Bawipa Thangthat

Saturday, January 31, 2009

Laimi Ral Nganbik "Zuu"

Kan siangbawi Rev. Dr. Robert Johnson nih a ttial mi American Baptist Chin Mission Vol. I & II hi rel ahcun American Baptist siangbawi hna nih Lairam ah Thawngttha an chim lio ah Laimi hi zeitluk in dah zu kan din ti hi hmuh khawh a si. Kan i hngalh hnu pi tiang ah Pathian zumlo mi tampi an um rih. Zu an dap i zu an ding. Hi hna cu zumlotu an si.

Nihin ah cun Khrihfa aa timi Laimi nih kan kaltaak cangmi, miphun hrawktu "zuu" cu kan fuh tthan. Zuu cu kan miphun thin le lung a eitu ttihnungbik mi kan ral nganbik ah a cang tthan. Mi a huat ter. Mi kut a san ter. Mi a hruh ter. Mibu lak lawng si lo in, nu le va karlak le fanu le fapa karlak zong ah buainak a chuahpi. Hranhram lo in minung nunnak lak aa tiim. Thawnginn lei ah kan hruaitu kan ral nganbik a si.

Kan nunnak thlengtu le kan miphun thlengtu ding ah Khrih Thawngttha kan herh. Hi Thawngttha long nih kan ral nganbik zuu cu a tei khawh. Khrih tthawnnak hriamnam hi i put in kan nunnak a hrawktu zuu hi tei i zuam hna usih. "Khrih nih tthawnak a kan pekmi thawng in zeithil paoh ka tuah khawh ko hna" (Filipi 4:13)

Tuesday, January 27, 2009

Thawhlawm pek a herh maw?

Voikhat cu pastor pakhat nih thawhlawm peknak sermon a chim. Mi pakhat nih aa thawh i "Cu ti rumro i a nihlawh ca ko ah phung a chim cu dah ngai" tiah a thinlung in ningzak deuh ah ruat in pastor pa cu okhlawh dirhmun dengmang ah a dir ter. Hi pa nih a rak hngalh lo mi cu Khrih nih "Nang ca keimah ka thi, Ka thi nang ca ka thlet, Nangmah kha kan tlanh i, Nun tthannak kha kan pek, Nangmah caah ka lu ka hloh, Kei ca zeidah na hloh?" tiin bia a rak hal mi hi a si.

Hi hla hi Pastor Rev. William Henry Havergal fanu hniangbik Frances Ridley Havergal nih a phuah mi a si. A ngandamnak a tthat lo caah Frances cu a duh lio te kum 43 a si ah a thi. A dam lo bu tein biaknak ah a pe i a zuam ttialmal mi a si. Dussendorf, Germany ah ca a cawn lio ah vampang cungah a tar mi, Pilat hmai ah Judah mipi nih an nihsawh mi, hling luchin chinh in thisen he vailam ah an thlai mi Khrih hmanthlak kha a hmuh tikah a thinlung kha a suk hai tuk hringhran. Cu cangka cun khedan (pencil) kha a lak i hi hla hi a ttial colh. Thinlung le thlarau in ttial mi hla cu nihin tiang a nung ngaingai mi hla a si.

A cunglei biahalnak lehnak cu Khrih biahalnak "Kei ca zeidah na hloh?" ti hi a si.

Monday, January 26, 2009

Pathian Dawtnak

Pathian cu dawtnak a si (I John 4:16). Pathian nih a kan dawtnak cu a tam. A Fapa ngeihchun pek tiang in a kan dawt (John 3:16). Hi bia hi kan theih tam bikmi thawngttha a si. Kaa in chim awl ngai a si. Thinlung in tem ve lo ahcun kan tthawnnak ah a cang kho lo. Kan nunnak vialte hi pakhat hnu pakhat in zoh usihlaw, Pathian dawtnak hi a lang kho hnga maw? "Pathian nih vawlei a dawt hringhran caah" timi zawn ah "Pathian nih keimah a ka dawt tuk hringhran caah" a Fapa ngeihchun te kha a pek tiin chimh colh kho usih law kan nunnak aa phundang ko lai.

