Bawipa Thangthat

Monday, January 31, 2011

CBCUSA BT meeting le Crusade (September 4-6, 2009)
Vancouver Chin Baptist Church
Praise and Worship Bawipa Thangtthatnak
CBCUSA BT upa hna
Hlasakthiam Pi Ngun Bu, Vancouver


Vancouver hi vawlei cung khua dawh pakhat a si. Hi lio caan hi khua caan a kih lei a panh i aa dawh, a nuamh bik lio a si. USA in palai hna cu Seattle, WA khua ah vanlawng airport ah kan i tong hna. Mawtor lian in hmun khat ah Vancouver, Canada ah kan va lut. VCBC zumtu hna nih an khua ah kan va fuh hna i meeting kan tuah tikah an i lawm ve. An kan dawt. BT meeting kan tuah pah in Thawngttha chimnak crusade kan ngeih chih fawn. Zan fa tein Thawngttha chimnak kan ngei. Ram dang khuasa kan si hna caah kan i dawtning le tlaihchannak hmual aa dang. Ttian lai zan cu biacah chimnak kan ngei. Dang lengmang in kan ni pah. Kan i nuam taktak. Tthen siang lo ngai in, zan pumhnak a dih hnu ah Seattle, WA ah kan kir tthan. Vanlawng in kanmah le kan khua cio ah kan tlung cio hna. Pathian nih kan miphun cungah lam a kan hruaining hi! Ka ruah tikah ka lung nih a phan lo!

Sunday, January 30, 2011

Dawtmi hna:

Cattial lo in saupi ka um. A rak lengmi kan hmuh hna tikah ka lung a ttha lo ngai. Pathian bia theihnak caah a tthathnem sual ah hi hnu ahcun CBCUSA thawngthanhnak tete maw, sermon tawi tete maw, ka ttial pah cang lai. Rak leeng pah tawn u. Mit kan tonh hna lai. Bia kan i ruah hna lai.

CBCUSA kong hna kan i ruah pah hna lai. Laimi hi Kawlram chung miphun lakah Bawipa ram kauhnak caah Pathian nih a kan thim i a kan hman lio a si. Vawlei cung biaknak lianlian umnak ram Bangladesh (Muslim ram), India (Hindu ram), China (Communist ram) le Kawlram (Buddhist ram) nih a kulhmi ram fate Lairam cu Khrihfa ram ah a cang. Hi hi vawlei cungah a si kho lo mi a si. Hi kong van ruah hmanh ah hin khuaruahhar cu a si colh. Khrihfa si hi a awl lo. Thawngtha chim a ngai duh mi si hi a awl lo. Mitpurh le hnarcoih bia ah biakinn ah kal khawh a si lo. Kannih cu duhnak ngei tein biakinn ah kan i khawm. Thlarau rianttuannak a si. Zumtu fel le ttha in aa ruat lem lo mi ca zong ah biakinn na phanh khawh kha sawmtu Thlarau rianttuannak ruang ah a si. A chung ah thuk pi in a pil kho mi na si. Na duh ahcun.

Khrih dawtnak le vel hi a lak tein na co khawh. Naa lak ding ah tlaitawn te ah a um. Kan tuahmi a si lo. Pathian Thlarau laksawng a si. Laksawng cu mi nih dawtnak in a kan pek. Kan i lak lawng ah kan ngeih khawh. Khrih vel, dawtnak le khamhnak zong Pathian nih hranhram in pek a kan duh lo. A duhmi nih a lak in ngei khawh ding ah a kan chiahpiak. A kan pek. Naa lak lai maw? Naa laak ahcun na ta a si. Khamhmi na si. Thlarau in hrinmi, hrinthar mi na si.

Khamh kan sinak ding ah kanmah tein kan i har ter tuk ttheu. Kanmah tuahmi si ahcun harter hi a ttha ko. Nain, Pathian vel in khamhmi kan si. Laksawng kan comi a si. Khrih nih a kan khamhnak cu Amah nih vailamtah cungah a liim dih cang. Kanmah tuah a hau lo. Harter a hau lo. Mah sinak kha Pathian lungton khawhnak caah kan ser kho lo. Kan kawl cu a hau ko nain, Amah Pathian nih a kan chanh i kan hmuh mi laksawng a si. A man pek a hau lo. Cu caah Jesuh cu kan zumh ahcun kan Bawi a si. Kannih cu a khamhmi fa kan si.