. Kei tu cu ABCUSA General Baord meeting ka kai tthan lai i Nilini ah ka tlung ve te lai. Civui kong cu ABCUSA maivan "abc-usa.org" ah hmanthlak he hmuh/theih khawh a si.
Bawi Khrih rian ah,
C Duh Kam
Executive Minister
CBCUSA
Camp: Sheraton #652, San Juan, Puerto Rico