Thursday, January 22, 2009

Khrifabu Nunnak

Dr. Emil Brunner nih "Mei cu alhnak in a nun bantuk in, Khrihfabu cu mission in a nung," tiah a ti. Mission rianttuan cu khrihfabu nunnak le thanuamnak a si. Thanuamnak hi lunglawmhnak

Thawhlawm pek hi aho sinah kan pek ti kan fian lo ahcun, thlarau nunnak ah kan hmang kho lo. Mi cheu nih cun pastor hlah maw kan pek rua an ti. Pastor kha an duh ning a um lo tikah an chaw pek mi an i ngaichih. Mi cheu nih khrihfabu ah kan pek tiin an ruah ve. Khrihfa upa nih an duhning in an hman lo tikah an chawpek mi kong ah an i ngaichih. An peknak an hngalh lo caah a si. Bawipa Pathian nih "Cheuhra cheukhat cu keimah ta a si" a ti (Leviticus 27:30; Deuteronomi 12:17; Number 18:26; Malakhi 3:10). Kan pek mi thawhlawm hi a ngeitu Pathian sinah ka pek ti hi kan thei fiang maw? Jesuh Khrih nih "Nan chaw a umnak ah khan nan lung zong a um ve lai" tiah a kan ti (Matthai 6:21).

Jesuh chimmi a hman tuk. Pastor sin pek in kan i ruah lio ah kan lung cu pastor sin ah a um. Khrihfa upa sinah kan pek rua tiin kan ruah lio ah kan lung cu khrihfa upa sin ah a um. A ngeitu Pathian sin ah kan pek ti kan hngalh tikah kan lung cu a kan sertu le a kan dawtu kan Pa Pathian sin ah a um.
nak in a caan a sau deuh. A lumnak a sang tuk lo, a niam tuk lo. Thinlung ne ah a caam peng mi lawmhnak a si. Minung a si paoh nih kan rianttuanmi theitlai hmuh kan duh dih. Khrihfabu zong nih a duh ve. Mission rian kan ttuan lawng ah khrihfabu nih a rianttuannak theitlai a hmuh khawh. Cu ti cun, thlarau le pumsa chawva in a tthang.

Sunday, January 18, 2009

Khrih Damnak Mission

Agape Clinic, Hakha

Hakha khua ah Chin Baptist Mission Church (CBMC), Washington, DC nih $96,000 dih in Siangbawi te thlanmual thlang te ah Agape Clinic cu an sak. Hi sizung hi Hakha Baptist Church nih zohkhenh ding in sak mi a si. January 2003 in thok a si nain, ralkap cozah nih kum khat reng lo chung sak peh lo ding in an kham caah March 2007 lawng ah an dih. Hi clinic ah Khrih damnak mission rian cu Hakha Baptist Church nih sibawi, nurse, Xray thlatu, cazi, inn hngaktu le inn thiantu tiang in an lak hna i rian an tuan nain, phaisa hram an ngeih lo caah an hngawl tthan. September 2008 in Chin Baptist Fellowship of America (CBFA) nih $2000 le CBMC nih $2000 an thawh i a thar in an nunter tthan. Hi rianttuannak ah CBFA le CBMC nih kuttlaih in rian an ttuan tti. Nain, saduhthahning tluk in rianttuan khawh a si rih lo. Hakha Baptist Church nih 2009 ah kyats sing 30 tluk tal thawh khawh kan i zuam ve lai an ti. CBFA nih $2000 cu aa zuam rih lai. Hi sizung ah rianttuantu hna cu:
1. Dr. Thang Hnin Lian
2. Sayama Ngun Hlei Sung (Nurse)
3. Pu Tial Ceu (inn zohkhenhtu) an si.

