Jacksonville Chin Baptist Church Lennak

Anmah inntek bia tu hi rel hna usih. Rev. C Duh Kam
********************************

Bawikhrih ah U le nau nu le pa hawi le vial te,

Tihni(May 23, 2009) zinglei 9.30 a.m. ah Washington D.C lei CBMC(Chin Baptist Mission Church) mino hna le an Church Pastor Rev. Dr. C Duh Kam cu JCBC(Jacsonville Chin Baptist Church) ah, Gospel team in an rak kan tlawng i May 24, 2009 zanlei 10.00 p.m. tiang kan sin ah an cam. Hi nihnih chungah hin Thawngttha, hla, thazangpeknak, le ruahnakcheuhnak aphun phun he caan an kan hman piak i kan ilawm hringhran.

Kan hnu nikum ah khan Miami lei Tedim kan unau(Mino) hna Gospel team in an rak kan tlawng. Cu hnudeuh ahcun Aye Chian Me le ahawi le Columbia, South Carolina lei in an rak kan tlawng tthan.

Tutan D.C lei Mino an kan tlawn hi kan rak ingeihnak leng in kan inuam i, kan ilawm. Kei hrim nih cun, an aw le an aan le an biachim vialte le an cawlcangning le an lung arualning le chimh an ngeihning le abikin Pathian an duhning ka zoh hna tikah an pum lawng mino an si i, an zeidang vialte cu upa(nu le pa) dirhmun ah an dir ka ti!

D.C lei an rathlan deuh te ah hin kan khua ah bia le hla aleng mi cu; mino upa le upa cheukhat hna nih, Mawte(Lg. Monica) ara lai e an ti. Kan fa pa le cheukhat nih "Laimi Duai(Cungte)Hoilopar Actor ara lai e an ti,". Kan fanu le nih Actress le Singer akemh mi Monica Uk hmuhlai kan ingeihtuk an ti i an nu le an pa umthiamlo in zeitikdah dah an ratlai an rak kan ti lengmang hawi. Acheu nih D.C lei awttha le muidawh an tamtuk tiah an ingeihnak chim lemlo in zeitindah ka sattal lai/hruk-eih lai i, beach(rili kam) ah ka lenpi hna lai ti tibantuk, mawttaw ttawl tibantuk an buainak ah hlaremh pakhat te cawn mi van pehzulh zong an tlolh dih hawi ai! Upa deuh nih North America ah pa dirhmun ah CBFA in si seh ABC lei ah si seh retheingai in miphun hawi hna caah rian akan ttuanpiaktu le CBMC ah Church Pastor zong asi mi Rev. Dr. C Duh Kam aralai i, siaherh bia vialte akan ruah lai tiah kan rak ingeih tuk hawi.

Tutan D.C lei an rak kan tlawn cu, Awngbali(lottery) poh tluk ah kan iruah. Zei caah ti cun, hngakchia bik in upa bik Van Van pa(Saya Thang Rem) tiang kan rak ingeih mi vialte an rak kan phurh dih. Pakhat nu kan fanu/nau nu te kum 12 hrawng hna cu Lungding khua asi an ti i, Lungding khua asi caah cun ta a si lai! a aw hi alainak le a tlinlonak a um lo attha tak tak. Vawlei lei hlasak hna ahuam pah i hmailei ah American Idol hna ah ai zuamve ahcun pakhatnak a hmuh te lai(kai capo lo hih). Zeiruangah dah D.C lei hi hi ti rumro hin an aw atthat hnga i an pianthar hnga ti zong ka ruat len.

U le nau(tta le far) hmunkhat te ah hlasak tti le idawt tibantuk hi Laimi lak ah ahar ngai mi asi. Mawte/Monica Uk le atta Arron Uk an ttafar ten hla an van sak i an thiamning le an awtthatning hrim hi cu, Vuleicung tta le far hlasa(duet) ahcun athiambik an si lai dah! Pumh asi ko na in kan request hna i an kan sak piaktthan(Pathian zong ailawmtuk lai tiah ka zumh).

Cungte(Duai) hna hi Guam hrawnghrang ah khan, aholh atamngai tiah ka mit arak kem pah tawn na-in, tutan bak ah Pathian nih talent arak pek mi asi kai fiang. Laimi Duai bak cu arak sitak ko. Anau le nih abia an ngeih an ibochan, kan mah JCBYF mino hna zong nih bia tampi an hal i, lungsituk in a leh hna, ruahnak ttha ttha zong apek hna i, acungah kan ilawm hringhran. Laimino hruaitu ttha pakhat kan ingeih mi asi.

D.C lei mino hi phundang te an si Pathian thangtthatnak ah hin nungak le tlangval hmai ah an chuak i, ibiataknak he hla an kan hruai. An aw nih le attha dih an idawh chinchap hawi. An mahruangah aipummi vialte zong awttha ah kan iruat dih. Solo, Duet, Group song, Quartet, Choir an thiam dih. A dawh zong an i dawh, a thiam zong an thiam, an aw zong attha bak(atlawmlei ah kumthum an cawnta hnu ah an rak kan tlawnlo ah cun hi tluk in an awtthat le thiamkhawh ding hi cu ahar ngai lai ti zong kan ti phah hna). Laimi nih sakmi hlaremh le duet le solo tibantuk in a khuai achuah hmasa hna an si ah cun, an poh bak lai i angaitu vialte zong nih thlarau lei thazang tampi kan ngei lai tiah ka zumh(Laimi nih hin hlaremh ttha le duet, solo cawhpolh in ngeihawk kan ngei setsai rih lo). Cun, ka philh deng an hlahruai pa hi mino te asi na-in, Saya Sang Mawng le amah ah hin hodah athiam deuh lai tiah atu hi kei cu ka buai. An mah D.C lei mawte chinnak hna ahcun hla a kan veihpah bak hin a kut in a kan sik pah khawh e ati!

