Ka Zumhmi cu Ka Hngalh (I know whom I have believed) II Timothy 1:12

Paul cu a zumhmi Khrih kha fiangtuk in a hngalh. Sifah harnak a tem cuahmah zong ah zaam aa tiim lo. A Bawipa ah fek tein, a dir ko.

Kannih nih teh kan zumhmi Khrih hi kan nunpi ngam maw? Harnak cu chim hlah usih, thluachuah a kan pek i kan lunglawmh caan zong ah Khrih thawng in kan ti ttung lo. Amah thangtthat lo in, kan i lawmhnak cu zudin ttinak in pei lawmh kan hman tawn hi. Kan i lawmh lio ah, lawmhnak a kan petu Khrih cu a ngaih kan chiatter.

Ruat tthan usih! ! !

American Baptist Churches USA General Board Meeting

Nihin cu ABC GB meeting kai ding in 12:00 pm ah kaa thawh. 2:45 pm ah ka phan. Nikhua a ttha tuk. Fing le tlang ah thinghnah tamdeuh cu an ttil cang. Khuasik chung ah kan luh cang caah. Nikhua zoh ah lung a leng pah. Pathian thilser hna nih thinlung an hlau. A thilser mi hna hmang in ka thinlung ah Pathian nih bia a chim.

Kan meeting tuahnak hmun le tthutdirnak cu Dolce Hotel ah a si. Hotel nuam ngai te a si. Ohio in Mirang pastor pakhat he kan riak tti. Pathian a duh tuk mi a si. Khrihfabu lianpi chungtel 1000 a ngeimi a si. Pathian nih hawikom ttha a ka pek caah kaa lawm.

Ka nunnak ka tuak lengmang tikah Pathian nih lam a ka hruai ning hi ka fiang chin lengmang. Bawipa ka thangtthat. Lairam kilken in a rami sifak santlailo te ka si. Pathian nih hawi theih thei ve seh tiah a kan duhpiak caah hi meeting ah kaa tel kho. Ka herhbikmi cu Khrih a si. Midang zong nih Khrih cu Bawi ah i ngeih cio ding ah kan duh hna. Khrih lo in kan nunnak a tling kho lo. Khrih he a kan tthentu thil hna cu tthial hna usih. Khrih sinin nunnak kan hmuhnak hi chim usih. Bawipa cu sunpar le lianhngannak pe hna usih. Nihin cu Khamhnak Ni a si. Pathian kan thangtthat ding ni le caan an si.

Pathian Vel

Ezra nih "Nangmah cu vel a ngei i zangfah a thiammi Pathian na si caah, le na vel ngeihnak cu a ngan caah an donghnak kha na phak ter hna lo i na hlaw hna lo" a ti (Nehemiah 9:31). Anganmi na vel ruangah na hrawk cikcek siang hna lo, na hlaw siang hna lo, tiin Bawipa cu a ti.

Hi Pathian vel ruangah ruahchannak kan ngei. Paul nih "Nannih cu vel an ngeih hna caah an khamh hna i khamhnak nan hmuh cu amah nan i bochan caah a si" tiah a ti (Efesa 1:8). Hi Pathian vel nih mi dang cungah vel a kan ngeihter.

Dietrich Bonhoeffer nih cun "Vailamtah a tel lomi vel cu mandeng tukmi vel" a ti. Biadang in, harnak aa tel lo mi vel cu man deng tuk mi vel a si. Amah cu Hitler a dotu a si. A zumhnak ruangah thahnak a huah.

Khrih vel hi man fak ngai in kan ruah ahcun "Ka vel cu na caah a za ko" tiah Pathian a ti mi hi kan theih khawh hnga. Kan tem khawh hnga. Pathian ah zumhfekmi zumtu kan si kho hnga.

Thlarau Khuaihliti

Harnak tuar lio ah Pathian bia "Ka vel cu na caah a za ko" hi pom khawh a si hnga maw? ti kha zahan zan ah kan i ruahmi a si. Paul nih a temtuarning kha kan chim. Horatio G. Spafford kong hi teh kan thei in kan ruat bal maw? Kan theih bal lo hmanh ah, a hlaphuahmi "Ka thlarau caah a ttha dih ko" (Hakha Hla cauk No. 332) hi cu kan sak lengmang mi a si ko.