Nihin tiang ah Agape Khrih Damnak rianttuannak in mizaw zoh mi hna cu:

1. Agape Clinic ah mizaw . . . . . . . . 556
2. Hakha khuathar ah mizaw . . . . . 52
3. Nipi ah kal in zohmi mizaw . . . . 21
4. Loklung ah zohmi mizaw . . . . . . 55
Dihlak . . . . . . 684

Mizaw hi man pek lo in an zoh hna. Phaisa thazang a tlawm caah si cu a miak la lo in, a man hram khan in an cawkter hna. Mihar santlai lo taktak cu man lo in si pek an si. Hakha khuapi lawng ah si lo in, khuate zong ah kal i mizaw zoh ding kha an i tinhmi a si.

Bethel Clinic, Thantlang:

Thantlang khua ah Bethel Clinic cu Battle Creek Chin Baptist Church (BCBC), Battle Creek, Michigan nih an sak. Khrih damnak mission rian cu an ttuan. 2008 kum thok in CBFA nih $2000 in hi mission rian ah aa tel ve. Khrihfabu dang nih BCBC cu an bawmh hna i clinic caah a herh mi Xray zaihnak hna an cawkpiak hna. Hi ti hin sii rianttuantu hna kha hlang in, damnak mission rian cu ttuan a si. Sifak santlai tampi nih sibawi an panh kho cang. Saduhthahning in cun a tling kho rih lo.

Lunglawmhnak:

Hi khrih damnak mission rian ah aa tel kho mi caah lawmhnak a tam ko. Lairam ah khuasa mi kan u le nau dirhmun cio zoh tikah sifah ruang ah lufah si hmanh aa cawk kho lo mi an tam. Thisen tamtling hmanh ngei lo in, rethei tuk in khua a sa mi miphun hawi hna nih man lo in sibawi an panh khawh cu ahodek lung aa lawm deuh hnga! Mizaw nih thlarau, thinlung le pumsa in damnak an hmuh khawh lai. A bawmtu hna kan caah thinlung a nuam. Thinlung a nuamh ahcun kan pumsa zong a dam ve. Khrih dawtnak ruangah a si. CBFA ramchung khrihfabu dihlak le zumtu kan caah kan lawmhnak a si.

Sawmnak:

Hakha le Thantlang ah thok mi Khrih damnak mission rian ahhin vawlei cung ram kip le khrihfabu kip in van i tel kho lulhmalh usihlaw cu, Lairam khuasa nu le pa, le sifak santlailo hna caah zeitluk in dek lawmhnak a san hnga! Hi rianttuannak ah kut tampi a herh ko. Pumpak in maw, khrihfabu in maw, tlawmte cio thawh mi nih damnak rian tampi a ttuan khawh ding a si. Hi rianttuannak tel cio ding in Bawi Khrih min in kan sawm hna. A konglam tamdeuh theih na duh ahcun "cduhkam@yahoo.com" ah hal khawh a si. Kan nunnak caan tawi te chung ah, kanmah ca lawng ah nung lo in, kan caah nunnak a pe mi Khrih le a dawtmi kan miphun hawi hna caah nun i zuam hna usih. Hmuh lei nak in pek lei ah lunglawmhnak a tam deuh (Lamkaltu 20:35)

Cinken Zungzal Ding

Laimi hi Pathian nih thluachuah a kan pek lio a si. Kawlram miphun dang hna he tahchunh tikah, mi tlawmte kan si. Sifak kan si. Nain, Pathian nih a phunphun in a kan cawisanning hi ruat usih. Kawlram lawng si lo in, vawlei cung ram kip zong ah tlawngleeng le rianttuan kho in Pathian nih lam a kan on piak. Hmunhma le caan ttha he a kan ton ter. Miphun dang hna zong nih an kan hngar ko lai. Hi lio ah Pathian hi ttihzahnak le upatnak pek kan philh sual i kanmah thil ti khawhnak ah kan rel sual ahcun a kan chuh tthan lai. Kan tlak ning a sang tuk lai. Pathian bia hi kan nunnak hruaitu ceunak ah hmang hna usih. Kan miphun caah remnak le daihnak le dawtnak caah hmang hna usih. Bawi Khrih thawng in a nungmi miphun fate kan si hi philh hlah usih.
*************************************************************

Kum Thar 2009

Hawi dawt hna:

HAPPY NEW YEAR!