Rev. Dr. Duh Kam phungchim atthatning hi amak. Ram le miphun dawtnak zongah tampi kar akan hlan ter lai ka zumh! Kan lung arak fianlo mi alang in athluamthlam in kan theih mi zong fiangten halnak le lehnak zong a kan ngeihpiak khawh i kan ilawm. Southern Baptist Church ah anganbik asi mi First Baptist Church ah chunkarlak ah kan pumhpi i alung singai ve ttheu lai. Kan pa Dr. Hre Kio zong kan rak pumhpi bal i, ka hmuh mi Church ahcun ka uarbik le angan pawl asi e arak ti phah.

Nikhua nih akan pek deuh lo ruangah, an phanh ni cu khawika hmanh kan kal pi kho hna lo na-in, athaizing(Zarpi ni) ah Kan mino hna nih Jax-Beach ah an kal pi hna i valley ball hna an beng ti hna an i lio i, an inuamhtuk ah pumh zong an philh deng! Rak ttin zok zok uh pumh kan tlolh cang lai hih kan ti hna i an rak i cheih. An tlunlai zaan(Zarhpi zaan) hna cu pumhdih cangka in kan tlunglai an ti mi kha - kan mino hna he an inuamtuk hawi i, tlun an tlolh deng hawi. Zaan 10:00 p.m. ah tthen sianglo bu ten kuttleihnak kan ngeih hna hnu ah an kan tluntak. Minung 33, Van 3 in an ra i minung 33 he an kir tthan. Atu kha cungte nih kan phan dengcang a ka ti i, tel # pawl kan i tlunpi lengluang ko 33 lawng he kan tlunglo a ka ti. Mah caa ka ttiallio pi ah hin kan Khrihfa upa nih phone arak ka chonh i, an lengno awttha zun in ka zaw e a ka ti!! Kan Mino pawl chin chin cu zeidek an va lawh hnga???

"Khrih caah Lai Mino" ti mi tlangtar in arak kan tlawng mi D.C lei le an nu le an pa le an Khrihfabu cungah kan ilawm. An dih an heu mi le an kan siaherhnak le kan caah an sian mi vialte cungah Pathian nih thluachuah pechin hna seh law, kan mah JCBC cung zongah athluachuahnak tlunter ve ko seh. CBMC Mino hna cu; Laimi caah zohchunhawktlak mino lawng si lo in, hmailei(future) Laimi nu le pa ttha ah thluachuahnak kan pek piak ko hna seh tiah ka bia ka donghter.


Sui Bik Thang(Parku Pa)

Jacksonville Chin Baptist Church, Florida ah

Chin Baptist Mission Church, DC in mino gospel team cu an pastor Rev. Dr. C. Duh Kam he len ding in May 22, 2009 Friday 6:00 pm hrawng in an chuak lai. Nikhatni Memorial Day ah an rak kir tthan lai. Thla cam piak cio ding ah Khrih min in kan sawm hna. Kan kir tikah thawng kan thanh tthan te hna lai.

"Maw Pathian, ka chungah hin lungthin thar ka ser piak law a thar le zumh tlak a si mi ruahnak ka chung ah chia ko. Na umnak hmun khan ka tthawl hlah. Na Thiang Thlarau kha ka lak kanh hlah" Ps. 51:10-11)

C. Duh Kam

American Baptist Churches, USA

Nihin hi Burma ram in a ra mi refugee hna bawmtu ding ah ABC nih minung pakhat an kawl caah a sawk mi hna kha interview tuah ding ah ka ra ve. ABC zungpi kamte Sleep Inn hotel ah ka riak. ABC zungpi hi donut changreu a pum mi bantuk in an sak. A lian. Aa dawh. Hi ka hmun in vawlei cung ram kip ah Khrih Thawngttha chimtu missionaries tampi an thlah hna.

American Baptist Churches nih hin harnak a tawngmi refugee pawl hi biatak tein an bawmh hna. Nihin tiang ah 93,000 an bawmh cang hna. A tu zong ah hin anmah bawmhnak chung ah refugee in a phanmi Laimi le Kawlram miphun dang zong an um len hna. Minung hawi bawmh hi Khrih caah rianttuan ah an ruah caah a tu bantuk in an ram ah refugee in kan phak tikah zeitindah kan bawmh khawh hna lai ti kha an ruat. Baptist siangbawi Rev. Adoniram Judson le Ann Judson chan kum 1813 in siseh, Laimi siangbawi hmasabik Rev. Arthur le Laura Carson chan kum 1899 in siseh, an hrinsormi hna kan si caah, kan siangbawi te hna an lennak leilung cung kan phanh tikah an kan dawt khun nak a si.

Pathian khuakhanning hi khuaruahhar a si. Kei zong hi bantuk in refugee bawmhnak kong ah a caihkhangtu ka si ve. Phun dang pi in Pathian nih rian a rak kan fial. Ruah phak lo pi a si. Pathian ka thangtthat. Kan nunnak ruat cio usih. Pathian sinah lawmh chim ding mi kan ngei cio ko lai.