Horatio G. Spafford cu a zangaimi lawyer a si. Amah tein rian (business) ttha ngai a ngeimi mino te, biaknak ah aa biatak i cawlcang ngaimi a si. A chan he a tongmi Evangelist minthang D.L Moody le a dang evangelist pawl he a cawlcang ngaimi mi sawhsawh (layman) a si. 1871 kum i Chicago ah mei a kangh lio ah Michigan Tilipi kap ah a ngeihmi a rian (business) cu a ciam dih. A nupi le a fanu pali he dinh can ah Great Britain (England) ah Moody le Sankey te thawngttha chim bawmh ding ah kal an i tiim. Anih kha ruah lo in, rian dang a chuah caah a nupi le a fanu pali cu a kalter chung hna. Hnu ah zulh ding in aa tiim. A nupi le a fale an kalnak sangphawlawng cu Great Britain tilawng Lochearn nih a suk i ti chungah a pil. Vantthat ah a nupi cu a him. Nain, a dawtmi a fanu pali cu an thi. Cu thawng a theih in a nupi cu a va fuh i a fanu le an tlaknak rili a phak tikah catlap cung ah a ngaihchiatnak cu "Ngaihchiatnak tilet bang a thawh tikah, zeikip si hna seh ka cungah a tlungmi kha ka caah a ttha dih ko. . . Ka thlarau caah a ttha. . ." tiah a ttial.

"Rulhreu tuah hneksaknak ah phan hmanh ning law, Ka zumhnak ka chung ah um seh, Ka sicannak kha Jesuh a ka hmuh cang, keimah ca a thi theng kha a thlet" tiah a ti. Ngaihchiatnak faktuk in a ton lio ah, Khrih nih "Ka vel cu na caah a za ko" tiah a rak timi aw kha Horatio G. Spafford nih a theih caah a si ko. A tonmi harnak cu a thlarau caah an ttha dih ko a ti khawh hi!

Kannih cu harnak le ngaihchiatnak can cu chim hlah usih, lunglawmhnak thluachuah lianngan kan hmuh lio hmanh ah "Khrih vel cu a za" in kan ruat kho lo. "Harsat tuk lio ah a chuakmi Khrih vel" cu mi henh le seh a hmangmi, ttihnung ngaimi khuai in a chuakmi tizu thlum bantuk a si. Khrih vel in kan dam. A uai car mi kan thlarau cu aa hrim tthan. A nung tthan tawn. Dongzim thar corh in khuai hna nih an tlanhmi tizu ngei mi pangpar bantuk a si tthan.

Nihin caah Thawngttha:

"Ka vel hi na caah a za ko" (My grace is sufficient for you), zeicatiah ka tthawnnak cu derthawmnak ah hin a lang (for power is perfected in weakness) 2 Korin 12:9)

Khrih salpa le a lamkaltu Paul nih pumsa in fahnak a tuar tawn. Ka titsa lakah hling a um tiah a ti. Hi fahnak cu Sehtan rianttuannak a si a ti. Pathian nih Sehtan kha zumtu hna fahnak pek ding kha a sianh ko tiah a ti. Job kha Sehtan tukforhnak tuar ding ah Pathian nih a sianh ko bantuk in ruah dawh a si. Pawl nih cun porhlaw in ka um sualnak hnga lo dingah ka cungah hi fahnak hi a tlung a ti. Hi fahnak a tuarmi ruangah voithum thliahmah thla a cam. Pathian nih "Ka vel hi na caah a za ko" tiah a leh. Pathian nih "Tthawnnak cu derthawmnak ah hin a lang" a ti.

"Pathian vel hi ka caah a za ve maw?" ti cu ruah ding kan si ve. Paul nih a chim mi bia rel tikah nang le kei hi a tthawng ngai in kan i ruah lio ah, Pathian tthawnnak hi a lang kho lo ti cu a fiang. Kan derthawm lio, kan tit lak ah hling a um lio ahhin Pathian tthawnnak theih hi har ngai dawh a si. Nain, Paul nih cun Pathian nih kan theih khawhnak ding ah harnak tuar ding hi a kan sianh ko a ti. Khuaruahhar in kan um lio zong ah Pathian vel hi ka caah a za ko ti ding mi tampi kan ngei ko hna. Pathian vel hi rel cio usih. Bawipa nih a kan chimh ve ko lai.

Zeitluk in dah na lianhngan ko!

Bawipa Pathian, na sermi thil vialte hi ka ruah tikah ka lung nih a phan lo. Arfi le khuadawm le khuari hna nih khin, Na thil ti khawhnak an langhter ko.