Ni le caan nih rianrang in an liam. Nikum cu nizan bantuk ah a cang. Thaizing cu chikkhat te a si. Lei cung kan nunnak hi mittthep kar te taktak a si ko. Job nih cun "Nu hrin mi fa cu a chan a tawi i harnak in a khat. Pangpar bang in a hung par i a uai tthan ko. Thladem bang a tli i aa peh lo" a ti (Job 14:1-2). Kan nunnak caan tawite hi zeitindah kan hman cio?

Kum Thar ah kan luh tikah zeitindah kan nunnak hi kan hman cio lai? Pathian nih a kan dawtnak hi a thar in kan thei kho te hnga maw? Khrih caah nunnak hi kan siang te hnga maw?

Paul nih cun "Kei ka caah cun nunnak cu Khrih a si ko" a ti (Filipi 1:21). Kan ti kho ve te hnga maw?

*****************************************

January 4, 2009 Sunday
Chin Baptist Mission Church
Washington, DC

Bible relnak: Cun an sin i a um lio ah khan hi nawlbia hi a pek hna i, “Jerusalem khua hi chuahtak hlah u, ka Pa nih laksawng an pek hna lai, tiha ka rak in chimh mi hna kha hngak ko u. Johan nih cun ti in tipilnak a pek hna, sihmanhselaw kan hmailei ni tlawmte chungah hin Thiang Thlarau in tipil pek nan si lai” tiah a ti (Lamkaltu 1:4-5).

Jesuh le a lamkaltu hna cu hmunkhat i an um tikah khan, a lamkaltu hna nih cun an thawh i, “Bawipa, a tu can ah hin maw Israel mi cu uknak khan a pek tthan hna lai?” tiah an hal (v. 6).

Jesuh nih cun a thawh hna i, “Ka Pa nih amah nawlngeihnak chungah a chiah mi caan le ni thla kong cu nannih hngalh awk a herh lo. A sinain, Thiang Thlarau nan cung i a tlun tikah cun, tthawnnak in nan khat lai i, Jerusalem le Judea ram vialte le Samaria ram ah le vawlei cung khuazakip ah ka tehte nan si lai,” tiah a ti hna (v. 7-8).

Bia hramthoknak:

Nihin hi Burma rammi kan caah cun Independence kan hmuh ni a si. Ni sunglawi a si nain, Laimi kan caah ni sunglawi a si kho tuk ti rua lo. Kawl ralkap nih a kan uk chin mi kan si i kan luatnak cu a tlau cang. Hi bantuk Kawl ramkap nih a kan uk chungah Laimi hi kan tlau ngai cang. Fimnak sianginn le lam le sul le zeidang a kan tuahpiak mi a um lo. Laimi hi cathiam tampi a chuak cang ding kan si nain, kan dirhmun nih a chit ti lo caah, fimnak kan bau. Cawnnak ah kan bau tikah minung nih kan si ding hnga zong in kan si kho lo. Khrihfa ttha ah aa ruat mi Laimi cheu khat hmanh nih khrihfa a si lo mi miphun dang, sining dawh (discipline) ngei te in a ummi tluk in kan nun zia zong a ttha kho lo. Mah duh in khua a sa i, midang sining zong a ruatpiak kho lo mi kan tam ngai ko rih hna.

Kum Thar chung ah a zarh khatnak kan phan. Kum hlun chung ah kan duh lo mi thil kan tuahmi tampi a um lai. Tuah ding in kan thinlung in kan hngalh mi kan tuah lo mi zong tampi a um lai. Pathian ah zumhnak a bunh rih lo zong kan um lai. Pathian zumhnak ah fiannak a ngei ko nain, thlarau in thazang a der i pumsa duhnak ah thinlung a pe deuh mi zong kan tam men lai. Ca in kan ttial lo nain, kanmah cio nih kan hngalh khawh mi kan thinlung chung ah kan tuanbia cu kan ttial dih cio ko. A tu cu 2009 Kum Thar chung ah a thar in kan tuanbia ttial ding kan si tthan.

Misison Rianttuannak

1) Kum Thar chung ah kan luh tikah kan rianttuannak theih ter kan duh hna.
a) CBMC nih Kawlram ah thawngttha a thei lo mi sin ah mission rian kan ttuan. Thlarau a tlau mi hna sin ah thawngttha kan chim.
b) Chin Baptist Fellowship of America he mission rian kan ttuan tti. Paletwa ah ngakttah in kan sa. Kanpalet ah ngakttah hna kha Thawngttha le pumsa rawl in kan zohkhenh hna, kan cawm hna.
c) CBFA he Matupi Bible sianginn ah bawmhnak a tuah.
d) CBFA he Hakha Chin Christian College (CCC) siangcachim hna kha kan bawmh hna. Kan khrihfabu CBMC nih CCC ah scholarship a tuah i 2008 chung ah $3000 tluk kan bawmh hna. Bawipa rianttuantu ding Bible siangngakchia hna bawmhnak ah hman a si.
e) Hakha ah CBMC nih Agape Clinic a sak. Thantlang ah Battle Creek Chin Baptist Church nih Bethel Clinic an sak. CBFA he Khrih damnak mission rian kan ttuan tti hna. Sifak santlai lo Laimi tampi nih awl tein sibawi an hmuh khawh cang. Khrih damnak an hmu.
f) Lai holh in Hakha Bible hrilhfiah ttial dih ding in Chin Christian Writers Group kha CBFA nih 2007 kum ah $6000.00, 2008 kum ah $4000.00 kan bawmh hna. 2009 kum ah $5000 bawmh tthan ding an si. Kanmah khrihfabu kut aa tel ve.
g) Khrihfabu kip he i bawm in CBFA nih Lairam ah a paam mi hna bawmhnak $7000 a tuah. Thlang Lairam khuasa hna cu chanhtu an ngei lo. Ramdang um Laimi nih kan bawmh hna.
h) CBFA hruainak in Kawlrawn ah cyclone thlichia nih mi tampi nunnak a lak i inn vialte a hrawh tikah, bawmhnak kan tuah.
i) CBMC nubu nih Lairam ah ngakttah tampi nan bawmh hna.
j) CBMC mino nih sibawi cawng lio nan cawm chuah. Akha ram ah mission inn saknak hmun nan cawk piak hna.

Hi vialte bawmhnak le Thawngttha chimnak ah a dih mi phaisa hna cu nangmah le na chungkhar thawh mi a si khah! Nan chungkhar nih Bawipa sin ah nan pek mi a si khah! CBMC le CBFA nih a ttuanmi tiin ruat sual hlah u! Bawi Khrih thawngttha chimnak le a ram kauhnak caah hi tluk in nan ttuan mi vialte hna hi hngal lo in nan um sual lai ti ka phang. Lairam ah Khrih damnak mission rian kan ttuan mi hna hi nangmah le na inn chungkhar nih nan pek mi chaw le va in ttuan mi an si. Miphun hawi hna damnak a petu nan si hi philh hlah u!

2) Zei ruang ah dah mission rian hi kan ttuan?

Jesuh Khrih nih a kan fial mi a si. Jesuh Khrih nih thihnak in a thawhtthan hnu ah a dawt zultu hna sinah bia a cah taak mi hna hi a thar in ruat ti hna usih. “Vancung le vawlei cung i a ummi nawl ngeihnak vialte cu pek ka si cang. Cu caah khuazakip ah va kal ulaw miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna ulaw kan fial mi hna hi an zulh nak hnga va cawnpiak hna u. Cun hi hi philh hlah u: nan sinah a zungzal in, caan dongh tiang in ka um lai,” tiah a ti hna (Matthai 28:18-20).