Ka Khamhtu Bawi, nangmah kan thangtthat ko, Zeitluk in dah na lianhngan ko! Ka Khamhtu Bawi, Nangmah kan thangtthat ko, Zeitluk in dah na lianhngan ko!

Swedish pastor Rev. Carl Boberg nih 1886 kum ah a phuah. Sweden nichuah thlang lei rili kam thluan zuahmah fing le tlang dawhning kha a hmuh tikah hi hla hi a ttial. Hi ka ram fing le tlang a len lio ah ruah lo in khua a tur, a tlawmpal ah dawh tuk in ni a tlang tthan. Thingkung cungah a zuangmi va te hna aw dawh kha a theih. Pathian thilser aa dawhning kha a hmuh tikah a khuk aa bil i Pathian cu a thangtthat. Hi hla cu mi kip nih kan uar. Kan sak tikah Pathian sunparnak le dawhnak kan tem khawh ve. Pathian nih sermi thil in aa phuannak kha kan thinlung nih a tem i thlarau thazang kan hmu kho.
****************************************************************

Zumtu tampi nih kan theih tuk ttung nain, kan theih lo mi Bible bia:

Johan 3:16: Cu ti cun Pathian nih vawlei hi a dawt hringhran caah a Fapa ngeihchun te kha a pek, cu caah amah a zummi paoh cu an thi lai lo, zungzal nunnak an ngei lai.

Ruah lo piin phungchim thiah mi hna maw, phungchim awk a thei lo mi tambik nih hi Thawngttha hi an chim tawn. Pathian nih vawlei mi a kan dawt ti hi cu chim a awl ngai. Nain, Pathian nih keimah thengte a ka dawt caah a Fapa ngeihchun te cu thihnak fakbik tuar in Calvary vailamtah cungah thah a tuar ti hi theih a har. Pathian dawtnak thei lo in hi Bible bia cu kan chim tawn. Pathian dawtnak a thei taktak mi hna nih an chim tikah thlarau thazang tthabik ah a cang.

Hi ti hin a si. Jesuh Khrih nih cun mi nih kan theih khawh bik mi kha tahchunhnak ah hmang in a kan cawnpiak tawn. Israel mi hna cu Izip in Kanaan lei ah an kal lio ah Pathian bia an ngaih lo caah rul nih a cuk hna i tampi an thi. Moses kha na Pathian sinah ngaihthiam kan halpiak ko law tiah an nawl. Moses nih cun Pathian sinah a halpiak hna. These ram car ah dar in sermi rul kha a thlai i a zohmi paoh an dam. Judah tuanbia ah philh khawh lo mi a si. Hi tuanbia hmang in Jesuh Khrih nih Mi Fapa zong hi tar a si ve lai a ti. Amah a zummi paoh zungzal nunnak an ngei lai a ti. Vailam cung ah tarmi Khrih a zummi paoh nih zungzal nunnak kan ngei ti kha a kan chimh. Nain, Nikodemu caah theih a har. A mawh lo nak cu, Jesuh Khrih kha vailam ah thah khawh ding in a ruat men lai lo. Kha lio minung nih Pathian Fapa ngai te vailam cung ah thlai ding cu an ruat lai lo. Messiah Mi khamhtu ding in ruah lio ah, mifir thih in thih ko ding cu ruah a har ngai ko lai.

Kannih caah cun, Vailam cungah Khrih a thihnak kong cu kan theih cang. These ram car ah Moses nih a thlaimi dar rul bang thlai a si cu kan hngalh dih. A zummi paoh nih zungzal nunnak an ngei lai a ti tikah, a zummi nih zungzal nunnak ka ngei, a hrintthan/thar mi ka si ti hi a fiang kho ngai. Cu ti cun, Pathian dawtnak kong a ba in kan chim tawn mi cu kanmah nih ngeih le temmi taktak in kan chim khawh ve cang. Johan 3:16 cu kan caah nunnak ti rawl taktak ah a cang. Thlarau nih lungpemnak a kan pek. Thlarau rianttuannak a si. Jesuh Khrih nih a chim ning tein, Thlarau nih lungpemnak a kan pek. Khrih cu ka Bawi le Khamhtu a si tiah lunglawm tein kan zumh khawh cang. Khrih he nun a nuamhnak kan tep cang. Amen.