Hi bantuk in Khrih nih a kan fialmi hi kan ttuan ding mi khrihfabu mission rian a si. Khuazakip ah Thawngttha chim ding ah fial kan si.

3) Vawlei ah Thawngttha chim kan hau ti maw?

a) Vawlei cung milu le khrihfa sining zoh usih.

Vawlei cung dihlak milu (w0rld population): 6.7 0r 6.45 billion
Khrihfa milu (Christians): 2.14 billion (2008 canceu tiang ah)
Khrihfami hi vawlei cung minung cheu thum ah cheu khat kan si. Khrihfa mi hi kan karh ve nain, Muslims le Hindus pawl hna an karh ning hi a rang deuh.

Muslims: 1.31 billion
Hindus: 870 million

Khrihfa ka si a ti mi paoh in rel an si. Hi chungah biakinn a phan ti lo mi an tam tuk cang. Khrihfa biaknak cu a tthangcho mi ram ah a zawr deuhdeuh. Vawlei cung thilri le fimthiamnak nih hmunhma a lak khanh dih cang. America le Europe ram ah nichuah lei biaknak Islam, Hinduism le Buddhism hi a karh thluahmah. Kawl ram Buddhist pawl hmanh nih USA ah Buddhist mission rian an ttuan. Kawlram mirum chungkhar pakhat hna nih kum khat ah $95,000 tiang an hlut khawh (Austin, Texas ah Kawl pawl nih an chuahmi cazin ning in). Hi tluk in an biaknak ah an ttang.

b) Laimi (Chins) Khrihfa:

Laimi hi Jesuh Khrih thawngttha nih March 15, 1899 ni ah Hakha khua ah a rak kan phanh. 1904 kum hi khrihfa kan can hmasabik kum a si. Khrihfa kan sinak hi 105 kum a si cang. Chak Lairam um hna cu khrihfa kan si dih pah. Nain, Thlang Lairam um hna cu khrihfa a si lo mi an tam tuk rih. Khrihfa sinak a sau deuh mi Chak Laimi zumtu hna cu Pathian biaknak ah biatak a chuah ti lo mi kan tam. Kan nunnak ah Khrihfa nunzia a lang ti lo. Biaknak ah biatak a chuahmi an um ve ko bu ah, seino tampi hna cu Jesuh Khrih dawtnak thei lo in mah nuamhnak ah an pil tam cang. Cu caah, Khrih Thawngttha hi zumlo tu hna sin lawng ah si lo in, zumtu a si cia mi hna kan sin ah biatak te in chim le cawnpiak kan hau cang. Milu tlawmte lawng a si mi miphun kan si caah Pathian kan biaknak nih kan miphun sining a cawisan a hau. Cu lo ahcun, kan tlau tuan ko lai.

c) Pathian thawngttha hi chim ding ah rian tampi kan ngei. Vawlei ah Khrih thawngttha an thei rih lo mi tampi an um rih. Kan Laimi lak ah Thawngttha a thei rih lo mi tampi an um. Kan pawngkam ah Pathian bia a thei bal mi tampi an um. Jesuh Khrih nih Thawngttha chim ding ah a kan fial.

Jesuh Khrih nih thihnak in teinak he a thawhtthan hnu ah a zultu hna kha “Jerusalem khua hi chuahtak hlah u, ka Pa nih laksawng an pek hna lai, tiah ka rak in chimh mi hna kha hngak ko u. Johan nih cun ti in tipilnak a pek hna, sihmanhselaw kan hmailei ni tlawmte chungah hin Thiang Thlarau in tipil pek nan si lai” tiah a ti (Lamkaltu 1:4-5).

Jesuh le a lamkaltu hna cu hmunkhat i an um tikah khan, a lamkaltu hna nih cun an thawh i, “Bawipa, a tu can ah hin maw Israel mi cu uknak khan a pek tthan hna lai?” tiah an hal (v. 6).

Jesuh nih cun a thawh hna i, “Ka Pa nih amah nawlngeihnak chungah a chiah mi caan le ni thla kong cu nannih hngalh awk a herh lo. A sinain, Thiang Thlarau nan cung i a tlun tikah cun, tthawnnak in nan khat lai i, Jerusalem le Judea ram vialte le Samaria ram ah le vawlei cung khuazakip ah ka tehte nan si lai,” tiah a ti hna (v. 7-8).

d) A dawt zultu hna sin ah a taktak in Pentecost ni ah Thlarau tthawnnak aa phuang. Thlarau thazang an ngeih tikah zumtu hna nih Khrih nih a chim bantuk in Thawngttha bia cu nunnak pek tiang in an chim ngam.

Biakawmnak:

Nihin zumtu hna nih kan chim mi cu Khrih Thawngttha a si. Kalvary Thawngttha, Vailamtah thawngttha a si. Pathian dawtnak thawngttha a si. Khrih nih vawlei a nun lio ah a ttuanmi rian hna kha ttuan peh ding ah a kan fial. Mission rian kan ttuan tikah hin thlarau le pumsa caah ttuan kan herh

Thlarau damnak: Thlarau in mitcaw mi hna kalnak a hngal lo mi tampi kan um rih. Sehtan puar pennak chungah thawng a tla mi tampi kan um. Lungretheihnak le vansannak in kan khat. Damnak kan herh.

Pumsa damnak: Pumsa damnak cu Khrih nih a ttuanmi rian a si. Mitcaw hna nih khua an hmu. Miphar an dam. Kebai le a zengmi an kal kho. Thlarau in kan damnak cu sizung cu Kalvary sizung a si. Kan damnak cu Vailamtah hmual a si. Jesuh lo in damnak a um lo. Thlarau in a dam mi hna nih pumsa damnak zong kan hmuh chih. Thinlung in hnangamnak, daihnak le lawmhnak kan hmu.

Sifak santlailo bawmhnak: Tuah ding kha a kan fial. Jesuh Khrih nih “Sifak mi hna sinah Thawngttha chim ding ah Bawipa Thlarau nih chiti a ka thuh” a ti (Luka 4:18). Sifak santlailo hna bawmh hi Khrih mission rian a si.

Khrih khamhnak thawngttha chim nak caah kan pekmi chaw hna cu a sawhsawh an si lai lo. Bawipa ram caah na pek ruangah na si a fak lai lo. Kan si a fah ruangah Bawipa cu a si a fak hlei lo. Pek ah cun pek in kan um ve ko lai.

Profet Isaiah sin ah Bawipa bia cu: “Ahodah ka fial lai? Ahodah ka lamkaltu a si lai?” a ti (Isaiah 6:8). Hi lio hi Uzziah Siangpahrang a thih kum a s i. Israel mi nih an siangpahrang cu uknak lawng si lo in, biaknak lei tiang in an bochan. A thih tikah an miphun caah thla a kaam lio te a si. Pathian nih cun nan siangpahrang a thih zong ah keimah hi zeizong tuah kho tu Pathian ka si tinak kha langh ter a duh. Profet Isaiah hmur cu meittil in a tongh. Mawchiat awk na si nak cu a lo cang a ti. Isaiah nih Bawipa bia a theih tikah “Keimah ka kal lai! Ka thlah tuah tiah a leh (Isaiah 6:9). Isaiah nih misual ka si, midang nak in kaa hleih lo tiin a rak i ruah. Nain, Bawipa nih cun na sualnak cu ngaihthiam na si cang a ti (Isaiah 6:7).

Kannih zong hi misual kan si ko nain, Bawipa nih a lamkaltu ding ah a kan duh dih ko. A kan auh. Bawipa caah rianttuan ding in kan si khawhnak zawn paoh in i tiim hna usih. Kum Thar 2009 chung ah Bawipa Pathian le a ram kauhnak caah aa pumpe mi si hna usih. Pathian nih thluachuahnak kan pe cio ko seh!
************************************